Ahpw, aramas tohto peikasalki me re kak alehdi dahme re kasikasik ong ni ahnsou kohkohdo. Re kilangehr mwekid soh kasikpe kan me mwadangete wiawi​—me duwehte COVID-19 me mwadangete wiawi oh kahpwalihala mouren aramas akan, kahrehda semwehmwe oh pil kemehla aramas tohto. Pwehki met re pwunodki me ar mour ni ahnsou kohkohdo sohte pahn mwahu.

Pwehki soahng soh kasikpe kan, aramas akan kin nantihong rapahki mehkot me pahn kaweid irail en ahneki mour nsenamwahu ni ahnsou kohkohdo. Ekei aramas medewe me soahng kan me koasoandier me pahn wiawihong irail. Me tohto kin nantihong sukuhl laud oh men kepwehpwehla, re medewe me mepwukat uhdahn pahn kihong irail dahme re mwahuki. Meteikan medewe me ihte me ke anahne wia iei wiahla aramas mwahu men pwe ken kak ahneki mour mwahu.

Mehnia rehn mepwukat me pahn kahrehiong uhk en alehdi dahme ke kasikasik ni ahnsou kohkohdo? Pwehn diarada, ke anahne medewe peidek pwukat:

• Dahme kin koasoanehdi omw mour ni ahnsou kohkohdo?

• Sukuhl laud oh mwohni kak kihong uhk mour mwahu?

• Omw wiahla aramas mwahu pahn kihong uhk mour mwahu ni ahnsou kohkohdo?

• Ia wasa ke kak diar kaweid likilik ong mour mwahu ni ahnsou kohkohdo?

Kahn Iroir wet kak seweseiuk en diarada pasapeng kan.