Mahse, mi tam tak chuan an duh ang nakin hun chu an neih theih an ring lo. COVID-19 hripui ang chi, beisei loh thil lo thleng thut ṭhînte chuan mite nunphung nasa taka a tihbuai bâkah, retheihna nasa tak a thlenin, mi tam tak nunna a la ṭhîn si a. Chuvângin, an nakin hun chu muanawm tak a nih theih an ring ngam lo a ni.

Chutiang thil chiang lote avângin, mite chuan nakin hun ṭha zâwk an neih theih nâna kaihruai theitu tûr thil eng emaw chu ṭhahnemngai takin an zawng a. Mi ṭhenkhat chuan ruat lâwkna, a nih loh leh nakin hun sawi lâwkna ang chi hmuh theih loh chaknate chu an rinchhan a ni. Mi tam tak chuan zir sânna leh hausaknain an mamawhte a neihtîr theih an rin avângin, chûngte chu an ûm a. Mi dangte chuan nun nuam tak nei tûra an mamawh awm chhun chu mi ṭha tak nih hi a ni mai tiin a ngai bawk.

Kan târ lan tâk chûng thilte chuan i duh ang nakin hun muanawm tak chu a neihtîr thei che ang em? Chumi hre tûr chuan, hêng zawhnate hi i ngaihtuah a ngai ang:

• I nakin hun tûr chu engin nge hril?

• Zir sânna leh hausakna hian nakin hun muanawm tak a neihtîr thei tak tak che em?

• Mi ṭha tak nih maina chuan nakin hun muanawm tak a neihtîr thei tak tak che ang em?

• Nakin hun muanawm tak nei tûrin khawiah nge kaihruaitu rin tlâk i hmuh theih?

Tûn ṭum chhuak Vênnainsâng hian chûng zawhnate chhânna chu hmu tûrin a ṭanpui thei che a ni.