Eskê ti duti mbeni nzoni zo la asara si gigi ti mo ti kekereke aga nzoni?
Teti angu ngbangbo mingi, mingi ti azo apensé so ti duti mbeni nzoni zo la ayeke sara si gigi ti mo ti kekereke aga nzoni. Na tapande, azo ti mbage ti Asie abâ na nene ni mingi tënë so Confucius, mbeni wandara nga wafango ye (551-479 K.N.E) atene: “Ye so mo ye ti tene azo asara na mo ape, mo sara ni na ala ape.” *
YE SO MINGI TI AZO AYEKE SARA
Mingi ti azo amä na bê so nzoni sarango ye la ayeke sara si gigi ti ala ti kekereke aga nzoni. Ala gi ti ne azo, ti duti na anzoni sarango ye, ti hinga place ti ala na yâ ti aye nde nde nga ti duti na nzoni conscience. Linh, mbeni wali na Vietnam, atene: “Mbi mä na bê lani so tongana mbi sara ye na lege ni nga na nzoni bê, mbi yeke wara tufa na peko ni.”
Ambeni agi ti sara ye ti nzoni ndali ti aye so ala mä na bê na ni. Hsu-Yun, mbeni koli na Taïwan, atene: “A fa lani na mbi so tongana mbeni zo asara ye ti nzoni, lo yeke duti ande na ngia na peko ti kuâ ti lo, me tongana lo sara aye ti sioni, lo yeke bâ ande pasi.”
ESKÊ TI DUTI MBENI NZONI ZO AYEKE GA NA AYE TI NZONI NA PEKO NI?
A yeke vrai so tongana e sara nzoni na azo, e yeke duti na ngia mingi. Me, mingi ti azo so agi ti sara ye ti nzoni na azo aga ti bâ so azo ni ayeke sara ye ti nzoni na ala na pekoni ape. Shiu Ping, mbeni wali na Hong Kong, atene: “Mbi wani mbi bâ so, azo so asara ye ti nzoni na azo, a yeke sara ye ti nzoni na ala na peko ni ape. Mbi sara kue ti bâ lege ti azo ti sewa ti mbi nga ti sara ye ti nzoni na azo. Me, yâ ti mariage ti mbi abuba nga koli ti mbi adö mbi na molenge ti mbi ti koli azia.”
Mingi ti azo abâ so azo ti abungbi ti Nzapa kue la ayeke anzoni zo ape. Etsuko, mbeni wali na Japon, atene: “Mbi gue lani na mbeni bungbi ti nzapa na mbi ga zo so ayeke bâ ndo na ndö ti akua so amaseka ayeke sara. Bê ti mbi ason lani ti bâ asioni sarango ye, ala yeke gbugburu kota ndo nga ala yeke sara ye na lege ni ape na nginza ti bungbi ni.”
“Mbi sara kue ti bâ lege ti azo ti sewa ti mbi nga ti sara ye ti nzoni na azo. Me, yâ ti mariage ti mbi abuba nga koli ti mbi adö mbi na molenge ti mbi ti koli azia.”—SHIU PING, NA HONG KONG
Bê ti ambeni wamabe ni ason ndali ti so ala sara aye ti nzoni, me aye ti sioni ayeke si na ala. A yeke même pensé so Van, mbeni wali na Vietnam, ayeke lani na ni. Lo tene: “Lâ oko oko mbi yeke vo lani alê ti keke, afleur nga na kobe ti mû na sandaga na akotara ti mbi so akui ti tene ala sara tufa na ndö ti mbi. Atâa aye ti nzoni kue so mbi sara na azo nga na akotara ti mbi teti angu mingi, terê ti koli ti mbi ason lani ngangu. Na pekoni, molenge ti mbi ti wali ti ngu bale-use so amanda mbeti na kodro-wande akui.”
Ti tene gigi ti mbeni zo aga nzoni, nyen la lo peut ti sara? Ti kiri tënë na hunda so, e bezoin ti wara mbeni nzoni fango lege so alondo na mbeni ndo so e sara confiance na ni so apeut ti kiri tënë na ahunda ti e na ndö ti nzoni gigi ti kekereke. Na ndo wa la e peut ti wara nzoni fango lege so?
^ par. 2 Ti wara asango mingi na ndö ti ye so Confucius afa, bâ buku L’humanité à la recherche de Dieu, chapitre 7, paragraphe 31-35, so aTémoin ti Jéhovah asigi na ni na a yeke nga na ndö ti www.pr418.com.
Bâ nga
ZINGO NA LANGO!
Fa na lo ti duti na anzoni sarango ye
Tongana mo fa na amolenge ti mo ti duti na anzoni sarango ye, a yeke aidé ande ala mingi tongana ala kono.
BIBLE ATENE TI LO NYEN
Jésus atene e sara ye na azo tongana nyen?
Na temps so Jésus asara lani tënë so, lo sara gï pëpe tënë ti sarango ye na mbage ti ambeni zo, me nga na awato ti e.
TOUR TI BA NDO
Asioni ye ayeke si ka na anzoni zo: Ngbanga ti nyen?
Bible afa ye ota so ayeke gunda ti pasi ti azo.
