Bagi si enggo sibahas bas artikel-artikel sebelumna, enterem kalak si tek maka suraten padan, pendidiken, sen, ras perbahanen si mehuli banci erban masa depan kalak e reh ulina ras ermeriah ukur. Tapi situhuna si ilakoken kalak e bali bagi ngikutken peta si salah sanga lawes ku sada ingan. Adi bage, lit kin si banci tuhu-tuhu erban masa depanta terjamin? Lit!

Biasana adi perlu kita nasehat, sipindo man kalak si tertuan ntah pe si beluhen asangken kita. Lit sada Pribadi si ndauh tuan ras ndauh pentaren asangken kita, si banci mereken nasehat si mehulina man banta. Nasehatna e lit bas sada buku si mulai itulis kira-kira 3.500 tahun si lewat, buku e eme Pustaka si Badia.

Engkai maka banci kita tek man Pustaka? Perban buku e rehna arah Pribadi si metuana ras si Pentarna i alam semesta enda. Ia igelari “Si Enggo Lit Nai Nari,” Ia kap “Dibata seh rasa lalap.” (Daniel 7:9; Masmur 90:2) Selain si e, Ia kap “Si Nciptaken langit, Dibata si benar, Si Erban doni.” (Jesaya 45:18) IkatakenNa ka ise gelarNa man banta, gelarNa eme Jahwe.​—Masmur 83:18.

Perban Pustaka rehna arah Dibata si Nciptaken kerina jelma, isina la mbeda-mbedaken budaya ras suku tertentu. Nasehatna la ketadingen jaman janah erguna man kerina kalak. * Pustaka eme buku si mbuena iterjemahken ras si mbelangna isebarken. Emaka kerina kalak banci mbaca buku e ras ndatken gunana. Kerina e sesuai ras kata-kata bas Pustaka enda:

“Dibata la erpilihen. Kerina kalak arah bangsa si apai pe, adi mbiar man Dibata janah ngelakoken kai si benar, pasti alokenNa.”​—PERBAHANEN RASUL-RASUL 10:34, 35.

Bali bagi orang tua si keleng atena anakna ras nggit ia nampati anakna, Dibata Jahwe pe keleng ateNa kita janah sampatiNa ateNa kita arah Pustaka si isina kata-kataNa. (2 Timotius 3:16) Ia kap si nciptaken kita janah itehNa kai si mehulina man banta. Emaka banci kita tek man kai si ipesehNa arah Pustaka.

Kai si banci lakokenndu gelah banci datndu masa depan si luar biasa e? Jawapenna lit bas artikel seterusna