Ashike ovanhu vahapu ohava kala va limbililwa ngeenge onava ka mone ngoo onakwiiwa oyo va halelela. Ohava mono nghee oiningwanima yombadilila tai holoka po, ngaashi omukifi wekomba wo-COVID-19, oo wa dundakanifa onghalo yovanhu, wa ya eliko eembwayelo nowa dipaa ovanhu vahapu. Osho oshe va ningifa va kale ve udite kutya, onakwiiwa yavo kai na vali fiku i ka kale iwa.

Omolwomalimbililo, ovanhu ova halelela okumona sha osho tashi va wilike opo va mone onakwiiwa i li xwepo. Vamwe ohave lineekele meenghono donhumba dihe wetike, opo va mone elao. Vahapu ohava lalakanene ehongo lopombada nosho yo oupuna, tava diladila kutya oinima yatya ngaho otai va kwafele va mone osho va hala. Vamwe ove udite kutya omunhu okwa pumbwa ashike okukala e na omaukwaya mawa, opo u kale nonghalamwenyo iwa.

Mbela oinima aishe oyo otai ku ningifa ngoo shili u kale nonakwiiwa oyo wa halelela? Opo u shi mone, owa pumbwa okukonakona omapulo aa:

• Oshike lela tashi ufa kutya oto ka kala nonakwiiwa ya tya ngahelipi?

• Mbela ehongo noimaliwa otai dulu ngoo oku ku shilipaleka kutya oto ka kala nonakwiiwa iwa?

• Mbela okukala u na omaukwatya mawa oko taku ufa kutya oto ka kala nonakwiiwa iwa?

• Openi to dulu okuhanga ewiliko li shii okulineekelwa, olo tali ku kwafele u ka kale nonakwiiwa iwa?

Oshifo eshi shOshungonangelo otashi dulu oku ku kwafela u mone omanyamukulo.