Ufayssiyaa Deˈuwaa Deˈanawu Loˈˈo Asa Gidiyoogaa Xallay Maaddii?
Loˈˈo asa gidiyoogaa xallay sinttappe ufayssiya deˈuwaa demissees giidi xeetan qoodettiya layttawu daro asay qoppiiddi takkiis. Leemisuwawu, Konffiishees (551-479 K.K.) giyo erettida palasppay yootidobaa Isiyan deˈiya daro asay maayettees; I hagaadan giis: “Asi ne bolli oottanaadan neeni koyennabaa hara asaa bolli oottoppa.”
UFAYSSAA DEMMANAWU DARO ASAY OOTTIYOOBAA
Loˈˈo asa gidiyoogaa xallay sinttappe ufayssiya deˈuwaa demissees giidi daro asay qoppees. Asay bonchchettanawu, loˈˈo kandduwaa bessanawu, baappe koyettiyaabaa polanawunne loˈˈo kahaara deˈanawu baaxetees. Veetinaamen deˈiya Lin giyo maccaasiyaa hagaadan gaasu: “Taani ammanettiyaanne tumanchcha asa gidikko ufayssiyaa deˈuwaa demmana gaada ammanaydda takkaas.”
Issoti issoti bantta haymaanootiyan tamaaridobaa gaasuwan loˈˈobaa oottanawu baaxetoosona. Taywaanen deˈiya Hisu-Yun giyo bitanee hagaadan giis: “Issi uri paxa deˈiiddi oottidobay, I hayqqi simmidi merinawu ufayttanaadan woy tuggatanaadan oottees giyo timirttiyaa tamaaraas.”
LOˈˈO ASA GIDIYOOGAA XALLAY UFAYSSAA DEMISSII?
Haratussi loˈˈobaa oottiyoogee, daroban nuna goˈiyoogee tuma. SHin, haratuyyo loˈˈobaa oottanawu baaxetida daroti eti naagidobaa demmibookkona. Hong Kongen deˈiya Siyu Pingo giyo maccaasiyaa hagaadan gaasu: “Loˈˈobaa oottiya asay ubbatoo ufayttennaagaa ta deˈuwan hanidabaappe akeekaas. Ta so asawu koshshiyaabaa kunttanawunne loˈˈobaa oottanawu taayyo danddayettida ubbabaa oottaas. SHin ta azinay tananne ta naˈaa aggidi biis.”
Asay loˈˈo gidanaadan oottiyay ubba haymaanootiyaa gidennaagaa daroti akeekidosona. Jaappaanen deˈiya Etisuko giyo maccaasiyaa hagaadan gaasu: “Taani issi haymaanootiyaa yame gida simmada hegan deˈiya yelagati oottiyoobaa darajjayiyoogaa doommaas. Taani he haymaanootiyaa asay kandduwan moorettidoogaa, maatawu keesettiyoogaanne woosa keettaa miishshaa balibakkiyoogaa akeekada keehi dagammaas.”
“Ta so asawu koshshiyaabaa kunttanawunne loˈˈobaa oottanawu taayyo danddayettida ubbabaa oottaas. SHin ta azinay tananne ta naˈaa aggidi biis.”—SIYU PINGO, HONG KONGE
Haymaanootiyaa mintti kaalliyaanne loˈˈobaa oottanawu baaxetiya issi issi asati bantta bolli iitabay gakkido gishshawu hidootaa qanxxidosona. Veetinaamen deˈiya Vano giyo maccaasiyaa hegaadan qoppaasu. A hagaadan gaasu: “Taani sinttappe anjjuwaa demmana gaada, ubba gallassi miyo mittaa ayfeta, ciishshatanne qumaa shammada ta mayzza aawatussi yarshshiyo sohuwan bassaa wottays. Taani daro layttawu loˈˈobaa oottiyaabanne ammano wogata poliyaaba gidikkonne ta azinay iita harggiis. Qassikka ta naˈiya hara biittan tamaaraydda yelagatettan hayqqaasu.”
Loˈˈo asa gidiyoogaa xallay nuuni sinttappe ufayssiya deˈuwaa demmanawu maaddennaba gidikko, yaatin aybi maaddanee? Ha oyshaa zaaranawu ammanttiya kaaletuwaa koshshees. He kaaletuwawu pultto gididaagee nu oychchiyo oyshaa zaarananne ufayssiya deˈuwaa demmanaadan maaddana danddayees. Hegaa mala kaaletuwaa awuppe demmana danddayiyoo?
Hageeta Beˈadii?
BEEGOTTITE!
Likkebaanne Likke Gidennabaa Akeekiyoogaa
Loˈˈo kandduwaa naata tamaarissiyoogee sinttanabawu eta keehi maaddees.
