?Wanem i Save Halpem Yumi?

PLEI

Yumi bin tokbaot finis se ol man oli trastem ol samting olsem gudlak mo badlak, hae edukesen, mane mo ol gudfala fasin, blong gat wan gudfala fiuja. Be hemia i olsem ol giaman rod we man i folem blong go long wan ples. ?Olsem wanem? ?I gat wan samting we i save halpem yu blong kasem wan gudfala fiuja? !Si i gat!

ADVAES WE I GUD MOA

Blong mekem ol desisen, plante taem yumi askem advaes long man we i olfala mo i waes moa long yumi. Sem mak, blong save fiuja, yumi save askem wan man we i olsem. Ol advaes blong hem oli stap long wan buk we oli raetem samwe 3,500 yia bifo. Tabu buk ya hemia Baebol.

?From wanem yu save trastem Baebol? From we i kamaot long Man ya we long ful yunives, hem i olfala mo i waes moa. Hem i “Olfala Ya Blong Bifo Olgeta” mo i stap “longtaem finis i kam mo gogo i no save finis.” (Daniel 7:9; Ol Sam 90:2) Hem i “God We i Wokem heven, mo i tru God, Hem nao i mekem wol.” (Aesea 45:18) Hem i talem se nem blong hem Jehova.—Ol Sam 83:18.

Baebol i kamaot long Krieta blong olgeta man, taswe buk ya i no mekem i gud moa long wan kalja o laen i bitim ol narafala. Advaes blong hem i stret oltaem, mo i halpem ol man long olgeta kantri. Buk ya i stap long plante lanwis mo oli seremaot long plante moa man i bitim eni narafala buk. * Hemia i min se ol man long olgeta ples oli save ridim mo folem advaes blong hem. Hemia i laenap wetem Tok blong Baebol we i se:

“God i stap mekem i sem mak nomo long olgeta man, sipos wan man i fraet long God mo i mekem samting we i stret, God i glad long hem nating se hem i blong defren nesen.”—OL WOK 10:34, 35.

Jehova God i olsem wan gudfala papa we i lavem mo i givim advaes long pikinini blong hem. Hem i yusum Baebol blong givim advaes long yumi. (2 Timoti 3:16) Yu save trastem Tok blong hem, from we hem i wokem yumi mo i save wanem we yumi nidim.

ADVAES WE YUMI SAVE TRASTEM

Yumi save trastem samting we Baebol i talem long saed blong fiuja, from we samwe 2,000 yia bifo, hem i bin talemaot ol samting we bambae oli hapen long wol mo ol fasin blong ol man we tede yumi stap luk.

OL SAMTING WE OLI HAPEN:

“Bambae ol nesen oli faet agensem ol narafala nesen, mo ol kingdom oli faet agensem ol narafala kingdom. Mo bambae graon i seksek bigwan. Mo olbaot long wol bambae kakae i sot mo i gat ol strong sik.”—LUK 21:10, 11.

OL FASIN BLONG OL MAN:

“Long ol las dei, laef bambae i strong tumas mo bambae i had blong winim ol trabol. Bambae ol man oli tingbaot olgeta nomo, oli laekem mane tumas, oli tok flas, tingting blong olgeta i go antap tumas, oli tok nogud long ol narafala, oli no obei long papa mo mama blong olgeta, oli no gat tangkiu, mo oli no holemstrong long ol narafala, oli no gat lav insaed long famle, oli no save agri long wan tingting, oli spolem nem blong narafala, oli no save bos long tingting, oli wael olgeta, mo oli no laekem ol gudfala fasin. Bambae oli putum ol fren blong olgeta long han blong ol enemi, oli stronghed, oli flas gogo tingting blong olgeta i go antap tumas, oli laekem ol samting we oli save harem gud long hem, bitim we oli lavem God.” —2 TIMOTI 3:1-4.

?Olsem wanem Baebol i save talemaot stret ol samting we oli stap hapen tede? I sua se bambae yu agri wetem man ya Leung blong Hong Kong, we i talem se: “Ol profet tok blong Baebol oli raetem longtaem finis. Man i no naf blong talemaot stret ol samting olsem. Taswe Baebol i mas kamaot long wan man we i hae moa long yumi.”

Baebol i tokbaot plante profet tok we oli bin kamtru. * Hemia i pruvum se Baebol i rili Tok blong God. Jehova i talem se: “Mi mi God, mo i no moa gat wan we i olsem mi,” mo “long stat, mi mi talemaot samting we bambae i kamtru.” (Aesea 46:9, 10) Taswe yu save trastem samting we Baebol i talem long saed blong fiuja.

OL ADVAES BLONG GIVHAN LONG YU NAOIA MO BLONG OLWE

Taem yu folem ol advaes blong Baebol, bambae yu haremgud. Hemia sam eksampol.

STRET TINGTING LONG MANE MO WOK

“I moa gud man i spel smol, i bitim we hem i stap wok had tumas mo i stap ronem win.”—PRIJA 4:6.

MARED LAEF

“Hasban i mas lavem waef blong hem olsem we hem i lavem hem wan, mo waef i mas gat bigfala respek long hasban blong hem.” —EFESAS 5:33.

GAT PIS WETEM NARAFALA

“Livim fasin blong kros, mo yu lego fasin blong kros bitim mak. Yu no mas harem nogud, nao yu go mekem ol fasin we i nogud.”—OL SAM 37:8.

Sipos yu folem ol advaes blong Baebol, bambae yu gat gudfala laef naoia, mo long fiuja. Long Baebol, yu save faenem ol gudfala promes ya blong God se bambae

I GAT PIS MO SEFTAEM

“Bambae oli glad tumas from oli gat pis we i bigwan tumas.”—OL SAM 37:11.

EVRIWAN I GAT HAOS MO KAKAE

“Bambae oli bildim ol haos mo oli stap long olgeta, mo bambae oli planem ol plantesen blong grep mo oli kakae ol frut blong olgeta.”—AESEA 65:21.

I NO MOA GAT SIK MO DED

“Bambae i no moa gat man i ded, mo bambae man i no moa sore, mo bambae i no moa gat man i krae, mo bambae man i no moa harem nogud long bodi blong hem.” —REVELESEN 21:4.

?Yu mas mekem wanem blong kasem gudfala fiuja ya? Ridim nekis atikol.

^ par. 6 Blong save moa long saed blong translesen mo namba blong Baebol we oli givimaot, go long www.pr418.com mo luk aninit long OL BAEBOL TIJING > HISTRI & BAEBOL.

^ par. 16 Blong save moa, luk japta 9 blong buk ya The Bible—God’s Word or Man’s? we ol Witnes blong Jehova oli wokem. Mo i stap tu long intenet long www.pr418.com, yu go long LAEBRI > OL BUK & BUKLET.