É ɖò mɔ̌ có, mɛ gegě nɔ xò nǔ kpɔ́n ɖɔ emi kún sixu wá ɖó sɔgudo e ba wɛ emi ɖè é ó. Ajijimɛ kpowun ɔ, ye mɔ bɔ nǔmaɖónukún lɛ jɛ, ɖi jɛmɛji Covid-19; nǔmaɖónukún enɛ lɛ zɔ́n bɔ nǔ gegě wlú ɖò gbɛ̀ ɔ mɛ, akwɛyózó tíìn, bɔ mɛ gegě lɛ́ kú. Enɛ wu ɔ, mɛ lɛ nɔ lin ɖɔ emi kún sixu ɖó sɔgudo ɖagbe hugǎn ɖé gbeɖé ó.

Nǔxokpɔ́n enɛ zɔ́n bɔ mɛ lɛ ɖò nǔ e na d’alɔ ye bɔ ye na ɖó sɔgudo ɖagbe hugǎn ɖé è ba wɛ. Mɛɖé lɛ nɔ ganjɛ hlɔnhlɔn e nukún ma nɔ mɔ ǎ enyíì lɛ é wu, ɖi byɔwá. Mɛ gegě nɔ dó ta wema kplɔnkplɔn kpo dɔkun jijɛ kpo mɛ, bo nɔ lin ɖɔ nǔ enɛ lɛ na zɔ́n bɔ ye na mɔ nǔ e ba wɛ ye ɖè é. Mɛ ɖevo lɛ nɔ lin ɖɔ nǔ e ye ɖó na wà kpowun bɔ gbɛ̀ na nyɔ́ nú ye é wɛ nyí ɖɔ ye ni nyí mɛ ɖagbe.

Linlin enɛ lɛ ɖě ka na zɔ́n bɔ a na ɖó sɔgudo e ba wɛ a ɖè é à? Bo na dó mɔ xósin ɔ ɔ, a ɖó na lin tamɛ dó nǔkanbyɔ elɔ lɛ jí:

• Etɛ ka sixu d’alɔ we tawun bɔ a na tuùn sɔgudo towe?

• Wema kplɔnkplɔn kpo dɔkun jijɛ kpo ka sixu zɔ́n bɔ è ɖó sɔgudo ɖagbe hugǎn ɖé à?

• Enyi è nyí mɛ ɖagbe ɔ, enɛ ka na zɔ́n bɔ è na ɖó sɔgudo ɖagbe hugǎn ɖé à?

• Alixlɛ́mɛnú ɖejid’ewu ɖé ka ɖè nú sɔgudo à?

Atɔxwɛ elɔ sixu d’alɔ wɛ bɔ a na mɔ xósin nǔkanbyɔ enɛ lɛ tɔn.