Xana Ku Va Munhu Lonene Swi Ta Endla U Va Ni Vumundzuku Lebyinene?
Ku ringana malembe yo tala, vo tala a va tibyela leswaku ku va ni mahanyelo lamanene a swi ta endla leswaku munhu a va ni vumundzuku lebyinene. Hi xikombiso, vanhu va le Asia a va xixima leswi vuriweke hi mutivi wa filosofi tlhelo mudyondzisi loyi a vuriwaka Confucius, loyi a nga te: “Leswi u nga laviki swi endliwa eka wena, u nga swi endli eka van’wana.” *
LESWI VO TALA VA SWI ENDLAKA
Vo tala va tshemba leswaku ku va ni mahanyelo lamanene swi ta va endla va va ni vumundzuku lebyinene. Va ringeta ku va ni ripfalo leri baseke, va xixima van’wana ni ku tikhoma kahle. Linh wansati wa le Vietnam u ri: “Mikarhi hinkwayo a ndzi tibyela leswaku loko ndzi tshembeka ni ku pfuna van’wana hi mbilu ya mina hinkwayo, a ndzi ta katekisiwa.”
Van’wana va dyondzisiwa hi vukhongeri bya vona ku endla leswinene. Wanuna wa le Taiwan loyi a vuriwaka Hsu-Yun, u ri: “A ndzi dyondzisiwe leswaku ndlela leyi munhu a hanyaka hayona sweswi, hi yona yi nga ta kombisa leswaku u ta tsaka kumbe a xaniseka loko a file.”
VUYELO BYA KONA HI BYIHI?
Ku endlela van’wana leswinene swi endla hi vuyeriwa. Kambe lava endlelaka van’wana leswinene va xiye leswaku mikarhi yin’wana a va khomiwi kahle. Wansati la vuriwaka Shiu Ping, la tshamaka eHong Kong u ri: “Ndzi tivonele hi ya mina leswaku lava endlaka leswinene a hi mikarhi hinkwayo swi va fambelaka kahle. A ndzi wa ndzi pfuka leswaku ndzi hlayisa ndyangu wa mina ni ku wu endlela leswinene. Kambe vukati bya mina a byi fambanga kahle naswona nuna wa mina u tsukule muti, a ndzi siya ni jaha ra mina.”
Vo tala va xiye leswaku a hi vanhu hinkwavo lava nghenaka kereke lava nga vanene. Etsuko wansati la tshamaka eJapani u ri: “Ndzi nghene kereke yin’wana ivi ndzi va mukongomisi wa mitirho ya vantshwa. A ndzi tsemeke nhlana loko ndzi vona leswaku vanhu van’wana ekerekeni yoleyo a va ri ni mahanyelo yo biha, va lwela swikhundlha va tlhela va tirhisa mali ya kereke hi ndlela yo biha.”
“A ndzi ringeta hi matimba leswaku ndzi hlayisa ndyangu wa mina ni ku wu endlela leswinene. Kambe vukati bya mina a byi fambanga kahle naswona nuna wa mina u tsukule muti, a ndzi siya ni jaha ra mina.”—SHIU PING, HONG KONG
Van’wana lava rhandzaka vukhongeri naswona va ringeteke ku endla swilo leswinene, va hele matimba loko va weriwa hi swilo swo biha. Yoleyo i ndlela leyi Van, wansati wa le Vietnam a titweke hayona. U ri: “Masiku hinkwawo a ndzi xava mihandzu, swiluva ni swakudya leswaku ndzi ta phahlela vakokwa wa mina lava feke hi ku tshemba leswaku ndzi ta kuma mikateko. Hambileswi a ndzi hanya hi ndlela leyinene ni ku endla leswinene ekerekeni ku ringana malembe yo tala, nuna wa mina u sungule ku vabya swinene. Endzhaku ka sweswo, n’wana wa mina wa nhwanyana u file loko a ri exikolweni etikweni rin’wana.”
Loko ku va munhu lonene swi nga byi tisi vumundzuku lebyinene, i yini leswi byi tisaka? Leswaku hi hlamula xivutiso lexi, hi lava nkongomiso wo tshembeka lowu nga hi pfunaka leswaku hi kota ku hlamula swivutiso leswi hi nga na swona mayelana ni vumundzuku lebyinene. Hi nga wu kuma kwihi nkongomiso lowu?
^ par. 2 Leswaku u kuma leswi engetelekeke mayelana nileswi Confucius a swi dyondziseke, vona ndzima 7, tindzimana 31-35 eka buku leyi nge, Ku Lavisisa Ka Vanhu Xikwembu, leyi kandziyisiweke hi Timbhoni ta Yehovha naswona yi kumekaka eka website ya www.pr418.com/ts.
U Nga Ha Tsakela
XALAMUKA!
Nkoka Wo Va Ni Mahanyelo Lamanene
Dyondzisa vana va wena mahanyelo lamanene lama nga ta va pfuna loko va kurile.
XIHONDZO XO RINDZA
Ha Yini Swilo Swo Biha Swi Humelela Vanhu Vo Lulama?
Bibele yi vulavula hi swilo swinharhu leswi vangelaka vanhu ku xaniseka.
