Kae ko fakalotolotolua a tino e tokouke me ka maua ne latou te olaga telā e ma‵nako latou ki ei i aso mai mua. Ko oti ne lavea ne latou a fakalavelave ‵tupu fakafuasei—pelā mo te masaki ko te COVID-19—telā ko ‵fuli fakakotua ne ia te olaga, fakama‵tiva a tino, kae ‵mate atu ei a tino e tokouke. Ona ko te mea tenā, ko mafau‵fau ei latou me ko se mafai o maua ne latou se olaga gali i aso mai mua.

Ona ko tulaga sē mautinoa konei, ko salasala malosi a tino ki se mea telā ka takitaki ei latou ki se olaga gali i aso mai mua. E tali‵tonu a nisi tino ki malosi sē matea e pelā mo te talitonu me ko oti ne palani a mea ka ‵tupu i te olaga. E kausaki atu a tino e tokouke ki akoakoga mo koloa, mo te mafaufau me ka maua tonu eiloa ne latou a mea e ma‵nako latou ki ei. E mafau‵fau a nisi tino me i te fai fua mo fai se tino ‵lei ko te auala fua ke maua ei se olaga ‵lei.

E mata, e isi se auala i konei telā ka takitaki atu ei koe ki se olaga telā e manako koe ki ei i aso mai mua? Ke maua te tali, e ‵tau o mafaufau koe ki fesili konei:

• Se a te mea ka fakavae tonu ki ei tou olaga i aso mai mua?

• Akoakoga mo tupe—e maua tonu i ei se olaga gali i aso mai mua?

• Te fai fua mo fai se tino ‵lei—e maua tonu i ei se olaga gali i aso mai mua?

• E mata, e isi se auala mautinoa ki se olaga gali i aso mai mua?

Ka fesoasoani atu a te lōmiga tenei o Te Faleleoleo Maluga ke maua ne koe a tali ki ei.