Aliwe, abangyi bakathika-thika bathi sihali ekiro bakendi syabya omo ngebe eyo bakayisunza. Babiriyilhangirira ebikabya kitsumbukirania kandi isibayitsulirye​—ng’ekihunzo ky’ekorona [COVID-19]—​ebyabirihamba nabi okwa ngebe y’abandu, eriletha obunakwa obukalire, n’abangyi erikwa. Busana n’ekyo, bakayowa bathi sihali ekiro bakendisyabya omo ngebe eyuwene.

Nomuhane erithika-thika, abandu banemusondekania kutsibu ekyanga basondolha eribakolya oko ngebe eyuwene. Abandi bakayikethera akaghalha akathelhangirawa ng’ebindu eribya ibyabirisangwa byatheghekwa kutse ebbahati. Abangyi bakakwamirira eby’esukuru n’obugaga, erilengekania bathi ebi by’ebikendi leka ibabana ebya banzire. Abandi bakayowa bathi eribya mundu mubuya kya kindu kisa ekya batholere erikolha ibo eribya omo ngebe eyuwene.

Mbwino okw’ebi kune ekyanga leka iwasyabya omo ngebe eyo wukayisunza? Erilebya nga kineho, wutholere iwalengekania okwa bibulyo bino:

• Ni kyahi ekikakusombolera engebe y’embere?

• Mbwino esukuru n’esyosente ni buthekwa-buthekwa indi bikendi leka iwabya omo ngebe eyuwene?

• Eribya mundu mubuya nina buthekwa-buthekwa indi wukendibya omo ngebe eyuwene?

• Obusondoli bw’eriyikethera obwangakolya oko ngebe eyuwene wanga bweyahi?

Egazeti y’Akaleberyo eno yangana kuwathikya eribana eby’erisubirya.