Ẹkẹvuọvo, ihwo buebun vwo ẹwẹn ivivẹ sẹ oborẹ ayen guọnọre vwẹ obaro na ghini se te ayen abọ. Ayen mrẹ erọnvwọn sansan re phiare kpregede re rhẹro rọye-en—kerẹ ọga ri COVID-19—rọ ghwẹ uweren ọgangan rhe, hwe ihwo buebun, ji wene oborẹ ihwo yeren akpọ wan. Enana eje ke nẹrhẹ ayen roro nẹ ayen che se yeren akpọ rẹ ofuvwegbe-e.

Fikirẹ ẹwẹn ivivẹ nana, ihwo ke davwẹngba vwọ guọnọ obo re sa chọn ayen uko vwo yeren omamọ rẹ akpọ vwẹ obaro na. Ihwo evo roro nẹ urhiẹvwe, uyovwin eyovwon vẹ efe yen che dje oka rẹ akpọ rẹ ayen che yerin. Buebun rori nẹ ayen de yono ẹbe sheri ji vwo igho buebun, enana sa nẹrhẹ ayen vwo oborẹ ayen guọnọre. Ihwo efa ki rhe no nẹ a vwọ dia omamọ rẹ ohwo yen oborẹ a ghwa guọnọ re vwo yeren omamọ rẹ akpọ.

Ọvo usun rẹ erọnvwọn re djunute na sa ghene nẹrhẹ wo yeren oka rẹ akpọ ru wọ guọnọre? Wọ sa vwọ mrẹ ẹkpahọnphiyọ na, gba fuẹrẹn enọ nana:

• Die yen suẹn oborẹ wo che yeren akpọ wẹn wan?

• Ẹbe eyono kugbe igho sa nẹrhẹ e yeren omamọ akpọ?

• A vwọ dia omamọ rẹ ohwo sa nẹrhẹ e yeren akpọ rẹ ofuvwegbe?

• Tivọ yen wọ da sa mrẹ uvi rẹ odjekẹ vwọ kẹ akpeyeren?

Uwevwin Orhẹrẹ nana sa chọn wẹ uko vwọ mrẹ ẹkpahọnphiyọ nana.