Madamo gihapon nga tawo ang nagapati nga kon maayo ang ila ginahimo, mangin maayo man ang ila palaabuton. Gani nagatinguha sila nga magpakita sing respeto, sing maayo nga mga pamatasan, maghimo sang ila mga obligasyon, kag ginatinguhaan man nila nga mangin matinlo ang ila konsiensia. Ang babayi nga si Linh nga taga-Vietnam, nagsiling: “Nagapati gid ako nga kon honest ako kag sinsero, pakamaayuhon man ako.”

Ang iban naman nagahimo sing maayo bangod sa ginatudlo sang ila relihion. Ang lalaki nga si Hsu-Yun, nga taga-Taiwan, nagsiling, “Natun-an ko nga nagadepende sa mga ginahimo sang isa ka tawo subong kon bala mangin malipayon sia ukon magaantos sa tapos sang iya kamatayon.”

Matuod gid man nga kon maghimo kita sing kaayuhan sa iban, madamo kita sing mabaton nga benepisyo. Pero, madamo man nga tawo ang nakaeksperiensia nga bisan pa nagahimo sila sing maayo sa iban, may malain gihapon nga nagakatabo sa ila kabuhi. “Naeksperiensiahan ko gid nga bisan pa maghimo ka sing maayo, puede gihapon nga may malain nga matabo sa imo,” siling sang babayi nga si Shiu Ping, nga taga-Hong Kong. “Ginatinguhaan ko gid nga maghimo sing maayo sa iban kag ginaatipan ko gid ang akon pamilya. Pero nagbulagay kami gihapon sang akon bana kag ginbayaan niya ako kag ang amon bata nga lalaki.”

Nakita man sang madamo nga indi tanan nga relihioso nga tawo maayo. “Nagsulod ako sa isa ka relihion kag ako ang naga-organize sang activities para sa mga pamatan-on,” siling ni Etsuko, nga isa ka babayi nga taga-Japan. “Daw indi ako makapati nga ang iban nga miembro sang akon relihion mga imoral, nagaagaway sa puesto, kag ginakawat nila ang pondo.”

Ang iban naman nga debotado gid nagalalain kay pamatyag nila wala sing pulos ang ila paghimo sing maayo. Amo gid sina ang nabatyagan ni Van nga taga-Vietnam. “Kada adlaw, nagahalad ako sing mga prutas, bulak, kag pagkaon sa altar sang akon napatay na nga mga katigulangan kay nagapati ako nga kon himuon ko ini mangin maayo ang akon palaabuton,” siling niya. “Pero bisan pa sang tanan nga kaayuhan kag mga ritwal nga ginhimo ko sa sulod sang madamo nga tinuig, nagmasakit sing malubha ang akon bana. Dayon, ang akon bata nga babayi nga nagaeskwela sa iban nga pungsod, napatay.”

Kon ang paghimo sing maayo indi makagarantiya sang maayo nga palaabuton, ano gali ang makagarantiya? Para masabat ina nga pamangkot, kinahanglan naton sing masaligan nga giya nga makatudlo sa aton sang dapat naton himuon para mangin maayo ang aton palaabuton. Sa diin naton makita ina nga giya?