Laik weh wi don diskos eena di aatikl dehn bifoa dis wan, peepl put dehn chros eena tingz laik horoskoap, ejukayshan, richiz, ahn fi bee wahn beta persn soh dat dehn ku ga wahn beta fyoocha. Bot if yu chrai fi geh wahn beta fyoocha di du dehndeh tingz, da laik if yu di chrai goh da wahn plays weh yu noh noa di yooz wahn rang map. Yoo tink dat meenz dat dehn noh ga notn weh yu ku chros soh dat yu ga wahn beta fyoocha? Af koars sohnting egzis weh yu ku chros!

Wen wi mek sohn disizhanz, wi yoozhwali goh tu sohnbadi weh oalda ahn waiza dan wi. Sayhn way soh, wi ku fain gud infamayshan weh wi ku chros fi di fyoocha fahn sohnbadi weh faar oalda ahn waiza dan wee. Wi ku reed fi Hihn advais eena wahn buk weh naym di Baibl. Dis buk geh rait dong bowt 3,500 yaaz agoa.

Wai wi ku chros di Baibl? Bikaaz ih kohn fahn di oaldis ahn waizis Persn eena di yoonivers. Di Baibl kaal ahn “di Aynshent a Dayz” hoo da “fahn fareva eena di paas tu fareva eena di fyoocha.” (Daniel 7:9; Psalm 90:2) Hihn da “di Kriyayta a di hevnz, di chroo Gaad, di Wan hoo mek di ert.” (Isaiah 45:18) Hihn tel wi dat fi hihn naym da Jehoava.—Psalm 83:18.

Di Baibl noh seh dat wan kolcha er rays beta dan di ada, dis da bikaaz ih kohn fahn di wan weh kriyayt aal hyoomanz. Di advais fahn di Baibl aalwayz werk an ih help peepl fahn aal rong di werl. Ih avaylabl fi evribadi eena moa langwij dan eni ada buk. * Peepl fahn aal rong di werl ku andastan it ahn geh di gaidans weh dehn need fan it. Dehnya faks gree wid weh di Baibl seh:

“Gaad chreet evribadi di saym way. Ahn hihn aksep enibadi weh fyaa Gaad ahn du weh rait, noh mata weh nayshan dehn kohn fram.”​—AKS 10:34, 35.

Jos laik payrents hoo lov ahn help dehn chiljren, Jehoava Gaad da wahn lovin Faada weh aafa fi help wi chroo fi hihn Werd, di Baibl. (2 Timoti 3:16) Yoo ku chros fi hihn Werd bikaaz hihn mek wi ahn hihn noa weh ku mek wi hapi.

Weh yu need fi du fi ga da kaina fyoocha? Yu ku fain di ansa eena di neks aatikl.