Khuyini Elawula Ukuthi Ingomuso Lakho Lizokuba Njani?
Abantu abanengi bakholelwa ukuthi kunemimmoya ethileko elawula ingomuso labo. Ngebanga lalokho, benza amasiko ahlukahlukeneko bakholelwa ukuthi bazokuba nengomuso elingcono.
LOKHO ABANENGI ABAKUKHOLELWAKO
UKUHLAHLUBA NGEENKWEKWEZI: Abanye abantu bakholelwa ukuthi indlela iinkwekwezi ebezihleli ngayo lokha nababelethwako, ngikho okuzokulawula ingomuso labo. Bafunda ngeenkwekwezi eencwadini ukwazi ukuthi ingomuso labo lizokuba njani nokubasiza ukuthi bathathe iinqunto ezizobaphumelelisa.
I-FENG SHUI: Abanye bakholelwa ukuthi nabakha imizabo ngendlela ethileko bazokuphumelela bebathabe. U-Lo Wing, * ohlala e-Hong Kong uthi, “Isazi se-feng shui sangitjela ukuthi nangingabeka ilitje elikhethekileko endaweni ethileko esitolo sami lokho kuzongisiza ngifumane imali enengi.”
UKULOTJHA ABEZIMU: Abanye bakholelwa ukuthi kufuze balotjhe abezimu babo bona bakghone ukubavikela bebababusise. U-Van, ohlala e-Vietnam uthi, “Bengikholelwa ukuthi ukwenzela abezimu bami okuthileko bekuzongenza ngiphile ngcono nje bengibe nengomuso elihle mina nabantwana bami.”
UKUBELETHWA KABUTJHA: Abanengi bakholelwa ukuthi lokha umuntu nakahlongakalako, ubelethwa kabutjha begodu lokhu kwenzeka iinkhathi ezinengi. Bakholelwa ukuthi izinto ezimbi nezihle ezibehlelako nje zimphumela wezinto ebebazenza ekuphileni kwabo kwaphambilini.
Abanye bacabanga ukuthi iinkolelo ezinjalo zibudimoni namkha kulawulwa mimmoya emimbi. Nanyana kunjalo, basenza imikghwa efana nokufunda imida yesandla, ukuphengula ngeenkwekwezi, ukusebenzisa ama-Ouija® boards nokusebenzisa amakarada wokufunda ingomuso lomuntu nokhunye okufana nalokhu. Bacabanga ukuthi mhlamunye ukwenza izinto ezinjalo kuzobasiza bazi bona ingomuso libaphatheleni.
INGA-KGHANI ZOKE IINKOLELWEZI ZIYABASIZA ABANTU?
Labo abathembela eenkolelweni ezinjalo inga-kghani bafumene ukuphila okuthabisako nengomuso elingcono?
Cabanga ngalokho okwenzakalela u-Hào, ohlala e-Vietnam. Ukuthi azi ngengomuso lakhe wasebenzisa ukuphengula ngeenkwekwezi, i-feng shui nokulotjha abezimu. Inga-kghani waphumelela? U-Hào uthi, “Irhwebo lami lawa, ngangena eenkolodweni, umndenami wahlangahlangana bengagandeleleka khulu.”
U-Qiuming ohlala e-Taiwan, naye bekakholelwa ekuphenguleni ngeenkwekwezi, ekubelethweni kabutjha, ekutheni izinto zenzeka ngetjhudu, ku-feng shui nekulotjheni abezimu. Ngemva kokuhlolisisa iinkolelwezi, uthi: “Ngalemuka ukuthi iimfundiswezi namasiko la kuyaphikisana begodu kuyahlangahlanganisa. Ngafumana ukuthi lokho ebekutjhiwo ziinkwekwezi bona kuzokwenzeka kanengi bekungabi njalo. Endabeni yokubelethwa kabutjha, nangabe awukhumbuli ukuthi bewuphila njani ekuphileni kwaphambilini, ungatjhuguluka njani wenze ngcono ekuphileni okulandelako?”
“Ngalemuka ukuthi iimfundiswezi namasiko la kuyaphikisana begodu kuyahlangahlanganisa.”—QIUMING, TAIWAN
Njengo-Hào no-Qiuming, abantu abanengi balemuke ukuthi ingomuso lethu alikadzimeleli etjhudwini, eenkwekwezini, ebantwini abahlongakeleko namkha ekubelethweni kabutjha. Kghani lokho kutjho ukuthi angekhe sakghona ukulawula ukuthi ingomuso lethu lizokuba njani?
Abanengi bacabanga ukuthi nabazakufumana ingomuso elingcono kufuze bafumane ifundo ephakemeko bebanjinge. Ube yini umphumela kwabanye abathethe isiqunto esinjalo?
^ isig. 5 Esihlokwenesi nakwezilandelako amanye amagama atjhugululiwe.
^ isig. 16 Lokho akutjhoko kufumaneka eBhayibhelini eCwengileko kwebeGalathiya 6:7. Kanengi amezwi la ahlathululwa ngendlela le, Nawutjale ikhabe, uzokuvuna ikhabe; nawutjale amabhontjisi, uzokuvuna amabhontjisi.
Okhunye Ongakuthabela
ISITHALA
Ukuhlahluba Kweenkwekwezi Namabika Kungasitjela Na Ngengomuso Lethu?
Uyazithemba na iindlela zokuhlahlubezi?
ISITHALA
Lithini IBhayibheli Ngokufa Nokuphila?
Kghani kukhona okuthileko emzimbenethu okuraga nokuphila ngemva kokuhlongakala? Kghani sinomphefumulo ongafiko? Bakuphi abafileko?
