Kej tikitstokej, miakej maseualmej motemachiaj kuali itstosej tlaj tlauel momachtisej, tlaj tlauel tlatominpiasej o tlaj kuali monejnemiltisej. Tlaj timotemachiskiaj ipan ni tlamantli eliskia kejuak tijtekiuiskiaj se mapa tlen amo kuali kichijtokej. Maske kiampa pano, kena onka se tlamantli tlen kuali techyakanas uan techpaleuis kuali ma tiitstokaj teipa.

Kema tijnekij tijtlapejpenisej se tlenijki, kemantika tikiljuiaj ma techpaleui se akajya katli tlalnamiki o katli ya ueyi. Yeka, tlaj tijnekij kuali tiitstosej teipa, moneki techyakanas se akajya katli tlauel tlalnamiki. Biblia kipia se 3,500 xiuitl kema pejki moijkuiloua uan ni amochtli kena kuali techyakanas.

¿Kenke uelis timotemachisej ipan Biblia? Pampa katli kichijki ma moijkuilo tlauel tlalnamiki. Ya “Nochipa Itstok” uan ‘axkema kipixki ipejya uan axkema kipias itlamia’ (Daniel 7:9; Salmo 90:2). Uan ya katli “kichijchijki iluikaktli uan Tlaltipaktli” (Isaías 45:18). Ya kiijtoua itoka Jehová (Salmo 83:18, TNM).

Katli kichijki ma moijkuilo Biblia nojkia kinchijchijki maseualmej, yeka techmachtia amo ma timochikoitakaj. Tlen Biblia tetlajtolmaka kinpaleuijtok tlauel miakej maseualmej. Nopa amochtli motlajtolkueptok ipan miak tlajtoli uan momoyajtok ipan nochi Tlaltipaktli. * Yeka, nochi uelis kikuamachilisej uan uelis kinpaleuis. Biblia kiijtoua:

“ToTeko axtechchikoiknelia titlakamej. Uan ipan kampa ueli tlali yajaya kinselia nopa tlakamej tlen kitlepanitaj uan tlen kichiuaj tlen kuali” (HECHOS 10:34, 35).

ToTeotsij Jehová eli kej se tetaj katli kiniknelia uan kinpaleuia ikoneuaj, uan yeka techpaleuia ika iTlajtol (2 Timoteo 3:16). Ta uelis timotemachis ipan Biblia, pampa Jehová techchijchijki uan kimati tlake uelis techpaleuis.

¿Tlake moneki tijchiuas tlaj tijneki tijselis ni tlateochiualistli? Ni moixtomas ipan nopa seyok tlamachtili.