Ki Lika Mañi Zekona Kulutusa Kuba ni Bupilo Bobunde Kwapili?

MUBAPALE

Sina molunyakisiselize mwa litaba zefelile, batu balikile kubata linzila zekona kubatusa kutoba ni bupilo bobunde kwapili, zecwale ka kulumela kuli lika nelilelezwi cimo, kundongwama tuto yepahami, kubata hahulu sifumu, ni kubonisa mikwa yeminde. Kunahana kuli lika zeo kaili zona feela zakona kulutusa kuto ba ni bupilo bobunde kwapili, kuswana inge kukakanyezwa nzila ki mutu yasazibi hande sibaka seo. Kono kana fo kutalusa kuli hakuna zekona kumitusa kutoba ni bupilo bobunde kwapili? Batili!

KETELELO YEZWA KU MULIMU

Hañata haluezanga likatulo, lubuzanga batu babahulu ku luna ili babanani yeloseli kulufita. Ka nzila yeswana, kunani yakona kulutusa kuli lube ni bupilo bobunde kwapili ili yomuhulu hahulu ku luna ni yabutali kulufita. Lwakona kufumana likelezo zekona kulutusa mwa buka yahae ya Mañolo Akenile yeneñozwi lilimo zebato eza 3,500 kwamulaho. Buka yeo ki Bibele.

Ki kabakalañi halukona kusepa Bibele? Kakuli Musimululi wayona ki yabutali ka kufitisisa mwa pupo kaufela. Bibele imutalusa kuli ki “Yomuhulu wa Mazazi” mi ubile teñi “kuzwa linako zesina makalelo kuisa linako zesina mafelelezo.” (Daniele 7:9; Samu 90:2) Ki yena “Mubupi wa mahalimu, yena Mulimu wa niti,yena yaezize lifasi.” (Isaya 45:18) Ulutaluseza kuli libizo lahae ki Jehova.—Samu 83:18.

Bakeñisa kuli Bibele izwa ku Mulimu yabupile batu kaufela, haibuleli kuli mushobo wa batu babañwi ki wa butokwa kufita omuñwi. Likelezo zefumaneha mwateñi lisebeza ka nako kaufela mi litusize batu babañata mwa lifasi kaufela. Bibele yafumaneha mwa lipuo zeñata mi batu babañata banani yona kufita buka ifi kamba ifi. * Taba yeo italusa kuli batu kai ni kai bakona kuipalela Bibele mi yakona kubatusa. Litaba ze, lilumelelana ni zeibulela Bibele:

“Mulimu haketululi, kono mwa sicaba ni sicaba mutu kaufela yamusaba ni kueza sesilukile ulumelelwa ki yena.” —LIKEZO 10:34, 35.

Sina feela mushemi yalilato hababalelanga ni kutusa bana bahae, Jehova Mulimu ki Ndate yalilato yalutusanga ka kuitusisa Linzwi lahae, yona Bibele. (2 Timotea 3:16) Mwakona kusepa Linzwi lahae kakuli ki yena yalubupile mi waziba zekona kulutusa kuba ni tabo.

LWAKONA KUSEPA BIBELE

Lunani buikolwiso bwa kuli Bibele yakona kulutusa kuba ni bupilo bobunde kwapili kakuli ibato ba lilimo ze 2,000 kwamulaho, neipolofitile lika zeneka ezahala mwa lifasi ni mikwa ya batu yeluiponela kacenu.

LIKA ZENE IPOLOFITILE BIBELE

“Sicaba sikalwanisa sicaba sesiñwi, ni mubuso ulwanise mubuso omuñwi. Kukaba ni lizikinyeho zetuna, ni kutaela kwa lico ni matuku ayambukela mwa sibaka sesiñwi kuya ku sesiñwi.”—LUKA 21:10, 11.

MIKWA YENE IPOLOFITILWE KI BIBELE

“Mwa mazazi a mafelelezo kukataha linako zetaata, zeziyeza. Kakuli batu bakaba baitati, babalata masheleñi, babaitumbaeta, babaikankabeka, babanyefula, babasa utwi bashemi babona, babasina buitumelo, babasa sepahali, babasina lilato la sipepo, babañañelela mihupulo yabona, masawana, babasina buiswalo, bababuhali, babasa lati bunde, babeteki, ba muñañatoho, babaitundumuna ka buikuhumuso, babalata minyaka kufita kulata Mulimu.”—2 TIMOTEA 3:1-4.

Ki kabakalañi bupolofita bo habutalelelizwe ka kunepahala? Kusina kukakanya, mwakona kulumelelana ni zene babulezi bo Leung, ba kwa Hong Kong, bane babulezi kuli: “Bupolofita bwa mwa Bibele bo, nebuñozwi lilimo-limo kwamulaho koo. Hakuna mutu yakona kupolofita lika ze ka kunepahala cwana. Kubonahala kuli Bibele neiñozwi ka susumezo ya mutu yamaata kulufita.”

Mwa Bibele kunani bupolofita bobuñata bobutalelelizwe. * Bupolofita bo bubonisa kuli Bibele luli ki Linzwi la Mulimu. Jehova kasibili uli: “Ki na Mulimu, mi hakuna yaswana ni na. Nipolofita mafelelezo a taba isali kwa makalelo.” (Isaya 46:9, 10) Kacwalo, mwakona kusepa zeibulela Bibele ka za lika zekaezahala kwapili.

ZEKONA KUMITUSA KA NAKO YACWALE NI KUYA KUILE

Kulatelela zefumaneha mwa Mañolo Akenile kwakona kumitusa hahulu luli. Hamunyakisise mitala yelatelela.

MUKABA NI MUBONELO OSWANELA KA ZA MASHELEÑI NI MUSEBEZI

“Ki hande kupumula hanyinyani kufita kubeleka hahulu ka taata ni kumatisa moya.”—MUEKELESIA 4:6.

MUKABA NI TABO MWA LUBASI

“Yomuñwi ni yomuñwi wamina alate musalaa hae ka mwaitatela; mi musali yena uswanela kukuteka hahulu muunaa hae.”—MAEFESE 5:33.

MUKAPILISANA HANDE NI BABAÑWI

“Lisela buhali mi utuhele mabifi; usike wafilikana ni kukala kueza zemaswe.”—SAMU 37:8.

Kusebelisa zeibulela Bibele kwakona kumitusa ka nako yacwale mi hape kwakona kumitusa kuba ni bupilo bobunde kwapili. Mwa Bibele, kunani lisepiso zende zasepisize Mulimu, zecwale ka zelatelela:

BATU BAKAPILA MWA KOZO NI BUIKETO

“Bakataba hahulu kabakala kozo yetuna.”—SAMU 37:11.

BATU KAUFELA BAKABA NI MANDU ABONA NI LICO ZEÑATA

“Bakayaha mandu ni kupila mwateñi, mi bakacala masimu a likota za veine ni kuca miselo yazona.”—ISAYA 65:21.

HAKUSANA YAKAKULA KAMBA KUSHWA

“Lifu halisana kubateñi, nihaiba kutahelwa ki maswabi kamba kulila kamba kuutwa butuku.”—SINULO 21:4.

Ki lika mañi zemuswanela kueza kuli muto ikola limbuyoti zeo? Munyakisise taba yelatelela.

^ para. 6 Kuli muzibe litaba zeñata ka za musebezi wa kutoloka ni kuhasanya Bibele, mukene fa webusaiti ya www.pr418.com mi mubone mwatasaa LITUTO ZA MWA BIBELE > LITABA ZEEZAHEZI KWAMULAHO NI BIBELE.

^ para. 16 Kuli mubale litaba zeñata, mubone kauhanyo 9 ya buka ya The Bible—God’s Word or Man’s? yehatisizwe ki Lipaki za Jehova. Yafumaneha ni fa Webusaiti ya www.pr418.com. Mubone mwatasaa LIBRARY > BOOKS & BROCHURES.