Anihein san adundehani chóuruti lun libihín aban ibagari buiti ámuñegü?
Kei warihini darí guento, áfaaguaaña gürigia lun buídubei lan habagari ámuñegü lau hafiñerun luagu sinu, aturiahani tidan luban furendei íñutu, seinsu o lau buidu lan hóuserun. Gama lumoun, dan ladügǘn ítara, genegeti kamá hamuga láfaagun aban gürigia lachülürün lidoun aban fulasu le ibidiñeti lun tau aban mapa wuribatu. Mini lan san le ua lan adundehani chóuruti lun buidu lan wabagari ámuñegü? Inó.
LADUNDEHAN ABAN LE CHÚTIMABEI AAU
Dan le mosu lan wanúadirun, libe-agei dan aba wáluahani ladundehan aban gürigia le chútimabei aau subudi ligía saragu. Ítarameme, anhein busén wabéi lun buidu lan wabagari ámuñegü, mosu wafiñerun luagu adundehani le líchugubei le chútimabei aau, subudihabu ligía. Gayaraati waliihani ladundehan tidan Sandu Bürütu to agumeserúnboun abürüdǘwa kéiburi 3,500 irumu guentó. Wayanuhaña tuagu Bíbülia.
Ka uagu gayara lubei wafiñerun tuagu Bíbülia? Ladüga le úmagiñebei tiabin ligía chútimabei aau lidan sun ubóu. Ligía “Weiriei Mutu”, le aniheinbei “lúmagiñe binadü dan lumoun lébeha dan” (Danieli 7:9; Sálumu 90:2). Ligía Búngiubei inarüniti, “le adügübalin sielu, [...] le adügübalin múa” (Isaíasi 45:18). Ligía guánarügü ariñagubalin liri woun: Heowá (Sálumu 83:18, TNM).
Kei lúmagiñe lan le Adügübaliña sun gürigia tiabin Bíbülia, marufudahantu buidu lan aban rasa o échuni luéi aban. Súnwandan buidu lan tadundehan ani íderagua lumutiña sun gürigia ha lídagiñetiña ámuñegueinarügü fulasu. Tuguyatima líburu to sügügüdawaaru lidoun saragu iñeñein ani to gíbetimati tafanreinhóun lidan sun ubóu. Ligíati mérengun lubéi lun gunfuranda lanu furumiñeguarügü gürigia ani ígira ligía lun tadundehani. Anha, ariñagatu giñe Bíbülia: *
“Úati [...] himei lan Bungiu aban gürigia luéi aban, lubaragiñe lira, resibirügü lumutiña sun ha inebehabubaña lun, ani adüga haméi le buídubei, lídangiñe hamá yebe furumiñeguarügü néchani” (ADÜGAÜ 10:34, 35).
Ítara kei aban úguchili le hínsiñehabuti houn lisaanigu ani íderagua laña, aban giñe Úguchili hínsiñehabuti Heowá, le íderagubaliwa lau lererun le tídanbei Bíbülia (2 Timotéu 3:16). Anha, gayarati hafiñerun tuagu Lererun Bungiu. Kei Lererun lubéi, ani ligía Adügübadiwa subudi lumuti kátima lan buídutimabei woun.
Ka lunbei hadügüni lun buidu lan hibagari ámuñegü? Harihubei lidan leweñegua arütíkulu.
^ par. 6 Anhein busén hubéi hasubudirun lanwoun ariñahani luagu tásügüragüdüniwa Bíbülia luma tafanreinhóun, heiba lidoun www.pr418.com ani bagǘ humá luagun ENSEÑANZAS BÍBLICAS > LA BIBLIA Y LA HISTORIA.
^ par. 16 Anhein busén hubéi lanwoun ariñahani, ariha huméi kapítulu 3 tidan garüdia Winwan humá lau ugundani lun súnwandan! Hadariruboun lidan www.pr418.com. Heiba lidoun LÍBURU-AGEI > LÍBURU BURÍ & GARÜDIA.
Háfuga hínsiñebei lan giñe le hun
GARÜDIA AWISAHATU
Inarüni luagu le lunbei lasuseredun ámuñegü
Héregüda huméi hemenigin luagu le füramase láalibei Bungiu luáguti le lunbei lasuseredun lun Ubóu luma houn lílana ámuñegü.
GARÜDIA AWISAHATU
Huugili san adundehani le tídanbei Bíbülia?
Añahein saminatiña binaduhali lan adundehani le tídanbei Bíbülia ani mahuuhali lan lidan wadaani. Kaba uagu wáluaha adundehani tidan aban líburu to barüharu kéiburi 2,000 irumu dan le aniheinhali lan iseri ariñahani ubouagu?
GARÜDIA AWISAHATU
Ka gayarabei lasubudiruni le lunbei lasuseredun?
Gayaraati lafiñerúniwa luagu le lariñagubei Bungiu lasusereduba lan ámuñegü.
GARÜDIA AWISAHATU
Hibagari lubá ámuñegü tuma Bíbülia
Íderagua tumutiwa Lererun Bungiu lun wagagibudagun turobuli lánina sagü weyu le lunbei wawanduni lidan ubóu le ídanbei gayara lan lasuseredun furumiñeguarügü katei. Gama lumoun, mámarügüñein lira tadüga Bíbülia. Adügatu lun buidu lan wabagari ámuñegü.
