Bushe Ukuba Umuntu Umusuma Kuti Kwalenga Mwaisaba ne Nsansa ku Ntanshi?
Pa myaka iingi abantu bamona ukuti umuntu nga alecita ifisuma ninshi akaba ne nsansa ku ntanshi. Ku ca kumwenako abantu aba ku Asia balicindika ifyo kasambilisha baleita ukuti Confucius alandile, uwaliko mu myaka yaba 551 ukufika kuli ba 479 ninshi Yesu talaisa pe sonde, atile “wilacita ifyo ushingafwaya abanobe bacita kuli iwe.” *
IFYO ABENGI BACITA
Abengi bamona ukuti nga bali ne mibele iisuma, e lyo bengesaba ne nsansa ku ntanshi. Balesha na maka ukuba no mucinshi, ukuba ne mibele iisuma, ukubikako amano ukubomba umulimo bakwata e lyo no kuba na kampingu iisuma. Ba Linh aba ku Vietnam batile, “naishibe ukuti nga ndi uwa cishinka kabili umufumacumi ninshi ifintu fikaba bwino ku ntanshi.”
Bamo nabo ifyo basambilila ku mapepo filenga balefwaya ukuba abantu abasuma. Ba Hsu-Yun abekala ku Taiwan nabo balandile ukuti: “Bansambilishe ukutila nga ca kuti umuntu alecita ifintu ifisuma ilyo ashilafwa ninshi nga afwa akaba ne nsansa, lelo nga alecita ifyabipa ninshi nga afwa akalacula.”
CINSHI CINGACITIKA NGA CA KUTI UMUNTU ALECITA IFISUMA
Cishinka ukuti nga tulecitila abantu ifisuma, ifintu filatwendela bwino. Na lyo line abantu bambi abacitila abantu ifisuma basanga ukuti te lyonse ifintu fibendela bwino ukulingana ne fyo benekela. Ba Shiu Ping aba ku Hong Kong balandile ukuti, “nali-imwenene ne mwine ukuti abantu abacitila bambi ifisuma te lyonse ifintu fibendela bwino. Nalebombesha ukulasakamana ulupwa lwandi no kulacita ifisuma lelo icupo candi calipwile kabili nashele fye no mwana wandi umwaume.”
Abantu abengi balimona ukuti nangu fye bantu abaya ku mapepo te bonse ababa bwino. Ba Etsuko abekala ku Japan batile, “naishileba mu cilonganino ca mapepo cimo kabili bampeele umulimo wa kula-angalila akabungwe ka baice mu calici, nomba nalipapile ilyo namwene ifyo abantu nalepepa nabo bali ne mibele iyabipa, balelwishanya pa mulandu wa butungulushi ne fyo balebomfya bubi bubi indalama she calici.”
“Nalebombesha ukulasakamana ulupwa lwandi no kulacita ifisuma lelo icupo candi calipwile kabili nashele fye no mwana wandi umwaume.”—E FYALANDILE BA SHIU PING, ABA KU HONG KONG
Abantu abengi abaya ku mapepo kabili abacita ifisuma balomfwa ububi nga ca kuti ifintu tafilebendela bwino. Ifi fine e fyo na ba Van abekala ku Vietnam baleumfwa, batile, “cila bushiku naleshita ifisabo, amaluba e lyo ne fya kulya no kufipeela ku fikolwe fyandi abafwa, kabili nalemona ukuti nalimo ukucita ifi kuti kwalenga napaalwa ku ntanshi.” Te mulandu na fyonse ifi ifisuma ifyo nalecita, abena mwandi balilwele ubulwele ubwabipisha kabili umwana wandi na o alifwile ninshi ali fye ne myaka 20 ilyo aile mu kusambilila ku calo cimbi.”
Nomba nga ca kuti ukuba umuntu umusuma te kuti kulenge mwaisaba ne nsansa ku ntanshi, ninshi finshi fingalenga mwaisaba ne nsansa? Pa kwasuka ici cipusho tulingile ukwishiba bwino ifingatwafwa ukwasuka aya mepusho. Ni finshi ifyo fine ifingatwafwa?
^ para. 2 Nga mulefwaya ukwishiba ifingi pa fyo Confucius alesambilisha moneni icitabo citila Ukusapika Lesa Ukwa Mutundu wa Muntu icipandwa 7 amapara 31-35. Abalemba ici citabo ni Nte sha kwa Yehova kabili kuti mwacisanga pa www.pr418.com.
Nalimo Kuti Mwatemwako ne fi
LOLENI!
Ukusambilila Imibele Iisuma
Nga mulesambilisha abana benu ukuba ne mibele iisuma kuti baisaba ne nsansa nga bakula.
AMASUKO KU MEPUSHO YA MU BAIBOLO
Bushe Ifunde lya Mulinganya Lifunde Nshi?
Ilyo Yesu alandile pe Funde lya Mulinganya, talelanda fye pa fyo tufwile ukulacitila abantu, lelo alelanda na pa fyo tufwile ukucitila abalwani besu.
ULUPUNGU LWA KWA KALINDA
Mulandu Nshi Ifyabipa Ficitikila Abacita Ifisuma?
Baibolo yalilanda pa fintu fitatu ifilenga ukuti abantu balecula.
