Arog kan napag-ulayan sa sinundan na mga artikulo, naghinguwa an mga tawo na magkaigwa nin marahay na puturo paagi sa pagtiwala sa kapaladan, edukasyon, kayamanan, saka sa pagigin marahay na tawo. Pero an paggibo kaiyan garo paggamit nin salang mapa mantang pasiring ka sa sarong lugar na dai ka pamilyar. Nangangahulugan daw iyan na mayong mapagkakatiwalaan na giya para sa puturo? Dai man!

Pag nagdedesisyon, sa parati nagkokonsulta kita sa saro na mas matua saka mas madunong sa sato. Sa kaparehong paagi, makakakua kita nin mapagkakatiwalaan na giya para sa satong puturo hali sa Saro na mas matua saka mas madunong nanggad kisa sa sato. An sadol na hali sa Saiya nakaabot sa sato paagi sa sarong koleksiyon nin sagradong mga kasuratan na pinunan na isurat mga 3,500 na taon na an nakaagi. An koleksiyon na ini nin banal na mga kasuratan sarong libro na inaapod na Bibliya.

Taano ta makakapagtiwala ka sa Bibliya? Dahil an Awtor kaiyan iyo an pinakahaloy nang nabubuhay asin an pinakamadunong na Persona sa uniberso. Ilinadawan siya bilang an “Suanoy kan mga Aldaw” na hali “sa panahon na daing katapusan sagkod sa panahon na daing katapusan.” (Daniel 7:9; Salmo 90:2) Siya “an Kaglalang kan kalangitan, an tunay na Diyos, an Saro na naghaman kan daga.” (Isaias 45:18) Ipinapabisto niya an saiyang sadiri paagi kan saiyang personal na pangaran na Jehova.—Salmo 83:18.

Dahil an Bibliya hali sa Kaglalang kan bilog na katawuhan, mayo iyan nin pinapaburan na kultura o rasa. Aplikado pa man giraray sa panahon ta an mga sadol kaiyan saka dakul nang tawo sa bilog na daga an natabangan kaiyan. Mababasa iyan sa mas dakul na lengguwahe asin mas lakop iyan na naidistribwir kisa sa arin man na iba pang libro. * Dahil diyan, pasil iyan na masabutan kan mga tawo sa gabos na lugar asin magigiyahan sinda kaiyan. Patunay iyan na totoo an sinasabi kan Bibliya:

“An Diyos mayong pinapalain, kundi sa lambang nasyon, inaako niya an tawong may pagkatakot sa saiya asin naggigibo nin matanos.”—GIBO 10:34, 35.

Arog kan sarong nagmamalasakit na magurang na nagtataong paggiya sa saiyang mga aki, an Diyos na Jehova sarong mamumuton na Ama na gusto kitang tabangan paagi kan saiyang Tataramon, an Bibliya. (2 Timoteo 3:16) Makakapagtiwala ka sa saiyang Tataramon; tutal, siya an naggibo sa sato asin aram niya kun anong paagi nin pamumuhay an pinakamarahay para sa sato.

Ano an kaipuhan mong gibuhon para makasigurado ka na magkakaigwa ka kan arog kaiyan na puturo? Hilingon an sunod na artikulo.