Mi tam tak chuan nungchang ṭha chu nakin hun muanawm tak neih nâna thil pawimawh tak angin an la thlîr reng a. Anni chuan zahawm taka mi dangte cheibâwltu nih te, nungchang ṭha neih te, mahni hmun chan hretu nih te, leh chhia leh ṭha hriatna thiang tak neih rengte an tum a ni. Vietnam rama awm Linh-i chuan, “Mi rinawm leh mi dik ka nih phawt chuan, malsâwmna ka dawng ngei ngei ang tih ka ring,” tiin a sawi.

Mi ṭhenkhat chuan an sakhaw thurinte avângin thil ṭha an ti a. Taiwan-a awm Hsu-Yun-a chuan, “Miin a dam laia thil ṭha a tih chuan, a thih hnuah malsâwmna chhiarsên loh a dawng ang a; thil ṭha lo a tih erawh chuan a thih hnuah hrehawm a tuar dâwn nia zirtîr ka ni,” tiin a sawi.

Mi dangte chunga thil ṭha kan tih hian kawng tam takin kan hlâwkpui tih chu a dik ngei mai. Mahse, mi dangte chunga rilru dik tak pu-a thil ṭha tih tumtu mi tam tak chuan an beisei angin thil a thleng reng lo tih an hmu a ni. Hong Kong-a awm Shiu Ping-i chuan, “Thil ṭha ti ṭhîntute chu malsâwmin an awm reng lo tih ka hre chiang hle. Ka chhûngte ngaihsak tûr leh an tâna thil ṭha tihsak tûrin theih tâwp ka chhuah a. Mahse, kan inneihna chu a hlawhchham a, ka pasal chuan kei leh kan fapa chu min chhuahsan a ni,” tiin a sawi.

Mi tam tak chuan sakhuain mite chu mi ṭha zâwk a nihtîr reng lo tih an hria a. Japan rama awm Etsuko-i chuan, “Sakhaw thiltihnaahte ka tel ṭhin avângin, ṭhalaite thiltihnaah huaihawttu ka ni chho va. Mahse, ka sakhaw vawnpuite zînga ṭhenkhat chu nungchang bawlhhlawhnaah te, thuneihna inchuhnaah te, leh dik lo taka thawhlâwm hmannaahte an inhnamhnawih tih ka hmuh hian mak ka ti hle,” tiin a sawi.

Sakhaw mi tak leh thil ṭha tih tum tlattu mi ṭhenkhat chu an chunga thil ṭha lote a lo thlen hian an lunghnual hle a. Vietnam rama awm Van-i chuan a chungah chutiang chuan a thleng niin a hria. Ani chuan, “Nakin huna malsâwmna tam tak dawn inbeiseiin, thei rah te, pangpâr te, leh ei tûrte leiin, thlahtu thi tawhte maichâmah nî tin ka hlân ṭhîn a. Chutiang chuan kum tam tak chhûng thil ṭhate tiin, sawkhaw serh leh sângte ti ṭhîn mah ila, ka pasal chuan natna râpthlâk tak a vei a. Chu bâkah, ka fanu chuan ram danga lehkha a zir laiin, kum naupang tê niin min boralsan bawk a ni,” tiin a sawi.

Mi ṭha nihnain nakin hun muanawm tak min neihtîr thei lo a nih chuan, engin nge min neihtîr thei ta ang? Chu zawhna chhâng thei tûr chuan, kan zawhnate chhâng theitu leh nakin hun muanawm tak min neihtîr theitu kaihruaitu rin tlâk kan mamawh a ni. Chutiang kaihruaitu rin tlâk chu khawiah nge kan hmuh theih ang?