Kasi Kuŵa Waka Munthu Muwemi Kungawovwira Kuti Tizakasange Umoyo Uwemi Kunthazi?
Kwa vyaka vinandi, ŵanthu ŵanandi ŵakuwona kuti kuŵa munthu muwemi kweniso kuŵa na nkharo yiwemi kungawovwira kuti vinthu vizakaŵayendere makora munthazi. Mwachiyelezgero, ŵanthu ŵanandi ku Asia ŵakukolerana na ivyo Confucius (551-479 B.C.E.) wakayowoya. Iyo wakati: “Ivyo mukukhumba yayi kuti vichitikire imwe, mungaŵachitiranga yayi ŵanyinu.” *
IVYO ŴANANDI ŴAKUCHITA
Ŵanandi ŵakugomezga kuti kuŵa na nkharo yiwemi kungapangiska munthu kuti vinthu vizakamuyendere makora munthazi. Ŵakuyezgayezga kuŵa ŵantchindi, nkharo yiwemi, kufiska maudindo ghawo na kuŵa na njuŵi yiwemi. Linh wa ku Vietnam wakati, “Nyengo zose nkhagomezganga kuti para nkhuyowoya unenesko na kuchita vinthu mwaunenesko mbwenu niŵenge na umoyo uwemi.”
Ŵanyake ŵakuchita viwemi chifukwa ndivyo ŵakuphalirika ku chisopa chawo. Hsu-Yun, uyo wakukhala ku Taiwan, wakati, “Nkhasambizgika kuti viwemi ivyo ukuchita apo uchali wamoyo vikovwira kuti uzakaŵe wakukondwa para wafwa, kweni para ukuchita viheni uzamusuzgika muyirayira.”
KASI NTCHIVICHI CHACHITIKA?
Mbunenesko kuti pali viwemi vinandi ivyo tikusanga para tikuchitira ŵanji vinthu viwemi. Ndipouli, ŵanandi ŵawona kuti nanga ŵangachitira ŵanji viwemi, kweni ndivyo ŵanyawo ŵakuŵachitira yayi. Mwanakazi munyake zina lake Shiu uyo wakukhala ku Hong Kong wakuti: “Ine nasambirapo kuti ni nyengo zose yayi apo ŵanthu awo ŵakuchitira ŵanyawo viwemi ŵakutumbikika. Ine nkhayezgayezganga kupwelelera ŵa mu banja lakwithu na kuchita viwemi. Kweni nthengwa yane yikamara, mfumu wane wakanileka pamoza na mwana wane mwanalume.”
Ŵanthu ŵanandi ŵakuwona kuti ni nyengo zose yayi apo chisopa chikupangiska ŵanthu kuŵa ŵawemi. Mwanakazi munyake wa ku Japan zina lake Etsuko wakati: “Nkhanjira tchalitchi linyake ndipo ndine nkhadangiliranga pa vyakuchitika vyakupambanapambana vya ŵawukirano. Nkhazizwa chomene kuwona kuti ŵanthu ŵanyake mu tchalitchi ŵakaŵa na nkharo ziheni chomene, kulimbirana maudindo, kweniso ŵakagwiliskiranga ntchito mwambura kwenelera ndalama za tchalitchi.”
“Ine nkhayezgayezganga kupwelelera ŵa mu banja lakwithu na kuchita viwemi. Kweni nthengwa yane yikamara, mfumu wane wakanileka pamoza na mwana wane mwanalume.”—SHIU PING, HONG KONG
Ŵanthu ŵanyake awo mbakujipeleka pakusopa na kuyezga kuchita viwemi, ŵakukhuŵara para ŵanthu ŵakuŵachitira viheni. Ndimo Van uyo wakukhala ku Vietnam wakajipulikiranga. Iyo wakuti, “Zuŵa lililose nkhaguranga vipasi, maluŵa na chakurya na kuluta navyo pajotchero lakupelekerapo sembe ku ŵasekuru ŵane awo ŵali kufwa. Ndipo nkhagomezganga kuti nizamukondwa na kutumbikika munthazi.” Wakayowoyaso kuti: “Nangauli nkhachitanga vinthu viwemi kweniso nkhalondezganga maluso gha chisopa chane kwa vyaka vinandi, kweni mfumu wane wakalwara nthenda yiheni chomene ndiposo mwana wane wa vyaka 20 wakafwa, apo wakasambiranga ku charu chinyake.”
Usange kuŵa waka munthu muwemi nkhwakukwana yayi kuti munthu wazakasange umoyo uwemi munthazi, ipo kasi chikukhumbikwa ntchivichi? Kuti tisange zgoro la fumbo ili, tikwenera kusanga ulongozgi wanadi kweniso uwo ungatovwira kuti tizakaŵe na munthazi muwemi. Kasi tingawusanga nkhu?
^ ndime 2 Kuti mumanye ivyo Confucius wakasambizganga wonani mutu 7, ndime 31-35, mu buku la Mankind’s Search for God, lakupharazgika na Ŵakaboni ŵa Yehova kweniso likusangika pa webusayiti ya www.pr418.com.
Panji Mungatemwa Kuŵerengaso Nkhani Izi
WUKANI!
Nkharo Yiwemi
Para mwaŵasambizga nkharo yiwemi ŵana ŵinu vizamuŵawovwira kuti ŵachitenge makora vinthu para ŵakura.
MAFUMBO AGHO BAIBOLO LIKUZGORA
Kasi Dango Lakuti Muchitenge Ivyo Mukukhumba Kuti Ŵanyinu Ŵamuchitiraninge Likung’anamurachi?
Pakupeleka dango ili, Yesu wakayowoyanga za umo tikwenera kuchitira na ŵanthu wose kusazgapo na ŵalwani ŵithu wuwo.
GONGWE LA MULINDA
Cifukwa Wuli—Vinthu Viheni Vikucitikira Ŵanthu Ŵawemi?
Baibolo likuyowoya vinthu vitatu ivyo vikupangiska ŵanthu kusuzgika.
