Nagigiammu tam ta nappollu ira nga artikulo nga mattalo i totolay ta destiny, edukasion, kuartu, anna pagangngua tu mapia tapenu makkasta i mappange da. Nu mattalo ittam tatun ira, gitta na mangusa ittam tu mali nga mapa tapenu makadde ittam ta angngayattam. Kayà na kari kagian nga awan ngana tu mapammakatalakkan nga giya para ta mappange? Ari gapa!

Nu maddesision ittam, gagangay ngana nga makkiavu ittam ta mas kaka anna mas ma-uto nittam. Egga gapa i mas kaka anna mas ma-uto anne ta nittam nga makeyawa ta mapammakatalakkan nga giya para ta mappange. Mabibbig tam i tabarang na ta libru nga magalan tu Biblia nga namegafu nga netura 3,500 dagun ngana i nappasa.

Ngatta makapattalo ka ta Biblia? Megafu ta i Autor naw i pinakakaka anna pinakama-uto ta uniberso. Yayya i “Ollu ta Aggaggaw” anna ‘mannanayun nga Dios gari anna adde noka.’ (Daniel 7:9; Salmo 90:2) Yayya i “Namaratu ta langi, i kurug nga Dios, i nagangngua ta davvun.” (Isaias 45:18) Nipakannammu na ta nittam nga Jehova i ngagan na.​—Salmo 83:18, NW.

Awan tu nakagi ta Biblia nga mas mapia i tadday nga kultura onu lahi megafu ta naggafu yaw ta Namaratu ta ngamin nga totolay. Ari nga maddana i tabarang na anna pammakapianan yaw na ngamin nga totolay. Mabibbig yaw ta aru nga lengguahe anna yaw nga libru i netaneg ta pinaka-aru nga kopia. * Mabibbig gafu yaw na ngamin nga totolay tapenu megiya ira. Kunnatun gapa i kagian na Biblia:

“I Dios ay arian na nga padduma-ruman i pangikakua na ta totolay. Ta alawatan na i sinni laman nga matunung anna minakkimoray sa, maski nu anni nga rasa i naggafuan na.”​—KINGNGUA 10:34, 35.

Kagitta na mammagana nga mangaya anna manguffun ta ána da, si Jehova nga Dios ay minaggiddu nga Yama nga maya nga manguffun ta nittam gukaban na Uvovug na, i Biblia. (2 Timoteo 3:16) Makapattalo ka ta Uvovug na megafu ta yayya i namaratu ta nittam anna ammu na nu anni i mamagayayya ta nittam.

Anni i mawag nga kuammu tapenu malawa mu yatun ta mappange? Innan i tumunug nga artikulo.