Openi to vulu okwaadha omayele ngoka tage ku kwathele wu ka mone onakuyiwa ombwanawa?

DHANA

Ngaashi sha kundathanwa miitopolwa ya tetekele, aantu oya kambadhala okwiimonena onakuyiwa ombwanawa mokukala yi inekela muumpulile, melongo, momaliko nomokukala aantu ye li nawa. Uuna aantu taya ningi ngawo, oya fa owala omuntu ta longitha okaalita ke na oondanda dhimwe dha dhima po, hoka take ya kwathele ya mone kehala hoka ya hala. Mbela shoka osha hala okutya kapu na shoka tashi tu kwathele tu ka mone onakuyiwa ombwanawa? Hasho nando!

EWILIKO NDYOKA HALI ZI KONZO YA DHENGA MBANDA

Uuna tatu ningi omatokolo, olundji ohatu pula gumwe ngoka omukuluntu kutse noku na oondunge e tu vule. Sha faathana, natse otatu vulu okumona uuyelele wu shi okwiinekelwa kombinga yonakuyiwa kuGumwe ngoka e na oondunge dhi vule dhetu kokulekule. Otatu vulu okulesha uuyelele mboka membo limwe eyapuki ndyoka lya nyolwa nalenale konima yomimvo 3 500. Embo ndyoka eyapuki, Ombiimbeli.

Omolwashike to vulu okwiinekela shoka Ombiimbeli tayi ti? Omolwaashoka Omunyoli gwayo, Omuntu ngoka a kala ko nalenale, ye oye owala e na oondunge a shiga ko meshito alihe. Ombiimbeli otayi mu popi kutya ‘ooNgoka ta kala e na omwenyo aluhe sigo aluhe’ ngoka ‘oko a li nota ka kala aluhe sigo aluhe.’ (Daniel 7:9; Episalomi 90:2) Oye a “shiti egulu oye awike Kalunga! Oye a tholoma evi.” (Jesaja 45:18) Oti ipopi ye mwene kutya edhina lye oJehova. — Eksodus 15:3 OB-1954.

Molwaashoka Ombiimbeli oya za kwaangoka a shita aantu ayehe, itayi ti kutya omuhoko gumwe ogu li nawa gu vule omikwawo. Omayele gayo ohaga kwathele aluhe noge etela aantu yomiilongo ayihe uuwanawa. Oyi li momalaka ogendji, na oyo owala yi niwe kaantu oyendji yi vule omambo galwe. * Shika osha hala okutya, aantu kehe pamwe otaya vulu oku yi uva ko nuupu notayi vulu oku ya wilika. Shika otashi tsu kumwe noohapu ndhika tadhi landula ko, dha za mOmbiimbeli:

“Kalunga aantu ayehe ohe ya tala ye thike pamwe. Ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini.” — IILONGA 10:34, 35.

Ngaashi owala omuvali omunahole ha kwathele oyana, Jehova Kalunga, oTate omunahole, ngoka he tu kwathele okupitila mOohapu dhe, Ombiimbeli. (2 Timoteus 3:16) Molwaashoka oye e tu shita noku shi shoka tashi tu opalele, otatu vulu okwiinekela Oohapu dhe.

EWILIKO NDYOKA LI SHI OKWIINEKELWA

Otatu vulu okukala nuushili kutya Ombiimbeli oyi na uuyelele wu shi okwiinekelwa wu na ko nasha nonakuyiwa, oshoka konima yomimvo 2 000 nasha dha ka pita, oya hunganeka kondandalunde iiningwanima nosho wo eihumbato lyaantu ndyoka hatu mono kunena.

IININGWANIMA

“Iigwana otayi ka thikama okukondjithathana, niilongo otayi ka matukilathana. Otaku ke ya omakakamo gevi omatilithi, oondjala nomalega koombinga noombinga. Kegulu otaku ka holoka iitilithi iinene nomandhindhiliko omakumithi.” — LUKAS 21:10, 11.

EIHUMBATO

“Dhimbulukwa aluhe kutya komasiku gokomeho otaku ke ya omathimbo omadhigu. Aantu otaa ka kala nokwiihola, ye hole eliko, aainomi noye hole uuntsa. Otaa ka kala aasheki, ihaa vulika kaakuluntu yawo, ihaa pandula noya pota. Oyo otaa ka kala yaa na olukeno nohenda, haa lundilathana, aapwidhi naadhudhu; otaa kala ye tonde uuwanawa. Otaa kala aakotokeli, ihaa yawala, haa tuwalala noye hole iihulo peha lyokuhola Kalunga.” — 2 TIMOTEUS 3:1-4.

Ongiini tashi wapa Ombiimbeli yi hunganeke lela mondjila kombinga yiinima mbyoka tayi ningwa kunena? Kapu na omalimbililo kutya nangoye oto tsu kumwe nomulumentu gwedhina Leung, gwokoHong Kong, ngoka a ti: “Omahunganeko gomOmbiimbeli oga nyolwa nalenale. Itashi wapa aantu ya hunganeke iinima mbyoka tu wete tayi ningwa kunena. Onkee ano, Ombiimbeli oyi na okukala ya nyolithwa komuntu ngoka e na oondunge dhi vule dhetu kokulekule.”

Ombiimbeli oyi na omahunganeko ogendji ngoka ga gwanithwa nale. * Shika otashi ulike lela kutya Ombiimbeli Oohapu shili dhaKalunga. Jehova ota ti: “Ongame awike Kalunga, nokaku na we gulwe e thike pungame. Okuza kontsapo onda hunganeke mbyoka tayi ya.” (Jesaja 46:9, 10) Onkee ano, oto vulu okwiinekela lela shoka Ombiimbeli tayi ti kombinga yonakuyiwa, omolwetompelo ndika ewanawa.

EWILIKO NDYOKA TALI KU ETELE UUWANAWA NGASHINGEYI NOSIGO ALUHE

Ngele owa landula ewiliko ndyoka li li mOmbiimbeli, oto ka mona uuwanawa. Tala kiiholelwa yimwe tayi landula.

ETALOKO LI LI PANDJELE KOMBINGA YIIMALIWA NOSHO WO YIILONGA

“Ekaminina lyevululuko oli vule eshambekela lyu udha uupyakadhi nokutidha ombepo.” — OMUUVITHI 4:6.

NKENE TO VULU OKUKALA NUUKWANEGUMBO WA NYANYUKWA

“Omulumentu kehe oku na okuhola omukiintu gwe, ngashika i ihole ye mwene, nomukiintu kehe oku na okusimaneka omulumentu gwe.” — AAEFESO 5:33.

NKENE WU NA OKULONGELA KUMWE NAYALWE

“Ino iyethela moshimpwiyu nenge muugeyi; mbika ayihe otayi fala muupyakadhi.” — EPISALOMI 37:8.

Ngele owa kala ho ningi shoka Ombiimbeli tayi ti, otashi ku etele uuwanawa ngashingeyi noto ka kala wu na onkalamwenyo ombwanawa monakuyiwa. MOmbiimbeli omu na omauvaneko gaKalunga omawanawa ngoka ga kwatela mo iinima tayi landula:

OMBILI NEGAMENO

“Otaa ka thigulula evi notaa ka mona uulinawa nombili.” — EPISALOMI 37:11.

OMAGUMBO NIIKULYA YA GWANA

“Otaa ka tunga omagumbo, opo ya kale mo yo yene. Otaa ka tsika omiviinu, opo ya lye iiyimati yadho yo yene.” — JESAJA 65:21.

ITAKU KA KALA WE UUWEHAME NENGE ESO

‘Oko noitaku ka kala we eso, oluhodhi, elilo nenge uuwehame. Oshoka iikulu oya hula po.’ — EHOLOLO 21:4.

Oshike wu na okuninga, opo wu ka mone onakuyiwa ndjoka ombwanawa? Tala oshitopolwa tashi landula.

^ okat. 6 Opo wu mone uuyelele kombinga yankene Ombiimbeli ya tolokwa nokwaandjaganekwa, inda kepandja lyokointaneta www.pr418.com, kohi yoshitopolwa BIBLE TEACHINGS > HISTORY & THE BIBLE.

^ okat. 16 Opo wu mone uuyelele owundji, tala ontopolwa 9 yembo The Bible — God’s Word or Man’s? lya nyanyangidhwa kOonzapo dhaJehova. Oli li kepandja lyokointaneta www.pr418.com. Tala kohi yoshitopolwa LIBRARY > BOOKS & BROCHURES.

Opu na ishewe uuyelele mbuka

OSHUNGOLANGELO

Oshili kombinga yonakuyiwa

Koleka etegameno lyoye mwaashoka Kalunga ta ti kombinga yankene evi tali ka kala monakuyiwa nosho wo kombinga yaantu mboka taya ka kala ko.

OSHUNGOLANGELO

Ewiliko lyOmbiimbeli oli na oshilonga kunena?

Ngele opu na uuyelele awuhe mboka wu li pethimbo, omolwashike wu na okulongitha Ombiimbeli ndjoka ya nyolwa pwa pita omimvo 2 000 nasha lwaampono?

OSHUNGOLANGELO

Ombiimbeli nonakuyiwa yoye

Oohapu dhaKalunga otadhi vulu oku tu kwathela tu ungaunge naashoka tashi holoka komeho getu, ano omaupyakadhi gakehe siku ngoka hage tu adha muuyuni mbuka. Ihe Ombiimbeli ohayi tu kwathele momukalo gwa dhenga mbanda. Ohayi gandja wo uuyelele kombinga yonakuyiwa.

OSHUNGOLANGELO