Ania ti Makatulong Kenka Tapno Nasayaat ti Masakbayam?

I-PLAY

Kas nailawlawag kadagiti napalabas nga artikulo, nagtalek ti adu a tattao iti gasat, edukasion, kinabaknang, ken panagbalin a naimbag a tao tapno maaddaanda iti nasayaat a masakbayan. Ngem ti panagaramidda iti dayta ket kas iti panagbiahe iti saanda a kabesado a lugar a kamali ti mapa nga us-usarenda. Kayatna kadi a sawen nga awanen ti makatulong kadakuada a maaddaan iti nasayaat a masakbayan? Saan!

TULONG MANIPUD ITI KASISIRIBAN A PERSONA

No agdesdesisiontayo, kaaduanna nga agpatulongtayo iti in-inauna ken nalalaing ngem kadatayo. Kasta met, no kasapulantayo ti mapagtalkan a tulong para iti masakbayantayo, maipaay dayta ti Maysa nga adayo a natataengan ken nasirsirib ngem kadatayo. Mabasatayo ti balakadna iti maysa a libro a nangrugi a naisurat agarup 3,500 a tawenen ti napalabas. Dayta a libro ket maawagan iti Biblia.

Apay a mapagtalkam ti Biblia? Gapu ta ti Autorna ti kaunaan ken kasisiriban a Persona iti uniberso. Isu ket naawagan kas “Daydiay Sibibiag iti Agnanayon,” a “manipud iti agnanayon agingga iti agnanayon.” (Daniel 7:9; Salmo 90:2) Isu ti “Namarsua iti langit, ti pudno a Dios, ti Nangporma iti daga.” (Isaias 45:18) Inyam-ammona ti personal a naganna a Jehova.—Salmo 83:18.

Gapu ta ti Biblia ket naggapu iti Namarsua iti amin a tattao, awan ti pabpaboranna a kultura wenno puli. Saan nga agkupas ti balakadna, ken nakatulong dayta kadagiti tattao iti intero a lubong. Dayta pay laeng ti libro a kaaduan ti nakaipatarusanna a lengguahe ken kasaknapan ti pannakaiwarasna. * Isu a sadinoman ti ayan dagiti tattao, maawatanda dayta ken maiwanwanna ida. Suportaran dagitoy nga impormasion ti ibagbaga a mismo ti Biblia:

“Saan a mangidumduma ti Dios, no di ket awatenna ti tao iti tunggal nasion nga agbuteng kenkuana ken agaramid iti umiso.”—ARAMID 10:34, 35.

Kas iti nagannak a mangay-ayat ken tumultulong kadagiti annakda, ni Jehova a Dios ket naayat nga Ama a mangipapaay iti tulong kadatayo babaen ti Saona, ti Biblia. (2 Timoteo 3:16) Makapagtalektayo iti Saona ta isu ti nangaramid kadatayo ken ammona ti kasayaatan para kadatayo.

MAPAGTALKAM TI BIBLIA

Makapagtalektayo nga umiso ti ibagbaga ti Biblia maipapan iti masanguanan gapu ta makitkitatayo ita dagiti pasamak iti lubong ken kababalin dagiti tattao a naisurat iti dayta agarup 2,000 a tawenen ti napalabas.

PASAMAK

“Bumusorto ti nasion iti sabali a nasion ken ti pagarian iti sabali a pagarian. Addanto napipigsa a ginggined, ken bisin ken makapapatay a saksakit.”—LUCAS 21:10, 11.

KABABALIN

“Iti maudi nga al-aldaw, dumtengto dagiti delikado ken narigat a tiempo. Ta ay-ayatento laeng dagiti tattao ti bagbagida, managayat iti kuarta, napangas, natangsit, agsasao maibusor iti Dios ken iti tao, nasukir kadagiti nagannak, saan a managyaman, saan a matalek, awanan iti ayat iti padada a tao, saanda a kayat ti makitulag, manangpadakes, awanan panagteppel, nauyong, kagurada ti kinaimbag, traidor, natangken ti uloda, napannakkel, ayatenda ti ragragsak imbes a ti Dios.”—2 TIMOTEO 3:1-4.

Ania ti makunam ta makitkitam nga eksakto a mapaspasamak ita ti nabayagen a naisurat iti Biblia? Sigurado nga umanamongka iti imbaga ni Leung a taga-Hong Kong: “Nabayagen a naisurat dagiti padto iti Biblia. Imposible a maibaga ti tao a nasaksakbay ti eksakto a mapasamak iti masanguanan. Ti Biblia ket naggapu la ketdi iti maysa nga adayo a nasirsirib ngem kadatayo.”

Ginasut a padto nga adda iti Biblia ti natungpalen. * Ipakita dayta a talaga a Sao ti Dios ti Biblia. “Siak ti Dios, ket awanen ti sabali,” kuna ni Jehova. “Manipud pay idi un-unana, ipadtok ti mapasamak.” (Isaias 46:9, 10) Talaga ngarud a mapagtalkantayo ti ibagbaga ti Biblia maipapan iti masanguanan.

DAGITI PRINSIPIO A MAKATULONG KENKA ITA KEN ITI AGNANAYON

No surotem dagiti prinsipio a masarakan iti Nasantuan a Kasuratan, sumayaat ti biagmo. Kitaem ti dadduma a pagarigan.

KUARTA KEN TRABAHO

“Nasaysayaat ti sangarakem nga inana ngem ti dua a rakem a napasnek a panagtrabaho ken panangkamat iti angin.”—ECLESIASTES 4:6.

BIAG TI PAMILIA

“Ayaten koma ti tunggal maysa kadakayo ti asawana a babai a kas iti panagayatna iti bagina; iti sabali a bangir, masapul nga adda nauneg a respeto ti babai iti asawana a lalaki.”—EFESO 5:33.

NASAYAAT A RELASION ITI DADDUMA

“Dika agunget ken dika agpungtot; dika masuron ken dika agaramid iti dakes.”—SALMO 37:8.

No surotem ti ibagbaga ti Biblia, sumayaat ti biagmo ita ken maaddaanka iti naraniag a masakbayan. Iti Biblia, makitatayo dagiti kari ti Dios maipapan iti nagsayaat a masakbayan a pakairamanan ti

TALNA KEN SEGURIDAD

“Dagiti naemma kukuadanto ti daga, ken maragragsakandanto unay iti naruay a talna.”—SALMO 37:11.

BALAY KEN MAKAN PARA ITI AMIN

“Mangbangondanto kadagiti balay ket agnaedda kadagita, ken agmuladanto kadagiti ubas ket kanenda ti bungada.”—ISAIAS 65:21.

AWANTON TI SAKIT WENNO IPAPATAY

“Awanton ni patay. Awanto metten ti panagladingit wenno panagsangit wenno ut-ot.”—APOCALIPSIS 21:4.

Ania ti masapul nga aramidem tapno maaddaanka iti nasayaat a masakbayan? Kitaem ti sumaruno nga artikulo.

^ par. 6 Para kadagiti detalye maipapan iti pannakaipatarus ken pannakaiwaras ti Biblia, mapan iti www.pr418.com/ilo ken kitaen ti PANNURSURO TI BIBLIA > HISTORIA KEN TI BIBLIA.

^ par. 16 Para iti ad-adu pay a detalye, kitaem ti kapitulo 9 ti libro a Ti Biblia—Saot’ Dios Wenno iti Tao? nga impablaak dagiti Saksi ni Jehova. Available dayta online iti www.pr418.com/ilo. Kitaen ti LIBRARIA > LIBRO KEN BROSHUR.