Kadi ba bungi badi belakana ne: kabakupeta nsombelu udibu basue matuku atshilualua to. Bualu kudi malu a tshimpitshimpi avuabu kabayi batekemene adi mabafikile bu mudi tshipupu tshia disama dia korona. Malu au mmanyangakaje nsombelu wabu bibi be, mmakebeshe bupele ne lufu lua bantu ba bungi. Ke bualu kayi badi bamona ne: kabakupeta nsombelu muimpe matuku atshilualua to.

Bu mudibu kabayi bamanye tshia kuenza, badi bakeba ne muoyo mujima tshintu tshiabapetesha nsombelu muimpe matuku atshilualua. Bamue badi bela meji ne: makole adi kaayi amueneka ke adi abalombola. Ba bungi badi balonga tulasa ne bakeba bubanji, bela meji ne: kulonga kua tulasa ne bubanji nebibajadikile ne: nebapete bidibu bajinga. Bakuabu pabu badi bela meji ne: kuikala muntu muimpe ke tshionso tshidibu bakengela bua kuikala ne nsombelu muimpe.

Kudiku bualu bua ku malu aa buakupetesha nsombelu uudi ujinga matuku atshilualua anyi? Bua kumanya, mbimpe ukebe mandamuna a nkonko eyi:

• Ntshinyi tshidi tshikuambuluisha menemene bua kumanya nsombelu uwikala nende matuku atshilualua?

• Tulasa ne makuta ke bidi bikujadikila ne: neupete nsombelu muimpe matuku atshilualua anyi?

• Dikala muntu muimpe ke didi dikujadikila ne: neupete nsombelu muimpe matuku atshilualua anyi?

• Kudi muaba utudi mua kueyemena bua kupeta nsombelu muimpe matuku atshilualua anyi?

Tshibumba tshia Nsentedi etshi tshidi mua kukupetesha mandamuna a nkonko eyi.