Gur, Ra Fel’ e Par Rom Boch Nga M’on ni Faan Ga Ra Rin’ e Ngongol nib Fel’, Fa?

PLAY

Ke yoor e chibog ni ma lemnag boor e girdi’ ni be’ nib fel’ e ngongol rok e ra fel’ e par rok boch nga m’on. Bod ni boor e girdi’ u Asia nib m’agan’rad ko n’en ni yog reb e sensey ni boor e girdi’ ni manang ni ka nog Confucius ngak ni gaar: “Dab mu rin’ ngak be’ e n’en ndabum ni ngan rin’ ngom.” *

BAN’EN NI BOOR E GIRDI’ NI MA RIN’

Boor e girdi’ ni ka yad ma lemnag ni faanra ba fel’ e ngongol rorad, ma aram e ra fel’ e par rorad boch nga m’on. Yad ma guy rogon ni ngar ted fan e girdi’, me par pangirad nib fel’, mar nanged e n’en nib milfan ngorad, ma ur pared nib fel’ e nangan’ rorad. Linh nreb e ppin ni ma par u Vietnam e yog ni gaar, “Ug lemnag ni faanra gag be’ ni gub yul’yul’ ma ra fel’ e par rog.”

Bay boch e girdi’ ni yad ma rin’ e ngongol nib fel’ ni bochan e aram e n’en yima fil ko teliw rorad. Hsu-Yun nreb e pumoon ni ma par u Taiwan e yog ni gaar, “Nni fil ngog ni faanra ba fel’ e ngongol rok be’ ma nap’an nra yim’ ma ra felfelan’, ma faanra ba kireb e ngongol rok ma nap’an nra yim’ ma ra gafgow.”

MANG E KE BUCH NI BOCHAN E RE N’EY?

Riyul’ nnap’an ni gad ra rin’ boch ban’en nib fel’ ngak yugu boch e girdi’, ma boor angin nra yib ngodad. Machane boor e girdi’ ni kar guyed ni ngongol nib fel’ ni yad ma rin’ ko girdi’ e gathi gubin ngiyal’ ni ku yima rin’ ngorad ni aram rogon. Shiu Ping nreb e ppin ni ma par u Hong Kong e yog ni gaar: “Kug nang ko n’en ni buch rog ni piin nib fel’ e ngongol rorad e gathi gubin ngiyal’ nib fel’ e n’en ma buch rorad. Gu athamgil u rogon nrayog rog ni nggu ayuweg e tabinaw rog mug rin’ e tin nib fel’. Machane me chuw e pumoon rog nge n’agmow ba pagel ni fakmow.”

Boor e girdi’ ni kar guyed ni gathi gubin e girdi’ ni bay barba’ e teliw ni yad ma un ngay nib fel’ e ngongol rorad. Etsuko nreb e ppin ni ma par u Sapan e yog ni gaar: “Bay barba’ e teliw nug un ngay mug tabab ni nggu yarmiy boch ban’en ni ma rin’ e piin fel’ yangaren ko re raba’ i teliw nem. Machane gu gin ngay ni bochan e bay boch e girdi’ ko re teliw nem nib kireb e ngongol rorad, ma yad ma guy rogon ni nge ga’ lungurad, ma yad ma fanay e salpiy ko galesiya nga boch ban’en ni gathi ir.”

“Gu athamgil u rogon nrayog rog ni nggu ayuweg e tabinaw rog mug rin’ e tin nib fel’. Machane me chuw e pumoon rog nge n’agmow ba pagel ni fakmow.”—SHIU PING, HONG KONG

Bay boch e girdi’ ni ke kireban’rad ni ke buch boch ban’en nib kireb rorad ni yugu aram rogon ni yad ba m’ing ko teliw rorad ma yad ma guy rogon ni ngar rin’ed e ngongol nib fel’. Aram e n’en ni buch rok Van nreb e ppin ni be’ nu Vietnam. I gaar: “Gubin e rran nug ma chuw’iy wom’engin e gek’iy, nge floras, nge ggan ngaug wan gu tay nga daken e altar ko pi ga’ rog ni kar m’ad kakrom, ya gu be athapeg ni nge yag e tow’ath ngog boch nga m’on. Yugu aram rogon ni boor e duw ni ug rin’ boch ban’en nib fel’ ma gu be fol ko pi yalen ko teliw rog, machane me m’ar e pumoon rog nrib ubchiya’. Ngemu’ miki yim’ ba rugod ni fakag u nap’an ni bay u yugu reb e nam ni be skul.”

FAN NDE GAMAN NI KEMUS NI NGAN RIN’ E NGONGOL NIB FEL’

Ba ga’ fan ni nge fel’ e ngongol rodad, machane gathi kemus e n’en nra fal’eg e par rodad boch nga m’on. Mang fan? Am lemnag e n’en be yog e Bible.

GATHI GUBIN E GIRDI’ NI YAD MA MEL’EG NI NGAR RIN’ED E TIN NIB FEL’

“Taareb e tadenen ma rayog ni nge kirebnag boor ban’en nib manigil.” —EKLESIASTES 9:18, BT.

Mus ni faan ga ra guy rogon ni ngam rin’ e tin nib fel’, maku rayog ni nge yib wenegan ngom e pi n’en ma rin’ e piin yigoo yad e yad ma lemnaged yad. Bod nsana rayog ni ga be fol ko n’en be yog e am ni aram e dab kun chuchugur ngak yugu boch e girdi’ u nap’an ni ke yib reb e m’ar ni ke garer u gubin yang. Machane uw rogon ni faanra bay boch e girdi’ ni yad ra siyeg ni ngar folgad ko re n’ey? Ngongol rorad e rayog ni nge k’aring yugu boch e girdi’ ni yad be guy rogon ni ngar folgad ko re motochiyel ney ni ngki af e m’ar ngorad.

RAYOG NDE PULUW ROGON NI BE LEMNAG E GIRDI’ E N’EN NIB FEL’ ARA N’EN NIB KIREB

“Re kanawo’ ni ga be lemnag nib manigil e rayog ni nge sor ko yam’.”—PROVERBS 14:12, BT.

Boor e girdi’ ni kar rin’ed boch ban’en ni yad be lemnag nib fel’, me yan i boch nga tomuren mar nanged nib kireb. Yugu aram rogon nra lemnaged nib fel’ e n’en yad be rin’, machane miki yib wenegan ngorad ni bochan e de fel’ e n’en nra dugliyed.

DAD NANGED E N’EN NRA BUCH RODAD BOCH NGA M’ON

“Mus ko n’en ni bay yib ngomed gabul ma da mu nanged!”—JAMES 4:14.

Mus ngak be’ nib fel’ e ngongol rok ma rayog ni nga yigi yim’ nib tomgin. Bod ni boor e girdi’ ni kar m’ad u nap’an fare m’ar ni COVID-19 u nap’an ni yad be guy rogon ni ngar ayuweged yugu boch e girdi’. Fa reb e mu lemnag e n’en ni buch rok Liting ni be’ nib pin ni ma par u China u nap’an ni chafin e karrow nge yim’ e chitamangin ni bay riy. I gaar: “Dag nang fan ni nge yim’ be’ ni aram feni manigil. Chitamag e be’ ni ma maruwel nib gel, mab sobut’an’, mab yul’yul’. Kemus ni yigoo ir u lan e re karrow nem e yim’.”

Faanra de gaman ni kemus ni ngad rin’ed e ngongol nib fel’, me ere mang e ra fal’eg e par rodad boch nga m’on? Ra ngad nanged e fulweg ko re deer ney, mab t’uf ban’en nrayog ni nge pagan’dad ngay nrayog ni nge pi’ e fulweg ko deer rodad me ayuwegdad ni nge fel’ e par rodad boch nga m’on. Uw e rayog ni ngad pirieged e re n’ey riy?

^ par. 2 Ra ga baadag ni ngkum nang murung’agen boch ban’en ni i machibnag Confucius, mag guy e guruy ni 7 ko fare ke babyor ni Mankind’s Search for God ko paragraph 31-35, ni ke ngongliy e Pi Mich Rok Jehovah maku bay u online ko www.pr418.com.

FARE WULYANG KO DAMIT