Batho ba bantši ba dumela gore, ge ba itshwara gabotse, ba hlompha ba bangwe, ba phetha boikarabelo bja bona ka lapeng le setšhabeng e bile ba na le letswalo le le botse gona ba tla ba le bokamoso bjo bokaone. Mosadi yo mongwe yo a dulago Vietnam o re, “Ke dumela gore ge nkabe ke tshepega, ke be ke tla thabela bophelo.”

Ka ge batho ba bangwe ba dumela dilo tše itšego, seo se dira gore ba sware ba bangwe gabotse. Monna yo a dulago Taiwan, o re, “Ke rutilwe gore ge motho a dira dilo tše di botse a sa phela o tla thabela bophelo ka morago ga ge a hwile, eupša ge a be a dira dilo tše mpe, gona o tla tlaišega.”

Ke nnete gore ge re swara batho ba bangwe ka botho re a holega. Lega go le bjalo, batho bao ba lekago go bontšha ba bangwe botho ba lemogile gore bona ga bake ba swarwa gabotse. Shiu Ping yo a dulago Hong Kong, o re. “Dilo tšeo di ntiragaletšego di nthutile gore batho bao ba bontšhago ba bangwe botho ga bake ba swarwa gabotse. Ke ile ka leka ka thata go hlokomela lapa laka le go dira dilo tše di botse. Eupša lapa la ka le ile la thubega gomme monna wa ka a sepela a ntlogela ka šala le morwa wa rena.”

Batho ba bantši ba lemogile gore ga se batho ka moka bao ba tsenago kereke ba swarago batho ba bangwe gabotse. Etsuko yo a dulago Japane o re. “Ke ile ka ba setho sa kereke e itšego, ke moka ka thoma go rulaganya mediro yeo e bego e dirwa ke bafsa ba kereke yeo. Ke be ke maketše kudu ge ke bona dilo tšeo di bego di direga kerekeng yeo, ka gore ba bangwe ba be ba itshwere gampe, ba lwela bolaodi e bile ba diriša tšhelete ya kereke gampe.”

Ba bangwe bao ba ratago bodumedi le go leka go dira dilo tše di botse, ba nyamišwa ke go bona dilo tše mpe di ba diragalela. Mosadi yo mongwe yo a tšwago Vietnam, o ile a ikwa ka tsela yeo. O ile a re, “Ka mehla ke be ke reka dienywa le matšoba e bile ke iša le dijo aletareng ya badimo ba gešo, ke be ke tshepa gore ke tla hwetša ditšhegofatšo nakong e tlago. Le ge ke ile ka dira dilo tšeo ka mengwaga e mentši monna wa ka o ile a lwala kudu, morwedi wa ka a hlokofala ge a be a le sekolong nageng e nngwe.”

Ge e ba go ba botho go sa dire gore o be le bokamoso bjo bobotse, gona ke eng seo se ka go thušago gore o be le bjona? A re boneng gore re ka hwetša kae karabo ya potšišo ye le tše dingwe tšeo o ka bago o ipotšiša tšona.