Dancha Mancho Ikka Albillitte Teense Heeꞌnanni Gede Assitanno?
Hundinni kayise batinyu manni, danchanna sirnyaataamo mancho ikka albillitte teense heeꞌnanni gede assitanno yee ammananno. Lawishshaho, batinyu Iisiyu manni maccaha ikkinohu Konfiyushesi yinanni egennaami (551-479 K.A.) coyiꞌrinore ayirrisanno; isi togo yiino: “Mannu assahera hasiꞌrattokki coye, atino woleho assitooti.”
BATINYU MANNI ASSANNORE
Duuchu manni, danchu amanyooti heeꞌrinkero albillitte teense dancha heeshsho heeꞌneemmo yee ammananno. Hakko daafira insa manna ayirrisate, dancha amanyoote leellishate, dagooma kaaꞌlannore assatenna danchu tiiꞌꞌinni heeꞌrate sharramanno. Linii yinanniti Veetinaamete gobbara heedhanno mancho, “Ammanamoommatanna giddo keeraancho ikkummaro, maassameemma yee ammanoomma” yitino.
Mitootu danchare assate kaꞌannohu ammaꞌnonsanni kainohunniiti. Shuyuni yinannihu Tayiwaanete heeꞌranno manchi togo yiino: “Mittu manchi lubbote noo woyite assannori, reyihu gedensaanni hegerera hagiidhanni heeꞌranno gede woy qarramanni heeꞌranno gede assannosi yine rosiinsoonnie.”
TINI ABBITINO GUMI MAATI?
Woleho danchare assinummoro, lowo horo afiꞌneemmoti egennantinote. Ikkollana, mannaho woꞌma giddonsanni danchare assannohu batinyu manni coyi insa hexxi gede ikkannokki woyiti noota wodanchino. Hongi Kongete heedhannoti Siyu Pingi yinanni mancho, “Wolootaho danchare assanno manni woꞌma woyite maassamannokkita umiꞌya heeshshonni laoomma” yitino. Ise ledde togo yitino: “Maateꞌya towaaxxatenna danchare assate danduummare baala assoomma. Ikkirono minaanniꞌya aneno qaaqqoꞌyano hune haꞌrinonke.”
Batinyu manni, ammaꞌno noonsa manni baalunku danchaho yaa ikkinokkita huwatino. Jaappaanete heedhannoti Isiko yinanni mancho togo yitino: “Mitte ammaꞌno widira hige, wedellootu pirogiraamensa qineessa hanafumma. Hatte ammaꞌno giddo noohu mitu manni foorannoha, silxaanete gaaramannoha, hattono beetekiristaanete woxe doogimale horoonsiꞌrannoha ikkinota afummati masoomma.”
“Maateꞌya towaaxxatenna danchare assate danduummare baala assoomma. Ikkirono minaanniꞌya aneno qaaqqoꞌyano hune haꞌrinonke.”—SIYU PINGI, HONGI KONGE
Ammanansara diinaggaawannohu mitu manni, danchare assanni heeꞌreenna bushu coyi tuncu yeennansa dadillino. Veetinaamete ilantinotera Vaanira hattoo coyi tuncu yiinose. Ise togo yitino: “Albillitte atootu noo heeshsho heeꞌreemma yee, albi annuwaꞌyara kakkallanni darga laalo, awawanna sagale barru baala masse kakkaleemma.” Ise ledde togo yitino: “Lowo diro danchare assanninna ammaꞌnote woga wonshanni keeshshoommaha ikkirono, minaannaꞌya buutote dhibbi amadi. Hakkiinni, qaaqqoꞌya wole gobbara roso rossara hadhinowa reyitino.”
Dancha mancho ikka callano teense heeꞌneemmo gede assitannonkekkiha ikkina, tennera kaaꞌlannonkehu qaru coyi maatiyya? Tenne xaꞌmora dawaro afiꞌrate, huluullitannonke xaꞌmuwara dawaro qolannonkehunna teense heeꞌnanni gara kulannonkehu addaxxinanni biddishshi hasiisannonke. Togoo biddishsha afiꞌra dandiineemmohu hiikkiinniiti?
