?Ngue yɛ ɔ kwla uka e naan e liɛ w’a yo ye-ɔ?
Kɛ nga e fa wunnin i ndɛ akpasua nga be sinnin lɛ’n be nun sa’n, sran wie’m be bu i kɛ sran kun annzɛ like wie yɛ ɔ siesie e ɲrun lɔ sa mun-ɔn. Ɔ maan be yo ninnge wie mun naan sran sɔ’n annzɛ like sɔ’n yo naan be liɛ yo ye. Sran wie mun ekun be liɛ’n, be bu i kɛ sɛ be di suklu dan annzɛ be ɲan sika kaka annzɛ be yo sran kpa’n, be liɛ yó ye. Sanngɛ ninnge sɔ’m b’a kwlá ukaman be naan be liɛ w’a yo ye sakpa. ?I sɔ’n kle kɛ like fi kwlá ukaman e naan e liɛ w’a yo ye? Cɛcɛ, nɛ́n i sɔ-ɔ.
SRAN KUN M’Ɔ KWLA UKA E KPA’N
Kpɛ sunman’n, kɛ e waan é fá ajalɛ kun’n, e usa sran kun m’ɔ ti kpɛnngbɛn tra e’n annzɛ ɔ si ngwlɛlɛ kpa’n i ngwlɛlɛ afɛ. I wafa kunngba’n, sɛ e kunndɛ kɛ e liɛ yo ye’n ɔ fata kɛ e fa afɔtuɛ nga Sran kun m’ɔ ti kpɛnngbɛn tra sran’m be ngba’n ɔ man e’n su. Sran sɔ’n kusu i ngwlɛlɛ liɛ’n leman wunsu. Ɔ yoli maan be klɛli ngwlɛlɛ ndɛ wie mun fluwa kun nun. Be klɛli fluwa sɔ’n i afuɛ kɔe 3.500 yɛ. Fluwa sɔ’n yɛle Biblu’n.
?E kwla lafi Biblu’n nun ndɛ’n su? Ɛɛn, afin Sran nga Biblu’n fin i’n, i ngwlɛlɛ’n leman wunsu. Asa’n, i kpɛnngbɛn tra be kwlaa nga be o nglo lɔ’n nin asiɛ’n su wa’n. I sɔ’n ti’n, Biblu’n flɛ i kɛ “sran oke.” I kpa bɔbɔ’n, kwlaa naan ‘mɛn’n w’a bo i bo’n’ nn ɔ o lɛ. (Daniɛl 7:9; Jue Mun 90:2) I yɛ ɔ ‘yili nglo’n nin asiɛ’n niɔn.’ (Ezai 45:18) I dunman’n yɛle Zoova.—Sa Nglo Yilɛ 4:11.
E kwlaa e ti Sran nga Biblu’n fin i’n i sa nuan like. I sɔ’n ti’n, Biblu’n se kɛ aniɛn kwlaa be sɛ. Asa’n, ɔ kle kɛ kannzɛ e wunnɛn kplo’n timan kun’n, sanngɛ e kwlaa e sɛ. Afɔtuɛ nga be o Biblu’n nun’n be ti kpa titi, yɛ sran wafawafa kwlaa kwla ɲan su ye. Be yili Biblu’n aniɛn kaka nun tra fluwa kwlaa. Yɛ w’a tru kpa w’a tra fluwa ngba. * I sɔ’n ti’n, sran ngba kwla kanngan Biblu’n nun yɛ ɔ kwla ɲan afɔtuɛ ng’ɔ o nun’n i su ye. I kwlaa sɔ’n kle kɛ ndɛ yɛ mɔ Biblu’n kannin’n ti nanwlɛ. Ɔ seli kɛ:
“Ɲanmiɛn kpaman sran nun. Sanngɛ nvle kwlaa nun’n, sran ng’ɔ sro i m’ɔ yo sa ng’ɔ ti kpa’n, i sɔfuɛ’n yɛ i klun jɔ i wun-ɔn.”—SA NGA BE YOLI’N 10:34, 35.
Siɛ nin niɛn nga be klo be mma mun’n, be kle be atin naan be liɛ yo ye. I wafa kunngba’n, e Si Zoova m’ɔ klo e’n ɔ sin Biblu’n i lika kle e atin naan e liɛ yo ye. (2 Timote 3:16) E kwla lafi i nuan Ndɛ’n su. Afin i yɛ ɔ yili e-ɔ, yɛ ɔ si like ng’ɔ kwla uka e naan e liɛ w’a yo ye sakpa’n.
?A kunndɛ kɛ á ɲán ninnge sɔ mun wie? Sɛ ɔ ti sɔ’n, nian ndɛ akpasua ng’ɔ́ bá lɛ’n nun naan wun like ng’ɔ fata kɛ a yo’n.
^ ndɛ kpɔlɛ 6 Sɛ a kunndɛ kɛ á sí wafa nga be kacili Biblu’n aniɛn’m be nun’n ɔ nin like nga ti yɛ Biblu’n w’a tru kpa’n, kɔ www.pr418.com su naan tin LA BIBLE ET VOUS > LA BIBLE ET L’HISTOIRE su.
^ ndɛ kpɔlɛ 16 Sɛ a kunndɛ kɛ á sí nun ndɛ kpa ekun’n, nian fluwa nga be flɛ i kɛ ?Ngue like yɛ Biblu’n kle i sakpasakpa ɔ? i bue 23-25 be nun. Zoova i Lalofuɛ mun yɛ be yili fluwa sɔ’n niɔn. Ɔ o www.pr418.com su. Kɔ lɔ naan tin NINNGE NGA E YILI BE’N > FLUWA NIN FLUWA PƐPLƐƐPLƐ MUN su.
Ninnge wie mɔ be kwla yo ɔ fɛ ekun'n
SASAFUƐ TRANWLƐ'N
Sa nga bé wá jú e ɲrun lɔ’n be su ndɛ nanwlɛ’n
Amun lafi su kɛ like nga Ɲanmiɛn waan ɔ́ yó man sran mun asiɛ’n su’n, ɔ́ kpɛ́n su sakpa.
SASAFUƐ TRANWLƐ'N
?Afɔtuɛ nga be o Biblu’n nun’n be kwla yo e ye andɛ?
Sɛ mininiti kwlakwla’n e kwla wun ndɛ wie mun andɛ’n, ngue ti yɛ é kó kánngan fluwa kun mɔ be klɛli w’a di afuɛ kɔe 2.000 nun-ɔn?
SASAFUƐ TRANWLƐ'N
Biblu’n ti’n e lafi su kɛ e liɛ yó ye
Sɛ e nanti Biblu’n nun ndɛ’n su’n, é wún sa nga be ju e su cɛn kwlakwla’n be trawlɛ. Asa ekun’n, Biblu’n nun ndɛ’n ti’n e si sa nga bé jú cɛn wie lele’n.
KOSAN MƆ BIBLU’N TƐ BE SU’N
?Biblu’n dun mmua kannin andɛ sran’m be ayeliɛ’n i ndɛ?
Biblu’n seli kɛ sran’m be ayeliɛ’n yó tɛ kɔ́ i ɲrun.
