ASTROLOHIYA: May mga naniniwala na an magigin puturo ninda nakadepende sa posisyon kan mga bituon kan sinda mamundag. Nagbabasa sinda nin mga horoscope, o mga hula paagi sa astrolohiya, tanganing maaraman kun ano an mangyayari sainda. Tapos, nagdedesisyon sinda basado diyan para makalikay sa peligro o para magin mapanggana.

FENG SHUI: Naniniwala an iba na an sekreto para magin marahay an buhay iyo na iuyon an disenyo kan harong ninda sa mga dai nahihiling na puwersa sa naturalesa. Si Lo Wing, * na nakaistar sa Hong Kong, nagsabi, “Sarong feng shui master an nagsabi sako na an pagbugtak daa nin espesyal na kristal sa sarong espesipikong puwesto sa tindahan ko makakatabang sako na makadilensiya nin mas dakul na kuwarta.”

PAGSAMBA SA MGA APUON: Igwa man nin mga naniniwala na dapat nindang mapaugma an saindang gadan na mga apuon o an mga manlain-lain na diyos-diyosan para proteksiyunan sinda asin biyayaan. Si Van, na nakaistar sa Vietnam, nagsabi, “Naniniwala ako na pag nagtao akong onra sa mga apuon ko, magigin marahay an buhay ko ngunyan saka magkakaigwa kami kan mga aki ko nin magayon na puturo.”

REINKARNASYON: Para sa dakul, an buhay daing katapusan na siklo nin pagkabuhay, pagkagadan, asin pagkamundag giraray. Naniniwala sinda na an mga marahay o maraot na inaagihan ninda ngunyan resulta kan mga ginibo ninda sa nakaagi nindang buhay.

Ibinibilang kan dakul na superstisyon lang an mga iyan. Pero, dawa dai man sinda lubos na nagtutubod  diyan, nagpapahimalad pa man giraray sinda, nagbabasa nin mga horoscope, naggagamit nin mga Ouija^® board, mga tarot card, asin iba pang arog kaiyan. Iniisip ninda na ’baad lamang makatabang an mga iyan na maaraman ninda an magigin puturo ninda.

Nagkaigwa daw nin marahay na buhay asin magayon na puturo an mga nagtubod sa mga arog kaiyan na mga paniniwala o gibo-gibo?

Pag-isipan an halimbawa ni Hào, na nakaistar sa Vietnam. Ginamit niyang giya sa buhay an astrolohiya, feng shui, asin pagsamba sa mga apuon. Nagin marahay daw an buhay niya? Sinabi ni Hào, “Nalugi an negosyo ko, nagkautang ako, nagkaproblema sa pamilya, saka na-depress na marhay.”

Si Qiuming, na taga Taiwan, naniniwala man sa astrolohiya, reinkarnasyon, kapaladan, feng shui, asin pagsamba sa mga apuon. Pagkatapos na mapag-adalan na marhay an mga paniniwalang iyan, sinabi niya: “Napag-isip-isip ko na an mga katukduan na iyan saka mga kostumbre nagkokorontrahan tapos nakakaribong. Nahiling kong an mga hula paagi sa astrolohiya sa parati sarala. Pag-abot man sa reinkarnasyon, kun mayo kang nagigirumduman sa nakaagi mong buhay, paano ka mabago asin magigin mas marahay sa sunod mong buhay?”

Arog kan napag-isip-isip ni Hào, ni Qiuming, saka kan dakul na iba pa, an satong puturo dai nakadepende sa kapaladan, mga bituon, nagadan na mga apuon, o sa pagkamundag giraray. An buot sabihon daw kaini dai ta kontrolado an satong puturo?

Para sa dakul, an makakatao nin marahay na puturo iyo an pagkua nin halangkaw na edukasyon saka pagkaigwa nin kayamanan. Ano an nagin resulta sa iba na naggibo nin arog kaiyan na desisyon?