Ngomu vana yi tumbura mosirongwa sa ka pita, vantu kwa hetekera ko kupapara meho zongwa pokuhuguvara moyininke ngwendi megano eli asi eparu kwa li va tokwera po nare, erongo lyokuzeruka, ungawo ntani kukara muntu gomuwa. Yipo nye, kuhuguvara moyininke yangoso kuna fana ngwendi kuna kuruganesa karata zepuko o ze kevango eli wa dira kudiva. Eyi kutanta nye asi kapi pwa kara mavyukiso kuhamena meho ndi? Hawe!

Apa atu tura po matokoro, ose narunye kupura ko gumwe ogu ga kara asi mukondi ntani ga tu pita monondunge. Mokulifana, ose kuvhura kugwana mavyukiso gomawa kuhamena meho kwagumwe ogu ga kara po kutunda kwanare ntani ga tu pitakana monondunge. Mapukururo gokutunda kwendi kugagwana momatjangwa gokupongoka aga va tjenge konyara nomvhura 3 500 da ka pita. Matjangwa aga gokupongoka kwa kara mobuke ava tumbura asi Bibeli.

Morwasinke no huguvarera Bibeli? Morwa ogu ga zi retesa po yige Mukondi po mouzuni mudima ntani nondunge. Age kumusingonona asi “ogu ga kererera po” age hena ‘gwanarunye ga hana etameko nouhura.’ (Ndaniyera 7:9; Episarome 90:2) Age kwa “sita eguru age yige Karunga!” (Jesaya 45:18) Age kulitumbura mwene kedina asi yige Jehova.—Episarome 83:18, NW.

Morwa Bibeli kwa tunda koMusiti govantu navenye, azo kapi azi tanta asi mpo ndi rudi rumwe mulyo kupitakana marudi makwawo. Mapukururo gamo kapi aga kurupa ntani vantu womoyirongo nayinye kuvhura kugwanena mo mauwa. Azo kuzigwana momaraka gomanzi ntani kwa zi hanesa unene kupitakana nobuke dapeke. * Eyi kutanta asi vantu navenye kuvhura kuzikwata egano nokuvavyukisa. Eyi ya liza neyi za uyunga ko Bibeli zene:

“Karunga kapi ga paka mpongo, nye mwankenye muhoko nkenye ogu a mu tjira, nye ta rugana youhunga, ta mu tambura.”—YIRUGANA 10:34, 35.

Ngwendi moomu vakondi va hara vana vawo nokuvavatera, Jehova Karunga age Guhya geharo ogu a tu vatere kupitira moNonkango dendi, Bibeli. (2 Timoteusa 3:16) Ove kuvhura o huguvare Nonkango dendi morwa yige ga tu sita ntani ga diva eyi ayi tu retere ruhafo.

Yisinke wa hepa kurugana o ka kare meho zangoso? Resa sirongwa sokukwama ko.