Neb wʋsg tagsdame tɩ b sã n tar manesem sẽn yaa sõma la b beoog na n yɩ neere. Rẽ n so tɩ b modgd n sõngd b taabã, n bɩɩsd zʋg-sõma, n sak n deeg tɩ ned fãa tara a sẽn tog n maan vɩɩmã pʋgẽ, la b modgdẽ n tar sũur-kaset sẽn yaa sõma. Pag a ye sẽn be Viɛtnam ta yʋʋr boond t’a Linn yeelame: “M da tẽedame tɩ m sã n yaa pʋ-peelem soaba, rẽ la m vɩɩmã na n tall barka.”

Neb kẽer modgdame n maand sẽn yaa sõma, b tũudmã sẽn sagend-b tɩ b maan rẽ wã yĩnga. Rao a ye sẽn be Taiwan t’a yʋʋr boond t’a Suyun yeelame: “Mam da tẽedame tɩ ned sã n maan sẽn yaa sõma, a kũumã poore a vɩɩmã na n yɩɩ noogo, la t’a sã n maan sẽn yaa wẽnga, a kũumã poore a na n kẽe bug-tẽnga.”

Yaa sɩd tɩ d sã n maand d taabã neere, nafd-d-la wʋsgo. La neb wʋsg sẽn modgd ne b sũy fãa n maand b taabã neer yãame tɩ naoor wʋsgo, b pa paamd tɩ b maan-b neer n lebs ye. Pag a ye sẽn be Hõng Kõng t’a yʋʋr boond t’a Shiu Pin yeelame: “Bũmb ning sẽn maan m vɩɩmã pʋgẽ wã kɩtame tɩ m bãng tɩ pa wakat fãa la sẽn maand-b b taabã neerã paamd tɩ b maan-b neer n lebs ye. M da maanda m sẽn tõe fãa n get m zakã rãmb yelle, la m maand sẽn yaa sõma. Baa ne rẽ, mam sɩdã wa n daaga maam ne m bi-riblã n base.”

Neb wʋsg wa n bãngame tɩ pa wakat fãa la tũudmã sõngd ned t’a lebg nin-sõng ye. Pag a ye sẽn be Zapõ t’a yʋʋr boond t’a Ɛtsuko yeelame: “Mam kẽe tũudum a ye pʋgẽ, n da sigind tʋʋm kẽer kom-bɩɩsã yĩnga. Tũudmã nebã ra yoodame, b ra wagsda taaba, la b zuud egiliizã ligd menga. Woto sãama m sũur wʋsgo.”

Neb kẽer sẽn yaa wẽn-tũudba, la sẽn modgd n maand b taabã neer sũy sãamame, yel-beed sẽn baas n paam-bã yĩnga. Yɩɩ woto ne pag a ye sẽn yit Viɛtnam t’a yʋʋr boond t’a Van. Ad a sẽn yeele: “Daar fãa, mam da raada tɩɩs biisi, fɩlɛɛr-dãmba, la rɩɩbo, n tɩ rʋʋgd tẽn-kugã zug n na n kõ m yaab-rãmbã sẽn ki wã, n tagsdẽ tɩ rẽ n na n kɩt tɩ m beoog yɩ neere. La baa ne m sẽn da maand nebã neer la m maand tũudmã yel-maandɩ kãensã fãa na maan yʋʋm wʋsgã, bã-kɛgeng n yõk m sɩdã. Rẽ poore, m bi-pugl sẽn da be tẽn-zẽng n karemdẽ n maan kaalem.”

Modg n yɩ nin-sõng sã n pa tõe n kɩt tɩ ned beoog yɩ neere, dẽnd yaa bõe n tõe n kɩt tɩ ned beoog yɩ neere? Sẽn na yɩl n paam sok-kãngã leoore, d segd n paama kibay sẽn yaa sɩda, sẽn tõe n sõng-d tɩ d paam d sogsgã leoore, la sõng-d tɩ d bãng d sẽn tog maan n paam tɩ d beoog yɩ neere. Yɛ la d tõe n paam kiba-kãense?