Naa U Vha Muthu Wavhuḓi Zwi Ḓo Ita Uri Ni Vhe Na Vhumatshelo Havhuḓi?

TAMBANI

Lwa miṅwaha minzhi, vhathu vhanzhi vho vha vha tshi vhona u nga u vha muthu wavhuḓi ndi zwone zwine zwa ita uri u vhe na vhumatshelo havhuḓi. Sa tsumbo, vhathu vhanzhi vha ngei Asia vha tendelana na zwo ambiwaho nga muḓivhi wa pfunzo dza vhaṱali ane a pfi Confucius (551-479 B.C.E.) we a ri: “Ni songo ita vhaṅwe zwine na si ṱoḓe zwi tshi itwa kha inwi.” *

VHANZHI VHA ITA ZWITHU ZWAVHUḒI URI VHA VHE NA VHUMATSHELO HAVHUḒI

Vhathu vhanzhi vha tenda uri arali vha ḓifara zwavhuḓi, vha ḓo vha na vhumatshelo havhuḓi. Vha lingedza u ṱhonifha, u vha na mikhwa yavhuḓi, u ita zwine vha tea u ita na u dzula vhe na luvalo lwavhuḓi. Muṅwe mufumakadzi wa Vietnam ane a pfi Linh u ri: “Ndo vha ndi tshi vhona u nga arali nda fhulufhedzea, ndi ḓo fhaṱutshedzwa nga vhutshilo havhuḓi.”

Vhaṅwe vha ṱuṱuwedzwa uri vha ite zwithu zwavhuḓi nga vhurereli havho. Hsu-Yun ane a dzula Taiwan u ri: “Ndo gudiswa uri arali muthu a ita zwithu zwavhuḓi, u ḓo takala musi o no fa, fhedzi arali a ita zwivhi u ḓo tambula.”

NAA U ITA ZWITHU ZWAVHUḒI ZWI ITA URI U VHE NA VHUMATSHELO HAVHUḒI?

Ndi ngoho uri ri a vhuyelwa arali ri tshi itela vhaṅwe zwithu zwavhuḓi. Fhedzi vhaṅwe vhane vha lingedza u itela vhaṅwe zwithu zwavhuḓi, vha a zwi ṱhogomela uri vhone a vha farwi zwavhuḓi. Muṅwe mufumakadzi ane a pfi Shiu Ping wa Hong Kong u ri: “Ndo zwi vhona uri vhathu vhane vha itela vhaṅwe zwithu zwavhuḓi, kanzhi a vha vhuyelwi. Ndo lingedza nga nḓila dzoṱhe uri ndi ṱhogomele muṱa wanga na u ita zwithu zwavhuḓi, fhedzi munna wanga a nṱala a ntsia na ṅwana.”

Vhathu vhanzhi vho zwi vhona uri a si vhathu vhoṱhe vha dzhenaho kereke vha re vhavhuḓi. Muṅwe mufumakadzi ane a dzula Japan ane a pfi Etsuko u ri: “Ndo dzhena iṅwe kereke nda thoma u dzudzanya miṅwe mishumo ine ya itwa nga vhaswa kha yeneyo kereke. Ndo mangala ndi tshi vhona vhaṅwe vhathu kha yeneyo kereke vha tshi ḓifara luvhi, vha tshi lwela zwidulo na u shumisa tshelede ya kereke nga nḓila i si yavhuḓi.”

“Ndo lingedza nga nḓila dzoṱhe uri ndi ṱhogomele muṱa wanga na u ita zwithu zwavhuḓi, fhedzi munna wanga a nṱala a ntsia na ṅwana.”—SHIU PING wa HONG KONG

Vhaṅwe vhathu vha re kha vhurereli, vho lingedzaho u ita zwithu zwavhuḓi, vho kulea nungo musi hu tshi itea zwithu zwi si zwavhuḓi khavho. Van, mufumakadzi ane a bva Vietnam, o ḓipfa nga yeneyo nḓila. U ri: “Ḓuvha ḽiṅwe na ḽiṅwe ndo vha ndi tshi renga mitshelo, maluvha na zwiḽiwa nda zwi ṋekedza kha aḽeṱare dza vhafhasi, ndi tshi fhulufhela uri zwi ḓo nḓisela mashudu. Naho ndo ita zwithu zwinzhi zwavhuḓi na u fhedza miṅwaha minzhi ndi tshi khou tevhedza mikhuvha ya vhurereli, munna wanga o lwala na ṅwananyana wanga a mbo ḓi lovha musi e tshikoloni kha ḽiṅwe shango.”

NDI NGANI ZWI SONGO LINGANA U SOKOU VHA MUTHU WAVHUḒI?

U vha muthu wavhuḓi ndi zwa ndeme. Fhedzi a si zwone fhedzi zwine zwa ita uri ri vhe na vhumatshelo havhuḓi. Ndi ngani? Ṱhogomelani zwine Maṅwalo Makhethwa a ri vhudza zwone.

A SI VHATHU VHOṰHE VHANE VHA ITA ZWIVHUYA

“Muitazwivhi muthihi a nga tshinya zwithu zwinzhi zwavhuḓi.”—MUHUWELELI 9:18.

Naho na lingedza u vha muthu wavhuḓi, ni nga huvhadzwa nga zwine vhaṅwe vhathu vha zwi ita. Sa tsumbo, musi hu na dziedzi, inwi ni nga tevhedza zwine vhavhusi vha ri vhudza zwone na iledza u sendela tsini na vhaṅwe. Fhedzi hu nga itea mini arali vhaṅwe vha si zwi tevhedze? Vhuḓifari havho vhu nga lwadza vhane vha khou lingedza u ita zwo teaho.

VHAṄWE VHATHU VHA NGA VHONA U NGA TSHIṄWE TSHITHU NDI TSHAVHUḒI NGENO TSHI SI TSHAVHUḒI

“Hu na nḓila ine muthu a vhona yo luga, fhedzi i tshi isa lufuni.”—MIRERO 14:12.

Vhathu vhanzhi vho no ita zwithu zwe vha humbula uri ndi zwavhuḓi, fhedzi nga murahu vha zwi vhona uri zwo vha zwi si zwavhuḓi. Naho vho vhona u nga vha khou ita zwithu zwavhuḓi, vho tambula nge vha dzhia phetho dzi si dzavhuḓi.

ḼA MATSHELO ḼI ḒIHWA NGA AREḒI

“[A ni] ḓivhi uri hu ḓo itea mini kha inwi matshelo.”—YAKOBO 4:14.

Na muthu wavhuḓi a nga lovha zwi songo lavhelelwa. Sa tsumbo, tshifhingani tsha musi hu na dziedzi ḽa COVID-19, hu na vhanzhi vho lovhaho vha tshi khou lingedza u thusa vhaṅwe. Kana ṱhogomelani tsumbo ya Liting wa China we khotsi awe vha lovha kha khombo ya goloi. U ri: “Ndo vha ndi sa pfesesi uri ndi ngani muthu a re na vhuthu nga u rali o lovha. Khotsi anga vho vha vhe mushumi wa biko, vha tshi ḓiṱukufhadza nahone vhe muthu wavhuḓi, fhedzi ndi vhone fhedzi vhe vha lovha kha yeneyo khombo ya goloi.”

Arali u vha muthu wavhuḓi zwi sa iti uri ri vhe na vhumatshelo havhuḓi, ndi mini zwine zwa nga ita uri ri vhe na vhumatshelo havhuḓi? Uri ri kone u fhindula yeneyo mbudziso, ri tea u wana tshithu tshine ra nga tshi fhulufhela tshine tsha nga fhindula mbudziso dzashu na u ri sumbedza uri ri nga wana hani vhumatshelo havhuḓi. Ri nga tshi wana’fhi?

^ phar. 2 U itela u wana zwo engedzeaho nga ha zwe Confucius a zwi funza, vhalani bugu Mankind’s Search for God, kha ndima 7, dziphara 31-35. Heyi bugu yo gandiswa nga Ṱhanzi dza Yehova nahone i a wanala kha www.pr418.com.

Ṱhanzi dza Yehova

Naa U Vha Muthu Wavhuḓi Zwi Ḓo Ita Uri Ni Vhe Na Vhumatshelo Havhuḓi?

VHANZHI VHA ITA ZWITHU ZWAVHUḒI URI VHA VHE NA VHUMATSHELO HAVHUḒI

NAA U ITA ZWITHU ZWAVHUḒI ZWI ITA URI U VHE NA VHUMATSHELO HAVHUḒI?

You May Also Like

Ndi Ngani Vhuḓifari Vhu Ha Ndeme