Kansi, ndonga bekatikisinga kana vo e zingu kia mpila yayi kilendakana. Kadi, ezak’e ntangwa vebwanga mambu makinsalukisa malenda soba e zingu kia muntu vana vau. Kasikil’owu, e vuku kia COVID-19, kiasobele emvimba e zingu kia wantu, kiwokese diaka usukami yo vonda wantu ayingi. Muna kuma kiaki, beyindulanga vo ke dilendakana ko mu kala ye zingu kiambote kuna sentu.

Kana una vo i wau, wantu ayingi bevanganga mawonso mu solola luludiku lulenda kubasadisa mu kala ye zingu kiambote kuna sentu. Kiaki i kuma bebundilanga e vuvu muna mavangu ma mpandu. Ndonga beyindulanga vo otanga sikola zandá yo kala ye mavua malenda kubasadisa mu kala ye zingu kiambote. Akaka mpe beyindulanga vo okala muntu ambote i diau kaka dikubasadisa mu kala ye zingu kiambote kuna sentu.

Nga e mambu mama malenda kikilu kusadisa mu kala ye zingu kiambote kuna sentu? Muna zaya e mvutu za kiuvu kiaki, diambote wafimpa e yuvu ilende:

• Nkia diambu kikilu disikidisanga una ukala e zingu kiaku?

• Nga otanga sikola zandá yo kala ye mavua mayingi malenda kusadisa mu kala ye zingu kiambote kuna sentu?

• Nga okala muntu ambote i diau dikusadisa muna kala ye zingu kiambote?

• Akweyi olenda sololwela luludiku lwamfunu kimana wakala ye zingu kiambote?

Eyingidilu diadi dikusadisa mu zaya e mvutu za yuvu yayi.