Yotikitakej miakej kinekij kuali yetoskej satepan, ik non, kineltokaj itlaj yikajki tlen kiteititia tlen kinpanos satepan, okachi momachtiaj, kitemouaj kipiaskej miak tomin noso oksekimej kinekij yetoskej yolkualmej. Pero non yetoskia ken kitaj se mapa tlen amo kuali kajki. Non amo kijtosneki amikaj uelis techpaleuis para kuali tiyetoskej satepan.

Ijkuak itlaj tikpejpenaj tikchiuaskej achto tikiluiaj ma techpaleui akin yikipia miak xiuitl noso akin okachi ixtlamatki. Ik non, tla tiknekij kuali tiyetoskej satepan, moneki ma techpaleui akin okachi kimati uan okachi ixtlamatki. Uelis techpaleuis se amochtli tlen yiuejkika omoijkuilo, yikipia kanaj tres mil quinientos xiuitl. Non amochtli, Biblia.

¿Tleka uelis tikneltokas tlen kijtoua Biblia? Porque akin okijkuilo okachi ixtlamatki. Ye “Akin nochipa kajki” ‘uan nochipa yetos’ (Daniel 7:9; Salmo 90:2). Biblia kijtoua ye “oKichijchi iluikak, Ye akin melauak toTajtsin Dios, akin okichijchi tlaltikpak” (Isaías 45:18). Uan techiluia itoka Jehová (Salmo 83:18).

Tlen ijkuilitok itech Biblia iaxka toTajtsin Dios uan ye otechchijchi, ik non, ye techititia amo ma timochikoitakan. Tlen techiluia yokinpaleui miakej. Non amochtli yomotlajtolkopki ika miak tlatlamantli tlajtolmej uan yokixexelojkej itech nochi tlaltikpak. * Ik non, nochtin uelis kajsikamatiskej uan uelis kichiuaskej tlen ompa kijtoua. Biblia kijtoua:

“Dios amo kintlasojtla san sikimeh, iwa oksikimeh amó, yej itech nochi nin tlaltíkpaktli, Dios kinselia akimeh kitlakitah iwa kichiwah tlan kuali” (HECHOS 10:34, 35).

Ijkon ken se teta kintlasojtla uan kinpaleuia ikoneuan, toTajtsin Jehová techtlasojtla uan techpaleuia ika iTlajtol Biblia (2 Timoteo 3:16). Uelis tikneltokas tlen kijtoua iTlajtol toTajtsin Dios porque ye otechchijchi uan kimati ken techpaleuis.

¿Tlen moneki tikchiuas para ijkon kuali tiyetos? Non tikitas itech okse tlamachtil.