Rieekjt daut too, een gooda Mensch to sennen?
Fa hundade Joaren haben Menschen aul emma jejleeft, see wudden een scheenet Läwen haben, wan see goode Menschen wieren. Toom Biespel achten se en Asien sea opp dän Liera Konfuzius, waut ojjefäa 2500 Joa trigj läwd. Hee lieed: “Waut du nich west, waut Menschen die doonen sellen, daut doo du dee uk nich.” *
WAUT VÄLE DOONEN
Vondoag dän Dach jleewen noch väle, daut see een scheenet Läwen haben woaren, wan see goode Menschen sent. Dee proowen aundre met Respakjt to behaundlen, sikj goot to benämen, een goodet Jewessen to haben un hoolen aundre äa Rajcht em Denkj. Eene Fru von Vietnam sajcht: “Ekj docht emma, wan ekj wudd een gooda un opprechtja Mensch sennen, wudd mie daut waut goodet brinjen.”
Eenje proowen uk goode Menschen to sennen wäajen äaren Gloowen. Een Maun en Taiwan sajcht: “Mie wort jelieet, daut doano, woo eene Persoon nu läft, woat dee no sienen Doot entwäda emma schaftich sennen ooda fa emma lieden motten.”
WAUT KJEMT DOABIE RUT?
Een gooda Mensch to sennen un aundre to halpen, daut kjemt eenem foaken togood. Oba väle, waut daut proowden, haben nich daut jekjräajen, waut see dochten. “Ekj hab selfst beläft, daut eena nich emma goodet trigjkjricht, wan eena uk een gooda Mensch es. Ekj proowd, soo goot aus ekj kunn fa mie un miene Famielje opptokomen un goodet to doonen. Oba onse Ehe jinkj kaputt un mien Maun veleet mie un mienen Sän”, sajcht Shiu Ping, eene Fru en Hong-Kong.
Väle haben uk jeseenen, daut nich aule, waut to eenen Gloowen jehieren, bätre Menschen sent. Etsuko, eene Fru en Jaupaun, sajcht: “Ekj jinkj bie eene Kjoakj bie un wort doa äwa de junge Menschen aunjestalt. Ekj kunn daut nich jleewen, waut von schwienschet Läwen eenje doa fieeden, woo dee omzajcht proowden mea Macht to kjrieen un woo orrajcht dee de Kjoakj äa Jelt brukten.”
“Ekj proowd, soo goot aus ekj kunn fa mie un miene Famielje opptokomen un goodet to doonen. Oba onse Ehe jinkj kaputt un mien Maun veleet mie un mienen Sän.” (SHIU PING, HONG-KONG)
Eenje, waut sikj sea aunstrenjen fa äaren Gloowen un proowen goodet to doonen, feelen sikj aunjeschmäat, wan see seenen, woo väl schlajchtet see beläwen. Dit beläwd eene Fru von Vietnam. See sajcht: “Jieda Dach koft ekj Bloomen, Frucht un Äten un sad daut biem Aultoa von mien vestorwnet Frintschoft han, doaropp daut ekj wudd waut goodet beläwen. Fa Joaren strenjd ekj mie aun, goodet to doonen un de Jewanheiten en miene Relijion notokomen. Oba mie Maun wort sea krank un miene Dochta storf gaunz junk, aus see em Utlaunt studieed.”
Wan daut nich aules es, een gooda Mensch sennen, waut es daut dan, waut eenem fält, om een scheenet Läwen to kjrieen? Daut jeft eene Help, opp dee to vetruen es un wuaderch wie weeten kjennen, woo wie een scheenet Läwen kjrieen kjennen. Wua finjt eena dise Help?
^ Varsch 2 Om noch mea ruttofinjen äwa dän Konfuzius siene Lieren, see daut Buak Die Suche der Menschheit nach Gott, Kapitel 7, Varsch 31-35. Rutjejäft von Jehova siene Zeijen un es uk opp www.pr418.com to finjen.
Veleicht jleichst du uk dit
WOAT WAKA!
Weeten, waut goot un schlajcht es
Wan jie june Kjinja lieren, waut goot un schlajcht es, woat dee daut sea halpen fa lota.
