Cabʌl lac piʼʌlob miʼ ñaʼtañob chaʼan cheʼ weñob i melbal (chaʼlibal), wen mi caj i yajñelob. Jin chaʼan miʼ chaʼleñob wersa chaʼan miʼ qʼuelob ti ñuc yambʌlob, chaʼan miʼ pʌsob wen tac bʌ i melbal, chaʼan miʼ chaʼleñob coltaya yaʼ tiʼ lumalob yicʼot chaʼan ñʌchʼʌl i concienciajob. Linh, juntiquil xʼixic chumul bʌ ti Vietnam, miʼ yʌl: «Ti bele ora tsaʼ c ñaʼta chaʼan wen mi caj cajñel mi mucʼʌch c mel chuqui wen yicʼot cheʼ mi cʌl i sujmlel».

An muʼ bʌ i melob chuqui tac wem bʌ come cheʼʌch miʼ pʌsbentelob tiʼ ñopbal. Juntiquil wiñic chumul bʌ ti Taiwán, i cʼabaʼ Hsu-Yun, miʼ yʌl: «Tsaʼ pʌsbentiyon chaʼan, cheʼ bʌ juntiquil lac piʼʌl miʼ chʌmel (sajtel), tijicña mi caj i yajñel mi tsiʼ mele chuqui wen, pero mi tsiʼ mele mach bʌ weñic mi caj i ñusan wocol tiʼ pejtelel ora».

I sujmʌch chaʼan ñumen wen mi la cajñel cheʼ bʌ mi laj coltan yambʌlob. Pero cabʌlob muʼ bʌ i coltañob yambʌlob, an i qʼueleyob chaʼan mach tiʼ pejtelelic ora cheʼ miʼ loqʼuel bajcheʼ pijtʌbil i chaʼañob. Shiu Ping, juntiquil xʼixic chumul bʌ ti Hong Kong, miʼ yʌl: «Miʼ mejlel cʌl chaʼan jiñi muʼ bʌ i melob chuqui wem bʌ mach tiʼ pejtelelic ora miʼ tajob chuqui wem bʌ. Tsaʼ c chaʼle wersa chaʼan mij cʌntan jiñi c familia yicʼot chaʼan mic mel chuqui tac wem bʌ, pero tsaʼ jejmi jiñi c ñujpuñel i jiñi c ñoxiʼal tsiʼ cʌyʌyon quicʼot calobil».

Cabʌlob an i qʼueleyob chaʼan an mach bʌ weñobic i melbal anquese añob i ñopbal. Etsuko, juntiquil xʼixic chumul bʌ ti Japón, miʼ yʌl: «Tsaʼ ajñiyon ti jumpʼejl ñopbalʌl i tsaʼ ajñiyon bajcheʼ directora chaʼan jiñi xcolelob. Mach wis tijicñayic tsaʼ cubi cheʼ bʌ tsaʼ j qʼuele chaʼan jiñi añoʼ bʌ tic ñopbal mach weñobic i melbal, miʼ letojiñob i bʌ (querajiñob i bʌ)chaʼan miʼ tajob i ñuclel yicʼot miʼ toʼol jisañob i taqʼuin jiñi iglesia».

An lac piʼʌlob añoʼ bʌ i ñopbal mach bʌ tijicñayic tsiʼ yubiyob i bʌ cheʼ bʌ tsiʼ qʼueleyob chaʼan maʼañic tsaʼ wis cʼʌjñibʌyi pejtelel chuqui wem bʌ tsiʼ meleyob. Cheʼ tsiʼ yubi i bʌ Van, juntiquil xʼixic chumul bʌ ti Vietnam. Tsiʼ yʌlʌ: «Jujumpʼejl qʼuin mi cʌcʼ i wut teʼ, ñichteʼ tac yicʼot bʌlñʌcʼʌl yaʼ tiʼ yaltar c ñojteʼelob i tsaʼ c pijta chaʼan mic taj bendición tac ti talto bʌ qʼuin. ¡Cabʌl jab tsaʼ c mele chuqui tac wem bʌ yicʼot i costumbre tac jiñi c ñopbal! I ti wiʼil, tsaʼ wen cʼamʼa jiñi c ñoxiʼal. I jiñi quixicʼal, woli (choncol) bʌ ti clase ti yambʌ país, tsaʼ chʌmi cheʼ bʌ an jaxto 20 i jabilel».

Jin chaʼan, mi mach jiñic miʼ coltañonla chaʼan wen mi la cajñel ti talto bʌ qʼuin cheʼ utsonla, ¿chuqui miʼ mejlel i coltañonla? Chaʼan miʼ mejlel lac ñaʼtan yom an lac chaʼan jumpʼejl laj coltʌntel muʼ bʌ i mejlel lac ñop, junchajp muʼ bʌ i yʌqʼueñonla i jacʼbal laj cʼajtiya tac yicʼot muʼ bʌ i pʌsbeñonla chuqui yom mi lac mel chaʼan wen mi la cajñel ti talto bʌ qʼuin. ¿Baqui miʼ mejlel lac taj jiñi?