Re ka Thušwa ke Eng go ba le Bokamoso bjo Bobotse?

BAPALA

Bjale ka ge re šetše re kwele dihlogong tšeo di fetilego, batho ba be ba nagana gore go rutega kudu, go ba le tšhelete e ntši, go ba botho le go phasa badimo go be go tlo ba thuša gore ba be le bokamoso bjo bobotse. Le ga go le bjalo, go dira dilo tše bjalo go no swana le ge motho a diriša mmapa woo o sego wa lefelo leo a yago go lona gore a fihle lefelong leo. Na se se ra gore re ka se tsoge re hweditše selo seo se ka re thušago gore re be le bokamoso bjo bobotse? Aowa!

KELETŠO YEO E TŠWAGO GO MOTHO YO RE KA MO TSHEPAGO

Gantši ge re dira diphetho re boledišana le batho bao ba godilego goba bao ba lego bohlale go feta rena. Ka mo go swanago, le rena re ka hwetša tlhahlo yeo re ka e tshepago go tšwa go yo mongwe Yo mogolo yo a fetago dilo ka moka le yo bohlale. Re ka bala keletšo ya Gagwe ka pukung yeo e bitšwago Beibele, yeo e ngwadilwego mengwaga e ka bago e 3 500 e fetilego.

Ke ka baka la’ng, o swanetše go tshepa Beibele? Ka gobane e tšwa go motho yo bohlale legodimong le lefaseng. O hlaloswa e le “Motala wa Mabaka” le wa “go tloga mehleng ya neng le neng go iša mehleng ya neng le neng.” (Daniele 7:9; Dipsalme 90:2) Ke “Mmopi wa magodimo, Yena Modimo wa therešo, Mohlami wa lefase.” (Jesaya 45:18) O re botša gore leina la gagwe ke Jehofa.—Dipsalme 83:18.

Beibele e ngwadilwe ke Mmopi yo a bopilego batho ka moka. Ka gona, ga e kgetholle gore motho ke wa setšo sefe goba o bolela leleme lefe. Keletšo ya yona e dula e šoma e bile e thušitše batho ba bantši lefaseng ka moka. E hwetšagala ka maleme a mantši, e bile ga go na puku yeo e ilego ya abja lefaseng go swana le Beibele. * Ka gona batho ba bantši ba ka e bala e bile e ka ba thuša. Se se dumelelana le seo Beibele e se bolelago ge e re:

“Modimo ga a bebe sefahlego, eupša setšhabeng se sengwe le se sengwe motho yo a mmoifago gomme a dira se se lokilego o a amogelega go yena.”—DITIRO 10:34, 35.

Go swana le batswadi bao ba ratago bana ba bona e bile ba nyaka go ba thuša, Jehofa le yena o swana le tate yo lerato yo a ikemišeditšego go re thuša a diriša lentšu la gagwe e lego Beibele. (2 Timotheo 3:16) O ka tshepa lentšu la gagwe ka gobane ke yena a re bopilego e bile o tseba seo se ka re thabišago.

RE KA TSHEPA BEIBELE

Re ka tshepa seo Beibele e se bolelago ka bokamoso, ka gobane re bona dilo tšeo Beibele e di boletšego e sa le pele mengwaga e 2 000 e fetilego di direga lehono.

DITIRAGALO TŠEO BEIBELE E DI BOLETŠEGO E SA LE PELE GORE DI TLO DIREGA:

“Setšhaba se tla tsogela setšhaba gomme mmušo wa tsogela mmušo. Go tla ba le ditšhišinyego tše dikgolo tša lefase, go be le leuba la malwetši le tlhaelelo ya dijo lefelong le lengwe ka morago ga le lengwe.”—LUKA 21:10, 11.

BEIBELE E BOLETŠE E SA LE PELE GORE BATHO BA TLA ITSHWARA BJANG:

“Mehleng ya bofelo go tla ba le dinako tše di hlobaetšago tšeo go lego thata go lebeletšana le tšona. Gobane batho e tla ba baithati, barati ba tšhelete, ba go ikgantšha, ba ikgogomošago, barogaki, ba go se kwe batswadi, ba go se leboge, ba go se botege, ba ba se nago lerato la tlhago, ba ba sa ikemišetšago go amogela tumelelano le ge e le efe, bathomeletši, ba se nago boitshwaro, ba bogale, ba go se rate go loka, baeki, ba hlogothata, ba tletšego boikgantšho, ba ratago maipshino go e na le go rata Modimo.”—2 TIMOTHEO 3:1-4.

O ka reng ka dilo tšeo Beibele e di boletšego kgalekgale tšeo di diregago lehono? Ga go pelaelo gore le wena o ka dumelelana le seo Leung, yo a tšwago Hong Kong a se boletšego ge a re: “Diporofeto tša Beibele di ngwadilwe kgalekgale. Ga go kgonege gore motho a bolele e sa le pele ka dilo tšeo di tlago go direga, gomme dilo tšeo tša direga ka tsela e nepagetšego. Beibele e swanetše go ba e etšwa go motho yo a lego bohlale go re feta.”

Beibele e na le diporofeto tše dintši-ntši tšeo di šetšego di diragetše. * Bjo ke bohlatse bja gore ka nnete Beibele ke lentšu la Modimo. Jehofa o re, “Ke nna Modimo, ga go na yo a swanago le nna. Yo a bolelago go tloga mathomong dilo tša mafelelo.” (Jesaya 46:9, 10) Ge e ba go e na le mabaka a kwagalago a gore o tshepe Beibele, gona o ka ithuta yona gore o tsebe ka bokamoso.

TLHAHLO YEO E KA GO HOLAGO GONA BJALE LE NAKONG E TLAGO

Ge o diriša tlhahlo yeo e lego ka Mangwalong a Makgethwa, o tlo holega. Bona mehlala e latelago.

KELETŠO E BOTSE MABAPI LE TŠHELETE LE MOŠOMO

“Seatla se se tletšego khutšo se phala diatla tše pedi tše di tletšego boitapišo gotee le go kitimiša phefo.”—MMOLEDI 4:6.

KAMOO O KA BAGO LE LAPA LEO LE THABILEGO

“Yo mongwe le yo mongwe wa lena a rate mosadi wa gagwe bjalo ka ge a ithata; ka lehlakoreng le lengwe, mosadi o swanetše go ba le tlhompho e tseneletšego go monna wa gagwe.”—BAEFESO 5:33.

KAMOO O KA PHEDIŠANAGO LE BA BANGWE

“Lesa go galefa gomme o tlogele go befelwa; O se tlale pelo, gobane seo se lebiša bobeng.”—DIPSALME 37:8.

Ge o ka diriša seo Beibele e se bolelago o tla thabela bophelo gona bjale, le go ba le bokamoso bjo bobotse. Beibele e re botša ka dilo tšeo Modimo a re tshepišago gore o tlo re direla tšona nakong e tlago, tše bjalo ka tšeo di latelago.

BATHO BA TLO PHELA KA KHUTŠO E BILE BA ŠIRELETŠEGILE

“Ba tla thaba kudu ka baka la go ata ga khutšo.”—DIPSALME 37:11.

BATHO KA MOKA BA TLA BA LE DIJO LE DINTLO

“Ba tla aga dintlo ba dula go tšona; ba tla bjala dirapa tša merara ba ja dienywa tša tšona.”—JESAYA 65:21.

BATHO BA KA SE SA LWALA LE GO HWA

“Lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.”—KUTOLLO 21:4.

Ke’ng seo o ka se dirago gore o tle o thabele ditšhegofatšo tše, tšeo re boletšego ka tšona tša nakong e tlago? Ekwa seo o ka se dirago sehlogong seo se latelago.

^ ser. 6 Gore o hwetše ditaba tše dingwe mabapi le go fetolelwa le go abja ga Beibele, e ya go www.pr418.com/nso o lebelele ka tlase ga DITHUTO TŠA BEIBELE > HISTORI LE BEIBELE.

^ ser. 16 Gore o hwetše boitsebišo bjo bo oketšegilego, bona kgaolo 9 ya puku ya Seisemane ya The Bible—God’s Word or Man’s? yeo e gatišitšwego ke Dihlatse tša Jehofa. O ka e hwetša wepesaeteng ya rena go www.pr418.com. E ya ka tlase ga LIBRARY > BOOKS & BROCHURES.