May Masaligan Bala nga Giya Para sa Maayo nga Palaabuton?
Suno sa nabinagbinag na sa nagligad nga mga artikulo, gusto gid sang mga tawo nga mangin maayo ang ila palaabuton. Gani, nagsalig sila sa kapalaran, sa edukasyon, sa manggad, kag gintinguhaan nila nga mangin maayo nga tawo. Pero ang paghimo sini para mangin maayo ang palaabuton daw pareho lang sa paggamit sang sala nga mapa pakadto sa isa ka lugar. Buot silingon bala nga wala sing masaligan nga giya para sa maayo nga palaabuton? Indi!
ANG MAKAHATAG SANG PINAKAMAAYO NGA GIYA
Kon nagahimo sang mga desisyon, masami nga nagapamangkot kita sa isa nga mas magulang kag mas maalam sangsa aton. Pareho sa sini, makakita man kita sing masaligan nga giya para sa aton palaabuton halin sa Isa nga mas madugay na nga nagkabuhi kag mas maalam sangsa aton. Mabasa naton ang iya laygay sa isa ka libro nga ginsugdan nga isulat mga 3,500 ka tuig na ang nagligad. Ini nga libro, koleksion sang balaan nga mga sinulatan kag ginatawag ini nga Biblia.
Ngaa masaligan naton ang Biblia? Bangod ang Awtor sini amo ang pinakamaalam kag pinakadugay na nga Persona nga nagakabuhi sa uniberso. Gintawag sia nga “ang Dumaan sang mga Adlaw” nga “halin sa wala sing katubtuban tubtob sa wala sing katubtuban.” (Daniel 7:9; Salmo 90:2) Sia “ang Manunuga sang langit, ang matuod nga Dios, ang Manughimo sang duta.” (Isaias 45:18) Ginapakilala niya ang iya kaugalingon paagi sa iya personal nga ngalan nga amo si Jehova.—Salmo 83:18.
Ang Biblia halin sa Manunuga sang tanan nga tawo. Gani wala ini sing ginapasulabi nga kultura ukon pungsod. Ang mga laygay sini praktikal gihapon asta subong kag nakabulig gid sa mga tawo. Mabasa ini sa madamo nga lenguahe kag amo ini ang pinakadamo nga napanagtag nga libro. * Buot silingon, mabasa ini sang mga tawo bisan diin kag puede gid sila magpagiya sa sini. Gani maathag nga matuod gid ining ginasiling sang Biblia:
“Ang Dios wala sing ginapasulabi, apang sa tagsa ka pungsod, nahamuot sia sa tawo nga nagakahadlok sa iya kag nagahimo sing matarong.”—BINUHATAN 10:34, 35.
Pareho sa isa ka mapinalanggaon nga ginikanan nga nagagiya sa iya mga kabataan, si Jehova nga Dios isa man ka mahigugmaon nga Amay nga nagabulig sa aton paagi sa iya Pulong, ang Biblia. (2 Timoteo 3:16) Masaligan mo gid ang iya Pulong, kay man sia ang nagtuga sa aton kag kabalo sia kon ano ang makapalipay sa aton.
Ano ang dapat mo himuon para mabaton mo ini nga palaabuton? Binagbinaga ang masunod nga artikulo.
^ par. 6 Para sa dugang nga impormasyon parte sa pag-translate kag pagpanagtag sang Biblia, kadtui ang www.pr418.com/hil kag buksi ang PANUDLO SANG BIBLIA > KASAYSAYAN KAG ANG BIBLIA.
^ par. 16 Para sa dugang nga impormasyon, basaha ang kapitulo 9 sang libro nga The Bible—God’s Word or Man’s? nga ginhimo sang mga Saksi ni Jehova. Mabasa man ini online sa www.pr418.com. Buksi ang LIBRARY > BOOKS & BROCHURES.
Basi Manamian Ka Man
ANG LALANTAWAN
Ang Kamatuoran Parte sa Palaabuton
Pabakura ang imo paglaum sa ginasiling sang Dios parte sa palaabuton sang duta kag sang mga tawo nga magaistar sa sini.
ANG LALANTAWAN
Maaplikar Bala Gihapon ang mga Giya sang Biblia Subong?
Sa tanan nga bag-o nga impormasyon nga mabaton subong, ngaa magpagiya kita sa libro nga mga 2,000 ka tuig na nga natapos ang pagsulat?
ANG LALANTAWAN
Ang Epekto sang Biblia sa Imo Palaabuton
Ang pulong sang Dios makabulig sa aton nga masarangan ang mga problema nga ara mismo sa aton atubangan—ang matag adlaw nga mga problema nga ginaatubang naton sa sining wala sing kasiguruhan nga kalibutan. Pero indi lang amo sina. Maathag man nga ginapakita sini ang palaabuton.
SABAT SA MGA PAMANGKOT SA BIBLIA
Gintagna Bala sang Biblia ang Panghunahuna kag Paggawi sang mga Tawo Subong?
Gintagna sang Biblia nga magalala gid ang batasan sang mga tawo.
