A Bo Dungil Chad e Ngmo Oterekeklii a Ungil Klengar el Kired?
Rebetok el chad er a chelsel aika el betok el rak oumerang el kmo a bo lungil a blekerdelir e ngoterekeklii a ungil el klengar el kirir. El ua tiang, a rebetok el chad er a Asia a kmal loumerang a tekingel a merael a chisel chad e sensei el Confucius (551-479 B.C.E.) el kmo: “Aike el diak el soam a loruul a rechad el mo er kau lak moruul el mora rechad.” *
ULDASU EL BETOK A OLTIRAKL ER NGII
A rebetok a oumerang el kmo a lsekum e ngmo ungil a blekerdeled e ngmo ungil a klengar er kid. Te olecholt omengull el mora rechad, omekeroul a ungil blekeradel, meruul a ngerechelir, e melemolem el klikiid a ukltkir. A redil er a Vietnam el Linh a melekoi el kmo, “Ak kmal uluumerang el kmo a lsekum ngmelemalt a omerellek e ngmo ungil a klengar er ngak.”
A rekuk bebil a meruul a ungil e le ngklaumerang er tir er a klechelid er tir a uchul. A chad er a Taiwan el Hsu-Yun a kmo, “Ak mlosisechakl el kmo a omerellel a chad er a lengar a mo oterekeklii el kmo ngmo ungil a klengar er ngii er a uriul er a kodall me a lechub e ngmo chuarm el diak a ulebengelel.”
NGMERA EL UAISEI?
Ngklemerang el kmo sel doruul a ungil el mora rebebil e kede ngmai a betok el klungiaol. Me nguaisei engdi a rebetok el kmal melasem el meruul a ungil el mora rebebil a metik el kmo a rechad a diak leblechoel el meruul a ungil el mo er tir. A redil er a Hong Kong el Shiu Ping a kmo, “Ak mlo suubii el kmo tirke el meruul a ungil a diak leblechoel el ngmai a ungil. Ak kmal mlora tkurrebab el sebechek el mengetmokl er a telungalek er ngak e meruul a ungil. Engdi a chebechiielek a miltemall me a bechik a chilitak ngak me a ngelekam el sechal.”
A rebetok a mla mesa el kmo a klechelid a diak leblechoel el rulleterir a rechad el mo ungil chad. A Etsuko el redil er a Siabal a kmo, “Ak mlo teloi er a cheldebechel er a klechelid e ulemuchel el organize a activity el kirir a rengeasek. Ngkmal mlo mechas a renguk e le kmilsa el kmo te ngar ngii a rebebil chad er a klechelid el mirruul a deleboes, mle kaisichai el kirel a klisiich, e ulumulak e ousbech a udoud er a ikelesia.”
“Ak kmal mlora tkurrebab el sebechek el mengetmokl er a telungalek er ngak e meruul a ungil. Engdi a chebechiielek a miltemall me a bechik a chilitak ngak me a ngelekam el sechal.”—SHIU PING, HONG KONG
A rebebil el kmal mle blak a rengrir er a klechelid er tir a kmal mekngit a rengrir le te kmal meruul a ungil engdi ngdi duubech a mekngit el mo er tir. Tiakid a blo lomelechesiu er ngii a Van el redil er a Vietnam. Ngmelekoi el kmo: “Ngmle bek el sils el kulab a rodech, bung, me a kall el mo oldars er a olengetongel er a rebeldekek, el omeltkek a kmo ak mo ngmai a klengeltengat er a ngar medak. Malta ngkmal mle blak a renguk el meruul er tiang e mirruul a ungil el betok el rak, engdi bechik a kmal mlo smecher. E a ngelekek el kmal dirk mle kekerei el redil a mlad er a lengar er a skuul er a ngodech el beluu.”
Me a lsekum a bo dungil el chad a diak loterekeklii a klengar er a ngar medad, e ngera sebechel? Kede ousbech er a tekoi el sebeched loumerang er ngii, el sebechel longer a kerid e mekrolid el mora melemalt el rael. Tia kede metik er ngii er ker?
^ par. 2 A lsoam a komakai el omesodel a osisecheklel a Confucius e momes er a 7 el bliongel er a Mankind’s Search for God er a parakurab 31-35 el ngii a book el lultebedii a Resioning er a Jehovah e sebechem el metik er ngii er a www.pr418.com.
