Valua handi va tava okuti, oku lekisa ovituwa viwa, oyo osapi yoku kuata ekalo lia kolapo kovaso yoloneke. Ovo va seteka oku kala vakuesumbilo, oku lekisa ovituwa viwa, oku kuata elomboloko liocikele cavo kuenda oku amamako oku kuata owanji wutima wa yela. Ukãi umue o tukuiwa Linh, wo kofeka yo Vietname wa popia hati: “Tunde osimbu ndi tava okuti, nda nda kala ukuacili okuti, si limbika cimue, ndi kuata ekalo lia kolapo komuenyo.”

Omanu vamue va seteka oku linga ovina viwa omo lialongiso atavo avo. Ulume umue o tukuiwa Hsu-Yun, o kasi kofeka yo Taiwan, wa popia hati: “Nda longisiwa okuti, nda omunu umue wa enda oku linga ovina viwa, eci a fa o ka kuata esanju, pole, nda wa enda oku linga ovina vĩvi o ka talisiwa ohali noke liolofa viaye.”

Ocili okuti, nda tu lingila ovina viwa vakuetu, tu kuata esanju lialua. Kuenje omanu valua va seteka oku lingila vakuavo ovina viwa, va limbuka okuti, vapuluvi amue ka va va tiuwilile ndeci ovo va linga. Ukãi umue o tukuiwa Shiu Ping, o kasi kofeka yo Hong Kong wa popia hati: “Nda lilongisa okuti, vana va linga ovina viwa, ka va tiuwiyiwa lasumũlũho olonjanja viosi. Nda seteka oku likolisilako oku tata ciwa epata liange loku linga ovina viwa. Pole, olohuela viange via nyõleha, ulume wange wa ndi sia lomõla.”

Valua va limbuka okuti, omanu vakuetavo havosiko vawa. Ukãi umue o tukuiwa Etsuko, wo kofeka yo Japãu wa popia hati: “Nda likongela kocisoko cimue cetavo kuenje nda linga usongui wovopange amalẽhe. Nda yeva esumuo lialua poku mola ndomo omanu vetavo liaco va kala oku linga evĩho liukahonga, oku liyakela ovikele kuenda oku talavaya lãvi lolombongo vionembele.”

Vana va litumbika calua ketavo, haivo va linga ovina viwa, va siata oku sumua calua eci va limbuka okuti, ovilinga viavo viwa ka via kapiwileko. Eci oco ca pita la Van wo kofeka yo Vietname. Eye wa popia hati: “Oloneke viosi nda enda oku nena apako, olonelẽho, okulia, kuenje nda enda oku vi lumba kovotala a vakukululu yange va fa ale, lelavoko liokuti, kovaso yoloneke ndi ka sumũlũisiwa. Ndaño lovina vialua viwa kuenda ovihilahila vietavo nda enda oku linga vokuenda kuanyamo alua, ulume wange wa kala oku vela calua. Kuenje omõlange ufeko osimbu a kala oku tangela kofeka yikuavo, wa fa.”

Nda oku kala omunu uwa haicoko lika ci sukiliwa oco o kuate ekalo lia kolapo kovaso yoloneke, nye ci kuatisa oku kolapo? Oco ku tambuluiwe epulilo eli, tu sukila usongui umue wa koleliwa, ono yimue yalomboluilo yi pondola oku tambulula apulilo etu loku lekisa onjila yi tu ecelela oku kuata ekalo lia kolapo kovaso yoloneke. Pi tu sanga usongui waco?