Wa d sẽn yã sõsg ning sẽn loogã pʋgẽ wã, neb wʋsg teega zu-noogã, karengã, arzɛkã, la b modgd n yaa nin-sõngo, n tẽed tɩ rẽ n na n kɩt tɩ b beoog yɩ neere. Ned sã n teeg bõn-kãensã n dat n paam t’a beoog yɩ neere, yaa wa a sẽn dat n kẽng zĩig a sẽn ka mi, n yaool n zãad kart sẽn pa wilgd so-sõngã ye. Woto rat n yeelame tɩ bũmb kae n tõe n sõng-d tɩ d bãng d sẽn tõe n maan n paam tɩ d beoog yɩ neer bɩ? Ayo, bũmb beeme.

Naoor wʋsgo, d sã n wa rat n yãk yam n maan bũmbu, d baooda sagls ned yam la a yʋʋm sẽn yɩɩd tõnd nengẽ. Woto me, d tõe n paama sagls sẽn na n sõng-d tɩ d beoog yɩ neere, soab ning yam la a yʋʋm sẽn yɩɩd tõnd hal zĩig sẽn zãrã nengẽ. A saglsã bee sebr a sẽn kɩt tɩ b gʋls na maan yʋʋm 3500 woto pʋgẽ. B boonda seb-kãng tɩ Biiblã.

Bõe yĩng tɩ y tõe n tẽ Biiblã sẽn yetã? Bala yaa soab ning yʋʋm la a yam sẽn yɩɩd tõnd hal zĩig sẽn zãrã n kɩt tɩ b gʋls-a. B boond-a lame tɩ “wakat fãa naaba,” la soab ning “sẽn be wakat sẽn ka sɩngr tɩ ta wakat sẽn ka sɛɛbo.” (Dãniyɛll 7:9; Yɩɩn-sõamyã 90:2, Wẽnnaam Sebre, 1983) Yẽ la “saasã naandã,” la “dũniyã naanda.” (Ezayi 45:18) A yeelame t’a yʋʋrã meng yaa a Zeova.—Yɩɩn-sõamyã 83:18, MN.

Biiblã pa wilgd tɩ buud n be n yɩɩd a to ye. Bala yaa sẽn naan-a ninsaalbã fãa wã n kɩt tɩ b gʋls Biiblã. A saglsã nafda wakat fãa, la sõngd ned buud fãa. A bee ne buud-goam wʋsg n yɩɩd sebr buud fãa. Sebr a to me kae, tɩ b yiis-a wʋsg n ta Biiblã ye. * Woto rat n yeelame tɩ ned buud fãa tõe n paam-a lame n karme, tɩ sõng-a. Ad Biiblã meng sẽn yete, tɩ wilgd rẽ:

“Wẽnnaam pa tũusd neda, la tɩ buud fãa pʋgẽ, ned ning sẽn zoet bãmb la a maand sẽn yaa tɩrg tata bãmb yam.”—TƲƲMA 10:34, 35.

Wa roagd sẽn nong a kamb sẽn sagend-bã, Wẽnnaam a Zeova sẽn yaa d Ba sẽn nong-dã me tũnugda ne Biiblã sẽn yaa a Gomdã n sagend tõndo. (2 Tɩmote 3:16) Y tõe n kɩsa a Gomdã sɩda. Bala Wẽnnaam n naan tõndo, n mi bũmb ning sẽn tõe n kõ-d sũ-noogo.

Bõe la y segd n maane, n wa paam bark-kãensã? Bɩ y karem sõsg ning sẽn pʋgdã.