Ngimba Ukuya Mundu Nnunu Kubaghile Ukubapangisya Ukuti Musabwaghe Ubumi Ubununu Ubwa Nkyeni?
Kwa fyinja fingi, abandu bingi bikuketa ukuti ukuya mundu nnunu ko kubaghile ukumpangisya ukuti asabwaghe ubumi ubununu nkyeni. Mwakifwanikisyo, abandu bingi ku Asia bikukolelana na isi umundu umfumuke uyu ingamu yake yo Confucius ayobile. Umwene atile: “Isi mutikulonda ukuti abangi bababombeleghe nanumwe mungababombelagha.”
ABANDU BINGI BIKUGHELAGHELA UKUBOMBA INUNU
Abandu bingi bikusubila ukuti linga bikunangisya akayilo akanunu bikuya pakuya nu bumi ubununu ubwa nkyeni. Abene bikughelaghela ukunangisya ulughindiko, akayilo akanunu, ulutengano nukuya na mabyebye amanunu. Linh unkikulu wa ku Vietnam atile “Utubalilo tosa nasubilagha ukuti linga ndinsubiliwa nayagha pakuya nu bumi ubununu.”
Bamo bikughelaghela ukubomba inunu panongwa ya isi bikusubila mu tchalichi lyabo. Umundu yumo uyu ingamu yake yo Hsu-Yun uyu ikwikala ku Taiwan, atile, “Namanyile ukuti linga umundu ikubomba ifindu ifinunu umwene ikuya walusekelo linga afwile loli linga ikubomba ifindu ifibibi, umwene ikutamiwa.”
NGIMBA IFYAKUKONGAPO FYAKE FYO FILIKU?
Bwanaloli ukuti linga tukubabombela abangi ifindu ifinunu, tukusayiwa fiyo. Loli abandu bingi aba bikughelaghela ukubabombela abangi ifindu ifinunu abene bikuketa ukuti utubalilo twingi abangi batikubabombela kanunu. Shiu Ping uyu ikwikala ku Hong Kong atile, “Namanyile ukufuma ku isi nalyaghene nasyo ukuti bosa aba bikubomba inunu utubalilo twingi bikusayiwa. Naghelaghelagha ukuyipwelelela imbumba yangu nukubomba inunu. Loli ubweghi bwamalike kangi undume wangu alindekile une numwanangu unnyambala.”
Abandu bingi bikuketa ukuti bakaya bosa aba bikwiputa aba bikubomba inunu. Etsuko unkikulu uyu ikwikala ku Japan atile, “Nalingile itchalichi limo kangi nabalongosyagha abakilumyana. Loli naswighile fiyo bo nguketa abandu bamo aba babombagha utuyilo utubibi.”
SHIU PING uwa ku HONG atile, “Naghelaghelagha ukuyipwelelela imbumba yangu nukubomba inunu. Loli ubweghi bwamalike kangi undume wangu alindekile une numwanangu unnyambala.”
Bamo aba bikwiputa kangi bikughelaghela ukubomba inunu, bikusulumania linga abandu bamo bababombile ifindu ifibibi. Momuno Van unkikulu uwa ku Vietnam, alipilikile. Umwene atile, “lsiku lililyosa nulagha iseke, amaluba ni fyakulya kangi nabikagha pamapumba gha bandu aba bafwile, nasubilagha ukuti nisakuhobokagha nkyeni. “Nalinga ukuti nabombile inunu syosa isi kwa fyinja fingi, undume wangu abinile fiyo. Ukufuma apo, umwanangu undindwana uyu amanyilagha isukulu ku kisu ikingi afwile.”
Linga ukuya mundu nnunu kukaya kwakufwana ukuti umundu asabwaghe ubumi ubununu nkyeni, po ngimba findu fiki fikulondiwa? Ukuti twamule ilalusyo ili, tukulondiwa ukumanya ifundo isi sibaghile ukututula ukumwagha ansala uwa malalusyo ghitu, isi sibaghile ukututula ukuti tusabwaghe ubumi ubununu nkyeni. Ngimba tubaghile ukusyagha kughu ifundo isi?
Lumo Mubaghile Ukulonda Ukumanya Isya Nkhani iyi
AMALALUSYO AGHA IBAIBOLO LIKWAMULA
Ngimba Ululaghilo Ulwakuti isi Mukulonda Ukuti Abandu Bababombeleghe syo Mubabombeleghe Sisyo Nanumwe Lukusanusya Isyafiki?
Pakubika ululaghilo ulu, Yesu asanusyagha isi tukulondiwa ukubabombela abandu bosa ukongelelapo abalughu bitu.
