TE ASTROLOGÍA. Bayal ants winiketik ya snopik te bin ya xkʼax ta skuxlejalik ta pajel chaʼbej, jaʼlaj chikan te bin-utʼil scholoj sbaik-a te ekʼetik te kʼalal ayinike. Jaʼ yuʼun ya skʼoponik te horóscopo yuʼun ya snaʼik-a te bin ya xkʼot ta pasel ta skuxlejalik sok yuʼun jich ma sta swokolik-a.

TE FENG SHUI. Ay yantik ya snopik te yuʼunlaj lek ya xbajt-a te skuxlejalik, jaʼlaj lek te jun-nax ayik sok te yip te bintik ma chikanik ta ilele. Jtul winik te kuxinem ta Hong Kong te Lo Wing sbiil, * jich ya yal: «Jtul maestro yuʼun feng shui, la yalbon te yalaj jtaxan bayal takʼin teme ya kakʼ jun cristal ta jtienda».

TE YICHʼEL TA MUKʼ TE MACHʼATIK LAJEMIKIXE. Ay yantik ya schʼuunik te yalaj skʼan ya yichʼik ta mukʼ te machʼatik lajemikix o yantik diosetik yuʼun ya xkanantayotik sok te yakuk x-akʼbotik bendición. Te Van jtul ants te kuxinem ta Vietnam, jich ya yal: «Jkuyoj-a te ya xlekub te jkuxlejalkotik teme ya kichʼ ta mukʼ te machʼatik lajemikixe».

TE CHAʼAYINEL TA YAN BAKʼETALIL. Bayal machʼatik ya schʼuunik te kʼalal ya xlajotik yalaj xchaʼayinotik ta yan bakʼetalil. Jaʼ yuʼun ya skuyik te bin lek sok te bin ma lek ya xkʼax ta skuxlejalik ta ora ini, jaʼ ta skaj te bin la spasik ta nailto.

Manchukme snaʼojik te ma meleluke, yananix stuuntesik-a te horóscopo, te tabla ouija^®, te carta yuʼun tarot sok ya yakʼik ta kʼoponel te stan skʼabik, melel ya skuyik te ya xkoltayotik ta snaʼel te bin ya xkʼax ta stojolik.

¿Yabal xlekub skuxlejalik te machʼatik ya schʼuunik spisil ini?

Te Hào te kuxinem ta Vietnam, la skuy te jaʼ ya xlekubtesbot skuxlejal yuʼun te astrología, te feng shui sok te yichʼel ta mukʼ te machʼatik lajemikixe. Pero ¿bin kʼot ta pasel? Te Hào jich ya yal: «Laj te jnegocio, ochon ta betil, la jta jproblema sok te jfamilia sok ma lek la kaʼiy jba yuʼun».

Te Qiuming te kuxinem ta Taiwán, schʼuunoj-a te ay te astrología, te ayinel ta yan bakʼetalil, te destino, te feng shui sok te yichʼel ta mukʼ te machʼatik lajemikixe. Pero te kʼalal la yilbey skʼoplal spisil ini, jich la yal: «Kʼot ta koʼtan te ya skontrain sba te bin schʼuunejik sok te scostumbreik. Ma smeleliluk te bin ya yal te astrología sok te ayinel ta yan bakʼetalil, teme maba ya xjul ta awoʼtan te bin la apas ta yan akuxlejal, ¿bin-utʼil kʼan alekubtes te yane?».

Te Hào, te Qiuming sok yantikxan ants winiketik, staojikix ta ilel te ma x-albotik yuʼun te bin ya xkʼax ta skuxlejalik te destino, te ekʼetik, te machʼatik lajemikix o te machʼatik ya skuyik te ya x-ayinik ta yan bakʼetalil. Pero, ¿yabal skʼan ya yal-abi te ma xjuʼ ya jnaʼtik te bin ya xkʼot ta pasel ta pajel chaʼbej?

Bayal machʼatik ya skuyik te jaʼ lek te bayal jnoptik jun o te bayal jtakʼintik yuʼun jich lek-a te jkuxlejaltik. Pero ¿bin-utʼil yaʼiyoj sbaik te machʼatik jich spasojike?