Nso Idin̄wam Fi Ọfiọk Se Akpanamde Man N̄kpọ Ọfọn Fi ke Ini Iso?
Nte ikenemede ke mme ibuotikọ oro ẹkebede, mme owo ẹnam nsio nsio n̄kpọ emi mmọ ẹkerede ke ayanam n̄kpọ ọfọn mmimọ ke ini iso, utọ nte ndiyom mfọniso, ndika akamba ufọkn̄wed, ndiyom inyene, m̀mê ndidi eti owo. Edi owo ndinam mme n̄kpọ emi etie nte enye ndidọhọ owo emi mîdiọn̄ọke ebiet emi enye akade ete eteme imọ usụn̄. Ndi oro ọwọrọ ke idụhe n̄kpọ ndomokiet emi ekemede ndin̄wam owo ọdiọn̄ọ se enye akpanamde man n̄kpọ ọfọn enye ke ini iso? Iwọrọke ntre.
NNENNEN OWO EMI EKPETEMEDE NNYỊN SE IKPANAMDE
Ke ini iyomde ndibiere se ikpanamde, imesika ibịne owo emi ọsọn̄ọde nnyịn onyụn̄ ọdiọn̄ọde n̄kpọ akan nnyịn man an̄wam nnyịn. Kpasụk ntre, edieke iyomde ndidiọn̄ọ nnennen n̄kpọ emi ikpanamde man n̄kpọ ọfọn nnyịn ke ini iso, ana ika ibịne Owo emi ọsọn̄ọde kpukpru nnyịn onyụn̄ ọdiọn̄ọde n̄kpọ akan kpukpru nnyịn. Enye anam ẹwet nti item emi enye ọnọde nnyịn ẹdọn̄ ke n̄wed kiet. Ẹkot n̄wed emi Bible. Ẹketọn̄ọ ndiwet enye n̄kpọ nte isua 3,500 emi ekebede.
Ntak emi ikpenịmde ke Bible ekeme ndin̄wam nnyịn? Sia Owo emi okponde onyụn̄ ọdiọn̄ọde n̄kpọ akan kpukpru owo enyene Bible. Ẹkot enye “Andisọn̄ọ Usen,” enye onyụn̄ odu “ke nsinsi nsinsi.” (Daniel 7:9; Psalm 90:2) Enye edi “ata Abasi” emi okobotde enyọn̄ ye isọn̄. (Isaiah 45:18) Enye ọdọhọ ke imọ ikere Jehovah.—Psalm 83:18.
Bible idọhọke ke enyene idụt m̀mê obio emi ọfọnde akan en̄wen sia Abasi emi okobotde kpukpru owo enyene Bible. Item Bible an̄wam mme owo ke kpukpru idụt toto ke eset tutu esịm emi. Ẹkabade Bible ẹsịn ke usem awak akan n̄wed en̄wen ekededi, inyụn̄ idụhe n̄wed en̄wen emi mme owo ẹnyenede nte Bible. * Emi ọwọrọ ke mme owo ke ofụri ererimbot ẹkeme ndikot Bible ke usem emi an̄wan̄ade mmọ, ẹnyụn̄ ẹnam se Bible ọdọhọde. Ntak edi oro Bible ọdọhọde ke . . .
“Abasi inamke asari, edi ke kpukpru idụt enye enyenyịme owo eke abakde enye onyụn̄ anamde edinen ido.”—UTOM 10:34, 35.
Kpa nte ete emi amade nditọ esie esinọde mmọ item emi edin̄wamde mmọ, Jehovah Abasi nnyịn ama nnyịn esinyụn̄ ada Bible ọnọ nnyịn item. (2 Timothy 3:16) Imenịm ke se enye etịn̄de ọnọ nnyịn ke Bible ayan̄wam nnyịn sia enye okobot nnyịn, enye onyụn̄ ọdiọn̄ọ nnennen se ikpanamde man ikop inemesịt.
Nso ke akpanam man odu uwem ke ini mme n̄kpọ emi ẹditịbede? Mbọk kot ibuotikọ oro etienede.
^ ikp. 6 Edieke oyomde ndifiọk n̄kpọ en̄wen mban̄a nte ẹkekabarede Bible ẹnyụn̄ ẹnamde ediwak owo ẹnyene enye, mbọk ka www.pr418.com/efi, se ke ebiet emi okụtde SE BIBLE EKPEPDE > MBỤKESET YE BIBLE.
Ekeme Ndidi Ayama Mmọ Emi N̄ko
ENYỌN̄-UKPEME
Se Bible Etịn̄de Aban̄a Ini Iso
Kot man enen̄ede ọfiọk se Abasi etịn̄de aban̄a ini iso ye mbon emi ẹdidụn̄de ke isọn̄ emi.
ENYỌN̄-UKPEME
Ndi Bible Ekeme Ndin̄wam Nnyịn Mfịn?
Ndi Bible emi ẹkewetde ẹkụre ke n̄kpọ nte isua 2,000 emi ekebede osụk ekeme ndin̄wam nnyịn, kpa ye oro inyenede ediwak n̄wed ye mme ọnọ-item mfịn?
ENYỌN̄-UKPEME
Se Bible Etịn̄de Aban̄a Ini Iso
Ikọ Abasi ekeme ndin̄wam nnyịn iyọ mme mfịna oro isisobode ke usen ke usen ke idiọk ererimbot emi. Edi enye anam se ikande oro. Enye anam ifiọk se iditịbede ke ini iso.
