Chuma Muka Nachitukafwa Tupwenga naChiyoyelo Chamwaza?
Nganomu twashimutwilanga muvihande vinafumuho, vatu vanafwilanga kupwa nachiyoyelo chamwaza. Shikaho vanafwelelanga ngwavo chuma kana chinahase kutesamo nge vapwa vakutokwa, nakutanga mashikola, nakupwa naluheto namuchima wamwaza. Oloze kufwelela muvyuma kana kacheshi kukafwa mutu apwenga nachiyoyelo chamwazako. Uno echi chili nakulumbununa nge kakweshi chuma nachitukafwa tupwenga nachiyoyelo chamwazako tahi? Nduma.
CHUMA CHAKUFUMA KULI MUTU WAMULEMU CHIKUMA
Kakavulu nge tuli nakusaka kusakula vyakulinga, tweji kuhulisanga mutu uze natuzomboka mumyaka namumangana. Chochimwe nawa, nayetu tunahase kuwana chuma chakutukafwa tupwenga nachiyoyelo chamwaza kuli mutu uze atuzomboka mumyaka namumangana. Mutu kana atuhana mazu enyi kuhichila mumikanda yajila yize vaputukile kusoneka kafwe myaka 3,500 kunyima. Eyi mikanda yajila yatwama mumukanda vavuluka ngwavo Mbimbiliya.
Mwomwo ika mwatela kufwelela Mbimbiliya? Mwomwo Mwenyayo nashimbula chikuma kaha nawa wamangana chikuma kuhambakana vaka-kuyoya vosena. Vamuvuluka ngwavo “ou Napungako Kufuma Kushikulu” kaha nawa afuma “kumyaka yosena nakuya kumyaka yosena.” (Ndanyele 7:9; Samu 90:2) Ikiye “Kalunga wamuchano, Ou atengele melu, Ou atengele mavu.” (Isaya 45:18) Atulweza ngwenyi lijina lyenyi ikiye Yehova.—Samu 83:18.
Hakuwana nge Mbimbiliya yafuma kuli Tengi uze atengele vatu vosena, ngocho kayavuluka ngwayo chisemwa chimwe chipwe chikova chimwe chachilemu kuhambakana vikwavoko. Mazu ayo kawasekako kaha nawa anakafwe vatu vakumafuchi osena. Mbimbiliya yili mumalimi amavulu chikuma kaha nawa himukanda uze vali nakupangila chikuma kuvatu kuhambakana mikanda yeka. * Echi chalumbununa nge vatu vakuvihela vyosena vanahase kuyivwishisa nakuvakafwa mukuyoya chavo. Vishina kana vyalitombola navyuma yahanjika Mbimbiliya ngwayo:
“Kalunga katala vatu kumesoko, oloze muli vaka-miyachi yosena, ou eji kumwivwanga woma nakulinganga vyuma vyakwoloka, veji kumwitavilanga kuli Kalunga.”—VILINGA 10:34, 35.
Ngana mwachisemi wazangi uze eji kukafwanga vana venyi, naYehova Kalunga apwa chisemi wazangi uze eji kutukafwanga kuhichila mumazu enyi Mbimbiliya. (WaChimoteu 2, 3:16) Mwatela kufwelela mazu enyi mwomwo ikiye atutengele shikaho atachikiza vyuma vize navitukafwa.
Vyuma muka mwatela kulinga mangana mukapweko halwola kana? Wanenu omu chihande chinakavangizaho chinakumbulula chihula kana.
^ par. 6 Hakusaka mutachikize omwo vali nakwalumuna Mbimbiliya nakuyipangila kuvatu, yenu ha www.pr418.com/lue haze vanavuluka ngwavo VYUMA YANANGULA MBIMBILIYA > MIJIMBU YAKUSHIKULU NAMBIMBILIYA.
^ par. 16 Nge muli nakusaka vyavivulu, kaha talenu mukanda wakwamba ngwavo, The Bible—God’s Word or Man’s? kapetulu 9 uze vasoneka kuli Vinjiho jaYehova. Uli hakeyala ya www.pr418.com haze vanasoneka ngwavo LIBRARY > BOOKS & BROCHURES.
Pamo Nauzanga Nawa
KAPOSHI KAKUTALILA
Mbimbiliya Yahanjika Muchano haVyuma Navikasoloka Kulutwe
Jikijisenu lufwelelo lwenu hakushinganyeka havyuma vize ahanjika Kalunga ngwenyi navikasoloka kulutwe hano hamavu nakuvatu vaze navakatwamaho.
KAPOSHI KAKUTALILA
Uno Mbimbiliya Yinahase Kututwaminyina Makumbi Ano Tahi?
Hakuwana nge kuli vyuma vyavivulu vize vinahase kukafwa vatu makumbi ano, mwomwo ika vatu vatela kupendamina haMbimbiliya, mukanda wakushikulu uze vasonekele kafwe myaka 2000 kunyima?
KAPOSHI KAKUTALILA
Vyuma Yahanjika Mbimbiliya Kutalisa kuKuyoya Chetu Chakulutwe
Mazu aKalunga anahase kutukafwa tulipike naukalu wahakumbi hakumbi uze tweji kumonanga mukaye kano kakuhuka. Oloze Mbimbiliya yinahase kutukafwa. Kaha nawa yahanjika havyuma vyamwaza vyakulutwe
