Vavengi kasi va tsiliela ngecize, ku pua muntu ua cili likelio lihungu lia ku yoya muono ua ndzolela ku lutue. Ngeci ve ku lihakela kapandi ka ku pua vakua kasingimiko, vakua vilinga via cili, ku tantekeya cihela cavo muimbo, kaha na ku kala na mutima ua cili. Linh, umo mpuevo ua ku Vietnam ngueni: “Nja tsilielele ngecize nga nji pua mukua vusunga ntsimbu yose, kaha nji ka pua muntu ua ku vezika.”

Vakuavo co ve ku va longesa ku pua vantu va cili ku malombelo avo. Hsu-Yun, umo yala ua ku Taiwan ngueni: “Va nji longesele ngecize nga muntu a pua mukua vilinga via cili, kaha a ka yoya mu ndzolela mu nima ya ku-tsa, nga kuahi co a ka yanda.”

Ku linga via cili ku vakuetu ce ku tu kuasa mu vinjila via vingi. Vunoni vavengi ve ku lihakela kapandi ka ku linga via cili ku vakuavo, ve ku nongonona ngecize viuma vi ve ku lavelela ku vakuavo kati vikevio vie ku soloka. Kaha Shiu Ping, umo mpuevo ua ku Hong Kong ngueni: “Nja limuenenene ngecize ku linga via cili ka ce ku neha vivezikiso ntsimbu yose.” Ivene ngueni: “Nja lihakelele kapandi ka kama ka ku niunga vusoko vuange na ku linga via cili. Vunoni vulo vuange ka vua simbuile, kaha yaliange ua nji tavekele na muana.”

Vantu vavengi va mona ngecize malombelo ka eku kuasa vantu ku pua vakua vilinga via cili. Etsuko umo mpuevo ua ku Japão ngueni: “Nja likovelesele mu vumo vulombelo na ku pua ntuamena ua vakuendze. Nja lisimuokele ku mona vilinga via ku vihia, ku luila vituamo, na ku punda milambu, ci va kele na ku linga vantu va mu vulombelo vuaco.”

Vamo va lihaka cikuma mu via Njambi na ku pua vantu va cili, va futuka ku mitima mu ku mona ngecize kapandi ka ve ku lihakela nou ue ku ka haka seho uahi. Evi vikevio via lihitile navio Van, umo mpuevo ua ku Vietnam. Ivene ngueni: “Matangua ose nja kele na ku tuala vusuka, vintemo na via-ku-lia, nji ka kombeleye ha mitula ya vakulu vange, mu ku lavelela ngecize nji ka pua muntu ua ku vezika ku lutue. Vutuhu nja lihakelele kapandi ka kama ka ku pua muntu ua cili, na ku linga vikombelo mu miaka ya ingi, yaliange ua putukile ku vavala limusongo lia kama. Kaha naua omo muanange ua mpuevo ua kele na ku lilongesela ku cifuti ceka, ua tsililileko tele a ci li muhumbe.”

Nga ku pua muntu ua cili ka ca puile luvula lua ku yoya muono ua cili ku lutue amba luvula luaco lua pua luka? Linga tu kumbulule eci cihula tua tondeka ndundzi ya cili ize i hasa ku tu tuamenena, ku kumbulula vihula vietu via seho na ku tu lekesa cifua ci tua pande ku yoyelamo, linga tu ka hete ku muono ua cili ku lutue. Kulihi honi tu hasa ku uana ku tuamenena caco?