LUBUKU LUA MITOTO NE MABULUNGE MAKUABU: Bamue badi bela meji ne: mushindu uvua mitoto midilonge pavuabu babalele ke udi uleja tshikala nsombelu wabu matuku atshilualua. Badi batangila mu biamu bia kumona nabi mitoto bua bibambile tshikala nsombelu wabu matuku atshilualua, bibambuluisha kabidi bua kuangata mapangadika.

TSHILELE TSHIA FENG SHUI: Bakuabu batu balonda tshilele tshidibu babikila ne: feng shui, bela meji ne: bobu bibake nzubu, bateke bintu mu lubanza bidi mu diumvuangana ne makole kampanda adi kaayi amueneka nebikale ne shanse. Lo Wing * wa mu Hong Kong udi wamba ne: “Mulongeshi munene wa tshilele tshia feng shui wakamba muvua kuteka dibue dia lumuenu muaba kampanda mu makazen ende kumupetesha makuta a bungi.”

DITENDELELA BAKISHI: Bakuabu pabu badi bela meji ne: badi mua kulengelela mikishi ya bankambua anyi banzambi bashilashilangane bua kupeta bukubi ne mabenesha. Van wa mu Vietnam udi wamba ne: “Ndi ngela meji ne: meme nkukuila bakishi banyi, meme ne bana banyi netupete nsombelu mulenga lelu ne mu matuku atshilualua.”

DILEDIBUA KABIDI MU TSHINTU ANYI MUNTU MUKUABU: Ba bungi badi bela meji ne: padi muntu ufua udi uledibua kabidi, bishala anu nanku, mmumue ne: ufua uledibua, ufua uledibua. Badi bela meji kabidi ne: bimpe ne bibi bidibu nabi lelu, mbipeta bia malu avuabu benze kumpala.

Kadi bua ba bungi, malu adibu bitabuja au mbitabataba bia buôwa. Nansha nanku bakuabu batshidi anu bakeba kumanyina malu mu mitoto ne mu ngondo, mu mishonyi ya mu bianza, mu tuarte tua kunaya, mu lumuenu, mu bilota ne mu bimanyinu bikuabu. Badi bela meji ne: pamuapa bilele bia nanku bidi mua kubambuluisha bua kumanya tshikala matuku abu atshilualua.

Bantu badi beyemena malu adibu bitabuja ne bilele abi mbapete nsombelu muimpe anyi? Peshi nebamupete matuku atshilualua?

Tangila tshivua tshifikile Hào wa mu Vietnam. Uvua ne tshibidilu tshia ubuka mitoto, wenza tshilele tshia feng shui, ne utendelela bakishi bua bamulombole. Uvua mutute diakalengele anyi? Hào udi wamba ne: “Ngakatua panshi mu dienda dia mushinga, meme kubuela mabanza, kupeta ntatu mu dîku, ne kumpeteshabi tunyinganyinga tukole.”

Qiuming wa mu Taïwan uvua pende ulonda malu a mbuku ya mitoto ne mabulunge makuabu, a diledibua kabidi mu tshintu anyi muntu mukuabu, a malu kampanda mamana kukufundila kudi makole adi kaayi amueneka, tshilele tshia feng shui, ne ntendelelu wa bakishi. Pakakonkononaye malu aa bimpe bimpe wakamba ne: “Ngakamona ne: malongesha au ne bilele abi kabiena bipetangana to, ne bidi ne tshibuejakaji. Ngakamona kabidi ne: misangu ya bungi lubuku lua mitoto ne mabulunge makuabu luvua lusuika bantu ku masele. Bua bidi bitangila diledibua kabidi mu tshintu anyi muntu mukuabu, mmunyi muudi mua kushintuluka kulua ne nsombelu mulenga mu muoyo mukuabu wewe kutshiyi uvuluka tshivua nsombelu webe kumpala?”

Anu muvua Hào, Qiuming, ne bakuabu ba bungi bafike ku dimona, ki mmalu kampanda mamana kukufundila kudi makole adi kaayi amueneka, mitoto, mikishi ya bankambua, anyi diledibua kabidi mu tshintu anyi muntu mukuabu bidi bituambuluisha bua kumanya nsombelu wetu mu matuku atshilualua to. Mmumue ne: katuena ne tshitudi mua kuenza bua matuku etu atshilualua anyi?

Ba bungi badi bamona ne: bobu ne bubanji ne balonge tulasa tutumbuke tua bidimu bipite pa 3 kuajiki, nebapete nsombelu mulenga matuku atshilualua. Kadi disungula edi ndipeteshe bamue ba kudibu tshinyi?