Machane boor e girdi’ ni yad be lemnag nsana dabi yan i aw e par rorad nga rogon ni yad baadag. Bay boch ban’en ni ke buch nib tomgin ni ke thilyeg rogon e par ko girdi’, ma ke k’aring e gafgow, maku boor e girdi’ ni ke yim’ riy ni bod fare m’ar ni COVID-19. Bochan e re n’ey, ma aram fan ni boor e girdi’ ni yad be lemnag ndabi fel’ e par rorad boch nga m’on.

Bochan ndaki mudugil rogon e par ko girdi’, ma aram fan ni yad be gay ban’en nra ayuwegrad ni nge fel’ e par rorad boch nga m’on. Boch e girdi’ e ba mich u wan’rad ni kan mu’ i dugliy e n’en nra buch rorad boch nga m’on. Ma boor e girdi’ ni yad ma nameg e skul nge flaab, ya yad be lemnag ni aram e n’en nra ayuwegrad ni nge yag ngorad e n’en yad baadag. Ma boch e girdi’ e yad ma lemnag nib gaman ni kemus ni ngar rin’ed e tin nib fel’.

Bay reb e pi n’ey nra ayuwegem ni nge yag ngom e n’en ni ga baadag boch nga m’on, fa? Ra ngam nang e fulweg riy, mab t’uf ni ngam nang e fulweg ko pi deer ni baaray ni be gaar:

• Mang e ra dugliy rogon e par rom boch nga m’on?

• Rayog ni nge ayuwegem e skul nge salpiy ni nge fel’ e par rom boch nga m’on, fa?

• Gur, ra fel’ e par rom boch nga m’on ni faan ga ra rin’ e ngongol nib fel’, fa?

• Uw e rayog ni ngam pirieg ban’en riy nra fal’eg e par rom boch nga m’on?

Re ke Wulyang ko Damit ney e ra ayuwegem ni ngam pirieg e fulweg ko pi deer ney.